Judah Ŋunu Ahaz
16
Ŋga Remaliah biblɔ Pekah na jɔɔn li kre, ki yɛlɛ kɛmbɔkɔɔnashin wo na, kre Jotham biblɔ Ahaz na pan mna jɔɔn li Judah tra nu. 2 Ŋga Ŋunu Ahaz na Judah jɔɔn kre li kre, na we pe yɛlɛ fulo, a wra tni jɔɔn kre na yɛlɛ kɛmbɔkɔɔnanu Jerusalem na. U kepele nsra pe na u tolɛɛ David wi, ki tia o Tafun Nyiɛkpɔɔ yiɛ nsra shɔ u kepele na. 3 Israel ŋulo sisam kee nyjɛ pra pe yire na wra taa. Hali wra wre titi biblɔ sro mna tɛɛ mu sɛɛn pɛɛri, mna taa leele mblɛ o Tafun Nyiɛkpɔɔ na ni pe yiɛ pre afunyi kee yire na. 4 Wraa shie na sumi nyambie, na tinyi wrɛ vuu wee yire jaara, na prɛ woni, na tuwe ndiom tɛɛn sroi wa.5 Kre nyjila kre Syria ŋunu Rezin, na Remaliah biblɔ Pekah Israel ŋunu wre na sɛ Jerusalem fɛ mu kun, la, pe nsra Ahaz ja. 6 Nyjila ŋga ni Ŋunu Ahaz naa Judah tra le kre, Edom ŋunu na sɛ wi mna chia ŋga praa yeeri Elath kre shɔ Judah ŋunɔwifɛɛnlɛ kɛɛ, a kra tia Edom leele na yiri mna sɛ tni kre chia kre na mu pan mu su aŋga na. 7 Ahaz na leele tun na pe sɛ yo Assyria ŋunu Tiglath-Pileser pan mbo, “Mu sumifun kprafun wi mi, kena jande pan mu ni shɔ Syria, na Israel ŋulo mblɛ pe pan na wii na ni ni pre kɛɛ.” 8 Ŋga bitumblɔ pre naa shie kre, Ahaz na swafiŋge, na swanyiɛ nyjɛ wra nya o Tafun Nyiɛkpɔɔ Suminyuŋgo wa, na ŋunu katoo wa swa tɛɛhaa wa yire koli, mna sɛ Assyria ŋunu wre kɛ. 9 Ŋga mandiɛ kre na le Assyria ŋunu wre ndie to, a wra yiri wre na u wifɛɛnlɛ ni mna sɛ wi Damascus leele ni mna chia kre shɔ, mna ki leele yii mna sɛ Kir na, mna sɛ pe le nyuŋgo, mna Ŋunu Rezin gbo.
10 Ŋga Ŋunu Ahaz na sɛ Assyria ŋunu Tiglath-Pileser fni Damascus na kre, wra sragbunu ka nya wa, mna ki sembremu nyunɔ mna sɛ srawɔfun Uriah nyina. 11 A srawɔfun Uriah na sragbunu kre ka sin imi na Ŋunu Ahaz na ki nya Damascus na kre. Wra ki pe mu kɔ a Ŋunu Ahaz na chin mna yiri Damascus na mu le. 12 Ŋga Ŋunu Ahaz na le mna sragbunu kre nya kre, a wra flo mu da ki na mna ki le, 13 mna sɛ yirɛ sroo sra, na sro sra, na simi woo sra wɔ, mna ndru mu nyimi nyaara sragbunu kre na mna tɛɛ mu wejinyiŋge sra wɔ. 14 Swafre sragbunu ŋga kraa wa mu yire o Tafun Nyiɛkpɔɔ yiɛ kre naa wa mu yire sragbunu fɔŋgɔ kre na Suminyuŋgo kre lalaa, a Ahaz na ki flo wa, mna sɛ ki tɛɛ na shie sragbunu fɔŋgɔ kre nyjeeri haa. 15 A Ahaz na yo srawɔfun Uriah pan mbo, “Ta bnimi yirɛ sroo sra, na yilakɔŋgɔ shɔlɔ sra, na ŋunu yirɛ sroo, na u shɔlɔ sra, na leele mblɛ pee wa tra kre nu kro yirɛ sroo sra, na pe shɔlɔ sra, na pe simi yire woni sragbunu kpɔɔ kre na. Mbe mu yurɛ pre nyimi yire kro nyaara mbe wo sragbunu kre na. La, swafre sragbunu kre rɛ, kre ni mbe na chlɛ.” 16 A srawɔfun Uriah na kee ŋga Ahaz na yo u pe kre pe.
17 A Ŋunu Ahaz na sɛ swafre trogo yire pra pe mu tɛɛ Suminyuŋgo wa yire knumu yiyɛ na, mna nyumu leyirɛ bɛɛlɛ yire yiraa wa mu taataa yi na yire laala yi na, mna swafre nyumu leyira ŋga praa yeeri Epo kre laa swafre nablɛm pre na, mna sɛ ki taa dnɛ yɛ na. 18 A wra yoŋgo nyuŋgo ŋga pra pe Suminyuŋgo kre lam, a praa sumi ki nu Wuuble kre wru na, mna jlonwee nyu ŋga nu Judah ŋulo tro na shie Suminyuŋgo kre tɔ. Wra yire kee nyjɛ krɛrɛ pe mbe ki ti mbe Assyria ŋunu wre yiɛ shɔ u na.