7 Yire kee nyjɛ krɛrɛ na pe nya, ŋgi na hin? Pra laa o Tafun Nyiɛkpɔɔ ŋmba wra pe shɔ mu yili Egypt ŋunu Pharaoh kɛɛ wre kro, mna sɛ na sɛɛnlɛ sumi. 8 Pra taa waŋgrɛ nyjɛ o Tafun wre na ni mu flo pe yiɛ yire kepele yire na sisam kee nyjɛ Israel ŋulo pre na pe nyina yire kro. 9 Israel leele pre na wɔmu kee tataara nyjɛ yi n nyu pe mna pe Tafun wre taan. Mu yire pe chiɛ yire kakpɔɛ na mu sɛ su yi kabɛɛlɛ na kro, pra sumi ndoe sin sin. 10 Israel leele pre na dnɛ kna sɛɛnlɛ, mna pe Asherah sɛɛn chlɔ kre kɛɛn kan kan nyambie, na tinyi wrɛ wee yire jaara na yi sumi. 11 Pan praa shie na tuwe ndiom tɛɛn sroi pe sɛɛnlɛ nyambie yire na chɔɔ, imi na waŋgrɛ nyjɛ leele o Tafun Nyiɛkpɔɔ na ni pe yiɛ pre naa pini kre. Pe kefuɛn nyjɛ praa pini yire na tia o Tafun wre krɔ na kun na pe ni. 12 Sɛɛnlɛ nyjɛ o Tafun wre na yo na pia na sumi kre, yire pra kro na sumi. 13 O Tafun Nyiɛkpɔɔ na yire u keenyanyofɛɛnlɛ pre na mna Israel, na Judah leele pre jaari mbo, “E laa e sisam kro. E ni mbra na ni kee yire le e li yi na. Mbra kee nyjɛ ndaa le mna e tolɛɛlɛ ŋga na pe li yi na kre, yire chɔɔ ni yire ni keenyanyofɛɛnlɛ na mu na yuu e pan kre.” 14 La, pe je pe n na chaa mbe li yi na, mu tia pe ndiile kan na pe tolɛɛlɛ mblɛ pe nsra pe Tafun Nyiɛkpɔɔ, ŋmba wi pe Nyiɛkpɔɔ wre shɔ mu li pre lɛ. 15 Pra pe Tafun Nyiɛkpɔɔ wre mbra yire, na nyu-nunu ŋga wra pe na pe tolɛɛlɛ pre ni, na jaaraa ŋga wra pe jaari yire kro je, mna sɛ taa sɛɛnlɛ wɛɛ kro, a kra tia pra kaari lewaala na. Waŋgrɛ nyjɛ yira pe fɛ mu kun pre kee praa twan. A nde pe Tafun Nyiɛkpɔɔ wre na yo pe pan mbo, “Yaashia kee nyjɛ pe pini yire yɛ pe.” A pra je na kee nyjɛ na pe Tafun Nyiɛkpɔɔ na pe jaari yire piin. 16 Pra ndikana pe mbra nyjɛ pe Tafun Nyiɛkpɔɔ wre na pe ŋga yire kro na, mna sɛ swanyiɛ nya mu nui biile shiin pe sɛɛn, na sɛɛn Asherah chlɔ kɛɛn na wɔɛlɛɛ na Baal sɛɛnlɛ kro sumi. 17 Pe pe bibilɛ na pe bichiɛlɛ kro sroi sɛɛnlɛ na mbo sra pe woni. Praa shie na chlɛ na dobodobo kee piin, mu peyɛ wru mu sisam kro ŋga na sisam kee nyjɛ mu chin ŋga kro pini, mu tia o Tafun Nyiɛkpɔɔ krɔ na kun na pe ni. 18 Kra tia o Tafun Nyiɛkpɔɔ krɔ kun na Israel leele pre ni kpɔɔ, a wra pe ni mna flo u yiɛ. Judah leele pre chiin pra kro.

19 Ande Judah leele pre chɔɔ nsra li o Tafun Nyiɛkpɔɔ wre mbra yire na. Kaalɛɛ nyjɛ Israel leele pre naa pini yire chɔɔ praa twan. 20 Yire kee nyjɛ ndra na o Tafun Nyiɛkpɔɔ na krɔ kna mna wa Israel leele pre na, mna tia pra kala nya pe loŋgoolo kɛɛ, mna sɛ su na wra pe ni mu flo u yiɛ.

21 Nyjila ŋga nu o Tafun Nyiɛkpɔɔ na Israel leele pre kun mu yili pe tolɛɛ David leele pre nu kre, Israel leele pre na sɛ Nebat biblɔ Jeroboam wre wru, mna u pe pe ŋunu. A Jeroboam na tia Israel leele pre na laa o Tafun Nyiɛkpɔɔ wre kro, mna tia pra le sisam kpɔɔ nu. 22 Israel leele pre na taa Jeroboam na mnaa sisam nyjɛ wraa pini yire pini. Hali pe nsra laa yi kro, 23 mna sɛ su na, o Tafun Nyiɛkpɔɔ wre na pe ni mna flo u yiɛ, imi na wra yire u sumifɛɛnlɛ keenyanyofɛɛnlɛ pre na mna pe jaari kre. Ki tia pra Israel leele pre yii mna yili pre titi tra nu, mna sɛ na pe ni Assyria waŋgra nu, hali pee wa wa mu pan mu su aŋga na.

24 Assyria ŋunu wre na sɛ leele wru Babylon, na Cuthah, na Avva, na Hamath, na Sepharvaim na, mna sɛ pe tɛɛ tɛɛ Samaria na, a pra ki shɔ mu tni, kre na ki chiɛ hɛnyi yire kro. 25 Ŋga leele pre na pan mu tni wa kre, ki jle kre na pe n na o Tafun Nyiɛkpɔɔ wre sumi. Ki tia Nyiɛkpɔɔ na tia jirae na pan mu le pe nu mna pe plɛ gbo gbo. 26 A pra sɛ Assyria ŋunu wre bɔ mandiɛ mbo, “Leele mblɛ mu sɛ tɛɛ Samaria chiɛ yire na kre, pe n waŋgra kre Nyiɛkpɔɔ wre mbra chin, ki tia jirae pan mu le pe nu mu leele pre plɛ gbo gbo.” 27 A Assyria ŋunu wre na yo pe pan mbo, “E sɛ srawɔfɛɛnlɛ mblɛ o na yii tinlɛ Samaria na mu pan mna pre wa wru e ndru e sɛ na u ni, mbe u sɛ tni wa, mbra e nyina tra kre Nyiɛkpɔɔ wre mbra.” 28 Ki tia pra Israel srawɔfɛɛnlɛ mblɛ pra yii Samaria na pre nunu wru a wra sɛ tni Bethel na, mnaa leele pre nyina kolo ŋga na pie tro mbe o Tafun Nyiɛkpɔɔ wre sumi.

29 La, leele mblɛ pra sɛ tni Samaria tra nu wa kre, imi na pra nyi nyininyini kre, pan pra pe sɛɛnlɛ pe pe mna yi tɛɛ tɛɛ lawee nyjɛ Samaria leele titi pre na sin sin nyambie yire na kre. 30 Leele mblɛ pra yiri Babylon tra nu pre, sɛɛn ŋga praa yeeri Succoth-Benoth kre pre na pe. A leele mblɛ pra yiri Cuthah na pre na sɛɛn Nergal pe. A leele mblɛ pra yiri Hamath na pre na sɛɛn Ashima kre pe. 31 A leele mblɛ pra yiri Avvite na pre na sɛɛnlɛ Nibhaz, na Tartak pe. A leele mblɛ pra yiri Sepharvaim na pre naa pe biile sroi na sra woni na pe sɛɛnlɛ nyjɛ praa yeeri Adrammelech, na Anammelech yire kaan. 32-33 Praa pe sɛɛnlɛ yire sumi imi na praa yi sumi fa a pra chin mu pan na pe ni Israel tra nu kre, a ŋga praa wa wa kre, pra leele wɔ peyɛ nu, a pra pe pe sɛɛnlɛ yire pra tɛɛ tɛɛ nyambie yire na yire pɛɛrifɛɛnlɛ, mna ndru mu na o Tafun Nyiɛkpɔɔ wre sumi na.

34 Hali mu pan mu su aŋga, pee wa mu taa pe fa paala kee yire na tɛ. O Tafun Nyiɛkpɔɔ wre chiin ma pe sumi, a pe n na lii mbra nyjɛ wra Jacob nanae pre ŋga yire na. Jacob wre chɔɔ wra ŋga mɛɛ Israel kre. 35 Ŋga o Tafun Nyiɛkpɔɔ na nyu-nunu pe na Israel leele ni kre, wra yo pe pan mbo, “Yaashia sɛɛnlɛ sumi, ndee mbe suulo yi yiɛ, ndee mbe yi pɛɛri. 36 La, mi e Tafun Nyiɛkpɔɔ ŋmba ndaa yire ni jaŋga kpɔɔ kre na, mna e wɔ mu yili Egypt tra nu kre chiin ki fna e sumi. A mi chiin yiɛ ki fna mbe e na suulo, a mi chiin ki fna mbe e na sra woni mbra kaan. 37 A ki fna e le na ee li ni mbra kee yire ndaa nyunɔ mu tɛɛ e pan yire na nyjila kro. A yaashia sɛɛnlɛ sumi. 38 A e ni nyu-nunu ŋga ndaa pe na e ni kre sɔɔnri. Yaashia sɛɛnlɛ sumi, 39 fɔna mi e Tafun Nyiɛkpɔɔ wre chiin ki fna mbe e sumi. Mi chiin mbe ja mbe e shɔ e loŋgoolo kɛɛ.”

40 La, leele pre pra pan mu tni Israel tra nu pre nsra ndie tɛɛ o Tafun Nyiɛkpɔɔ mbra yire na, pra je mna taa pe fa paala yire na. 41 Kii wa na praa o Tafun Nyiɛkpɔɔ wre sumi, a nde praa pe sɛɛnlɛ yire sumi na yaa. Hali mu pan mu su aŋga, pe biile, na pe nanae wa mu na kee nyjɛ pe lɛɛlɛ, na pe tolɛɛlɛ naa pini yire pini.