2 Kings 18

Judah Ŋunu Hezekiah

Ŋga Elah biblɔ Hoshea na pan mna jɔɔn li Israel na kre, ki yɛlɛ taarɛwo na Ŋunu Ahaz biblɔ Hezekiah na pan mu jɔɔn li Judah na. 2 Wra li yɛlɛ fulo na kunɔ, a pra chin mu u tɛɛ jɔɔn na, a wra tni Jerusalem na yɛlɛ fulo na kɔɔnanyjirɛ jɔɔn kre na. U lo mɛɛ naa Abijah, Zechariah bichlɔ na wi. 3 Wra kee ŋga ki fraka pe o Tafun Nyiɛkpɔɔ pan, imi na u tolɛɛ David na pe kre. 4 Wra tia pra sɛɛnlɛ pɛɛri hɛɛ nyjɛ yiraa wa nyambie na yire kro kla, mna dnɛ nyjɛ praa peerii yire kro gbun mu juari. Mna tia pra sɛɛn chlɔ Asherah kɛɛn nyjɛ pra kan yire kuari mu wo. Wra tia pra wɔɔ ŋmba Moses na swafre tɛɛ mna pe wre pile brobro. Ŋgi na hin? Kre nyjila kre krɛrɛ, na Israel leele pree wa na tuwe ndiom tɛɛn sroi na ki kaan, a praa ki yeeri Nehushtan. 5 Hezekiah naa kaan o Tafun, Israel Nyiɛkpɔɔ wre na. A Judah ŋulo pre nu krɛrɛ, wa nsraa wa u kro, ndee u yiɛ mna da na u ni. 6 Wra fraka o Tafun Nyiɛkpɔɔ wre yiɛ, mna li mbra nyjɛ Nyiɛkpɔɔ na Moses ŋga yire kro na. 7 A o Tafun Nyiɛkpɔɔ wre naa wa u kro, ki tia kee ŋga wraa pini kro naa nyɔɔ na u kaan. Wra yiri mna Assyria ŋunu taan, mna je na wa u sumi. 8 Wra sɛ wi na Philistine leele ni mna pe ja, mna pe nyuŋgo gedeŋge ŋga na praa yire na chia siri kre ja mu wo, mna pe kakpɔɔ ŋga pra mboo sin mu fɛ mu kun kre juari, hali mna sɛ su Gaza lawee yire nu kro.

9 Ŋga Ŋunu Hezekiah na li jɔɔn na yɛlɛ jijirɛ kre, na kre Elah biblɔ Hoshea li jɔɔn na yɛlɛ kɔɔnashin Israel na. Kre nyjila kre Assyria ŋunu Shalmaneser na pan mna Samaria fɛ mu kun mbe wi na pe ni. 10 Pra pe tɔ yɛlɛ taarɛ mna chin mu pe ja. Kena ŋga Hezekiah na li jɔɔn na yɛlɛ kɔɔnanu kre, na kre Israel ŋunu Hoshea li jɔɔn na yɛlɛ kɔɔnanyjirɛ. 11 Assyria ŋunu wre na Israel leele pre yii mna sɛ na pe ni Assyria na, mna sɛ pe tɛɛ kakpɔɔ ŋga praa yeeri Halah kre na, mna sɛ plɛ tɛɛ Habor lɔɔ kre mbɛɛ na Gozan tra nu, mna sɛ pe plɛ tɛɛ Mede leele chiɛ yire na. 12 Ŋga kra tia kre kee ŋga na pe ma na yi na, leele pre nsra li pe Tafun Nyiɛkpɔɔ wre kee na. Pra u nyu nunu ŋga wra pe na pe ni kre je. A mbra nyjɛ wra Moses ŋga yire, pe nsra li yi na, pe nsra ndie tɛɛ yi na kple, mbaa yo taa pie taa yi na.

13 Ŋga Ŋunu Hezekiah na li jɔɔn na yɛlɛ kɛmbɔjijirɛ kre, kre nyjila kre Assyria ŋunu Sennacherib na yiri mna wi na Judah kakpɔɛ nyjɛ pra mboo sin mu fɛ mu kun yire kro ni, mna pe ja. 14 Ki tia Judah ŋunu Hezekiah na leele tun Assyria ŋunu pan Lachish na mbo, “Ni sisaa pe, kena jande laa mi na ni leele na. Tɔɔ ŋga mu yo ni tɔ kpan, mbe ki tɔ.” Assyria ŋunu wre na yo Judah ŋunu Hezekiah pan na wraa swafiŋge ŋga snamu kie da kra dnɛ kagbenyi fulo, na swanyiɛ ŋga snamu kie da kra dnɛ kagbenyi shiin toni mbra u kaan. 15 Ki tia Ŋunu Hezekiah na sɛ swafiŋge ŋga wra nya Suminyuŋgo wa, na ŋunu katoo wa swa tɛɛ ndoo yire nu kro koli mna sɛ Assyria ŋunu wre ŋga. 16 Kre nyjila kre Judah ŋunu Hezekiah na swanyiɛ nyjɛ wra nya mu wo o Tafun Nyiɛkpɔɔ Suminyuŋgo kre krɔɛ bie, na yi krɔɛ jeelee na yire kro gbun mu laala, mna yi koli mna sɛ Assyria ŋunu wre ŋga.

Sennacherib Chaa Mbe//Wi Na Jerusalem Ni

17 A Assyria ŋunu wre na yire Lachish na mna u wifɛɛnlɛ loplombo titie taarɛ wɔ, pre na ŋunɔwifɛɛnlɛ tataara ni, mna pe tun Ŋunu Hezekiah pan Jerusalem na. Ŋga pra le wa kre, pra sɛ kolo ŋga na yonyi pefɛɛnlɛ pre na nyi, mna mbra wee ŋga nu nyumu naa tro na yilii tapla nyjeeriwo kre nu kre shɔ mu ta. 18 A pra yire wa mna Ŋunu Hezekiah yeeri, a Hilkiah biblɔ Eliakim, ŋmba na wi ŋunu katoo wa lefun wre, na Shebna, ŋunu katoo wa kala lihaa nyunɔfun, na Asaph biblɔ Joah, ŋmba wraa ŋunu katoo wa kebɛɛlɛ nyunɔi na teeri wre, na yili mna sɛ pe fni.

19 A Assyria ŋunɔwifɛɛnlɛ lopom titie pre nunu na yo pe pan mbo, “E sɛ yo Hezekiah pan na kee ŋga Assyria ŋunu kpɔɔ wre yo yi kre mbo, ‘Yira ŋgi na mu kaan ma hin? 20 Ŋu mu yuu na mu kooloe chin, a mu wifɛɛnlɛ faŋga ni, la, nyu mu yuu finfin. Ndro ŋmbi na mu kaan mu yiri mu ni taan ŋga hin? 21 Le, fuŋga ni nya na Egypt ŋunu na mu kaan, la, pan u nyi na ndro braŋgɔ pe kanyie, kie ka mbe u kɛ su. Pan Egypt ŋunu Pharaoh ŋmba na leele kaan wre nyi. 22 A na maa yo ni pan na, O Tafun Nyiɛkpɔɔ wre na o kaan, a wre Nyiɛkpɔɔ wre sumi lawee, na u sragbuɛnlɛɛ nyjɛ yiraa wa nyambie na yire ma Hezekiah na kla, mna yo Judah, na Jerusalem leele pan na, praa shie mbra sumi titɛɛ Jerusalem na kree?’” 23 A wra ndru mu yo mbo, “Pan mbe ŋu na ni lopom Assyria ŋunu wre kankan li. Mbe mu ŋga soolo kagbenyi shiin, na mu pe nduufɛɛnlɛ ta wala. 24 Egypt ŋunu na mu kaan mbe u paan mu ŋga soolo, na pe nduufɛɛnlɛ, kena mni mu pe mbe jaa yire Assyria ŋunɔ wifun ŋmba uu fiɛn kuraa yiɛ hin? 25 Mu n chin na e Tafun Nyiɛkpɔɔ wre u tia o pan mu na wii na e ni ŋga ra? E Tafun Nyiɛkpɔɔ wre titi u yo na o pan mbe wi na e ni, mbe e waŋgra kre kla.”

26 A Hilkiah biblɔ Eliakim, na Shebna, na Joah na kna mna yo Assyria ŋunɔwifun lopom wre pan mbo, “Jande, paara mu sumifɛɛnlɛ pan Aramaic yolo nu, yire nɔɔ o ndru, maa Hebrew yolo yo mbe leele mblɛ pee wa mboo ŋga na ŋga ka loo.”

27 A ŋunɔwifɛɛnlɛ lopom wre na kna mbo, “E jawa na yire na e lopom wre chiin pan pe ni tun ra? Leele mblɛ pe tni mboo ŋga na, mu pe na yire lɛ ŋga, pie pre titi fre ka, mbe peyɛ fnimi gbɔ.”

28 A ŋunɔwifɛɛnlɛ lopom wre na taan mu yiri mu yire mna paara Hebrew yolo nu kpɔɔ mbo, “E kee ŋga Assyria ŋunu jaŋgafun wre yo loo, 29 mbo, ‘Yaa ti mbe Hezekiah e fana, wa ja mbe e shɔ ni kɛɛ. 30 Yaa ti mbe Hezekiah kro mbra e fana mbe e na kaan e Tafun Nyiɛkpɔɔ wre na, mbra yuu e pan na, O Tafun Nyiɛkpɔɔ wre we o shɔ yɛŋgɛ, a o chia ŋga wa to Assyria ŋunu kɛɛ fio.’” 31 Yaa ndie tɛɛ Hezekiah pan. Kee ŋga Assyria ŋunu yo yi kre mbo, “E yili chia kre na e pan mbe o wejinyiŋge kee yo. Kre ee e tre, na e fig tinyi yire sɛnyi ta mbe ka, mbe nyumu ta mbe gbɔ e kɔlɔe yire nu, 32 mbe ni chiin paan e yii mbe sɛ na e ni tra ŋga ki pe na e wo ŋga yi kre nu. Tra ŋga nu ee jaa tre seele pe, mbe jaa shɔlɔ luu ki nu. Tra kre, olive tinyi bribri yi ki na, a pan chɔɔ srɛ nyumu bɔ ki na. Kumu na ŋmaa lalaa e nyi kre, e ka le e wɔ. Yaa ndie tɛɛ Hezekiah pan, ŋgi na hin? Fana u e fana na yuu e pan na, E Tafun Nyiɛkpɔɔ wre we e shɔ mbe wa. 33 E da mu loo na waŋgra ka sɛɛn ki leele shɔ Assyria ŋunu kɛɛ tun ra? 34 Sena Hamath, na Arpad sɛɛnlɛ yire na nyi hin? A sena Sepharvaim, na Hena, na Ivvah sɛɛnlɛ yire na tro hin? Yire sɛɛnlɛ yire na ja mna Samaria tra shɔ Assyria wifɛɛnlɛ kɛɛ ra? 35 Yire sɛɛnlɛ nyjɛ krɛrɛ, ka nsra ja mu ki waŋgra shɔ Assyria ŋunu kɛɛ. Kena mni e Tafun Nyiɛkpɔɔ wre we pe mbe Jerusalem shɔ ni kɛɛ hin?”

36 La, leele pre nsra nyu kun, a pra yire gbrum na le imi na Ŋunu Hezekiah na klu mu pe jaari, na na blɔ wre waa na paara pia shia nyu kun kre. 37 A Eliakim, na Shebna, na Joah na ndru mna sɛ Hezekiah pan. Ŋga pra le katoo wa kre, na fooro tia pe pe dodonyi tini mu wla peyɛ na kro, a pra sɛ kee nyjɛ Assyria ŋunɔ wifɛɛnlɛ lopom wre na yo yire kro, bɔ ŋunu pan.