Hezekiah Na Sɛ Jawala Shɔ Isaiah Pan
19
Ŋga Ŋunu Hezekiah na mandiɛ kre loo kre, kra pe u pan nyibinyiɛ kee, a wra u dodonyi tini mu wla uyɛ na, mna kumu yoŋgo wru mu tɔ, a kra nyina na fooro u lii, mna sɛ o Tafun Nyiɛkpɔɔ Suminyuŋgo wa. 2 Wra tia Eliakim, na Shebna, na srawɔfɛɛnlɛ pre yɛkulo pre kro na kumu yonyi wru mu tɔ tɔ, a wra pe tun Amoz biblɔ Isaiah keenyanyofun wre pan. 3 Kee ŋga ni wra pe tun Isaiah pan na yi kre mbo, “Fooro, na yɛgbɔɔnrɔ, na yɛkuuro ble yi aŋga, pan o sɛ pe na chlɔ ŋmba u wii lɛɛ ni mbe se, a faŋga n wa u nu mbe u kunu wi. 4 Aada o Tafun Nyiɛkpɔɔ, mu Nyiɛkpɔɔ wre kee nyjɛ Assyria ŋunɔwifɛɛnlɛ lopom wre yo yire krɛrɛ loo. U tafun Assyria ŋunu wre u u tun, a u pan na Nyiɛkpɔɔ ŋmba uu wa nyjila kro nu wre tɛɛlɛ, aada o Tafun Nyiɛkpɔɔ we u yiɛ gbun kee nyjɛ u yuu yire na, kena jande, nyiɛtali mu wre na leele mblɛ o kro pre ŋga.” 5 Ŋga Ŋunu Hezekiah bitumblɔ pre na sɛ Isaiah pan kre, 6 kee ŋga Isaiah na yo pe pan yi kre mbo, “E sɛ yo e tafun wre pan na, ‘Kee ŋga o Tafun Nyiɛkpɔɔ wre yo yi kre, yaa ti mbe Assyria ŋunu kee nyjɛ e ndru yire e le fiɛrɛ, jiɛnlɛ kee nyjɛ u yo yire krɛrɛ, mi na u yi yo. 7 E loo, mbe sɛ ŋumu ka le u nu, we kafinɛ kee ka loo ndie ni, mbe ndru mbe fɛ mbe sɛ u waŋgra nu, a bawa mbe ti pe u gbo brɔfiɛn yiɛshiin ni.’”8 Kraa wa wa, a ŋunɔwifɛɛnlɛ lopom wre na loo na Assyria ŋunu wre yili Lachish na. A wra yili Jerusalem na mna sɛ u nya na u wii na Libnah leele ni. 9 Kre nyjila kre chɔɔ, Assyria ŋunu Sennacherib wre na loo na Cush ndro Tirhakah, ŋmba na wi Egypt ŋunu wre paan mbe u tɔ, a wra ndru mna leele tun Ŋunu Hezekiah pan mbo, 10 “Maashia ti mbe sɛɛn ŋga na mu muyɛ taa kre mu fana, na Jerusalem wa jaa to Assyria ŋunu kɛɛ fio. 11 Ŋu titi loo kee ŋga Assyria ŋunu taa waŋgrɛ na, na imi na u yi kla mu da. Kena mu jawa na ŋu we shɔ u kɛɛ ra? 12 Ni tolɛɛlɛ na Gozan, na Haran, na Rezeph na Eden leele mblɛ praa wa mu tini Tel-Assar na pre kla, ande yire waŋgrɛ yire sɛɛnlɛ nsra ja mu pe shɔ. 13 Sena Hamath, na Arpad, na Sepharvaim kakpɔɛ yire, na Hena, na Ivvah ŋulo pre nyi hin?”
14 Ŋga Hezekiah na hlɛ kre shɔ bitumblɔ pre kɛɛ mna ki tɔɔnri mu kɔ kre, a wra yiri mna sɛ o Tafun Nyiɛkpɔɔ Suminyuŋgo wa, mna sɛ hlɛ kre nyaa mu chan o Tafun Nyiɛkpɔɔ yiɛ. 15 Bawa Hezekiah na nyiɛtali mbo, “O Tafun Nyiɛkpɔɔ, Israel Nyiɛkpɔɔ, ŋu ŋmba mu ŋunumu lii Cherubim lalaa, ŋu chiin wi Nyiɛkpɔɔ ŋmba mu wɛ tra ŋga ŋulo kro na, a ŋu mu nyjeeri na tra wa. 16 Jande ndie tɛɛ ni pan, o Tafun Nyiɛkpɔɔ nyiɛlɛ nyaa mu le kee nyjɛ Ŋunu Sennacherib nyunɔ mu pan na ŋu Nyiɛkpɔɔ ŋmba muu wa nyjila kro nu wre tɛɛlɛ. 17 O Tafun Nyiɛkpɔɔ, ki pe kpra na Assyria ŋulo na yire waŋgrɛ nyjɛ kee blɔ ŋmba yuu nyjɛ krɛrɛ kla yɛŋgɛ. 18 Pra sɛ pe sɛɛnlɛ koli mna kanhun le yi na mna yi kla. Ŋgi na hin? Yaka yirɛ na ma, kɛɛn, na dnɛ nyjɛ leele na tɛ yi. 19 Kena o Tafun Nyiɛkpɔɔ, jande o shɔ mu yili u kɛɛ, mbe ki ti tra ŋga ŋulo pre chin na ŋu o Tafun Nyiɛkpɔɔ wre chiin wi Nyiɛkpɔɔ.”
Isaiah na Ŋunu Sennacherib//Too Kee Nya Mu Yo
20 A Amoz biblɔ Isaiah wre na yo na pe sɛ yo Hezekiah pan mbo, “Kee ŋga o Tafun Nyiɛkpɔɔ, Israel Nyiɛkpɔɔ wre yo yi kre, ‘Assyria ŋunu Sennacherib kee nyjɛ u yuu e na yire ndra na, ni e nyiɛtalaa loo. 21 A kee ŋga ni yo mu tro u haa yi kre,
Jerusalem leele kpeli mu to,
na Ŋunu Sennacherib pini na tɛɛ.
22 Ndro ŋmbi nyini mu tɛɛlɛ,
na jiɛnlɛ kee yuu u na,
mu na fuuru na muyɛ kpɔɔri
mi Israel Nyiɛkpɔɔ cheche
wre na ŋga hin?
23 Mu leele tun a pe pan,
mu nyukpɔɔmu kee yo ni na.
Mu sookɛɛ tataara tia mu nduu
Lebanon nyuɛ gedenyi yire na,
mu sɛ pe cedar tinyi gedenyi
yire knumu mu chan,
na pe tinyi chichiele yire ni kro,
mu tro mu sɛ le pe klɔ kpɔɔ kre nu.
24 Mu muyɛ kpɔɔ
na mu kɔlɔe tuu leele plɛ trɛ nu,
mu gbɔ yi nu,
mu Egypt lafooloe taanla, a yi yua.
25 Kena mu n loo na mi Nyiɛkpɔɔ
ndaa yire kee nyjɛ krɛrɛ jawa,
mu tɛɛ fa na yie pe ra?
A fuŋgaami ni tia yi pe ma.
Mi Nyiɛkpɔɔ ndaa mu ŋga jaŋga,
na mu yire kakpɔɛ nyjɛ pe mboo sin,
mu fɛ mu kun yire juari,
mbe yi kaari kponkpon bri.
26 Mi ndaa tia chiɛ yire leele
na faŋga cha mu la,
a fiɛrɛ na tia tutom na wo pe na,
a nyifɛɛrɛ na pe gbo.
Pan pra nyi to
na nyaa nyjɛ see lam yi.
Pan pra nyi na
wrɛ nyjɛ yi funi jle yi,
ndee na nyaa ŋga ki fin,
nyuŋgo ndra na yi,
yila wa ti mbe ki ja mbe lɛ.
27 La, mi Nyiɛkpɔɔ,
ni mu kee kro chin,
kee ŋga mu pini,
na mna mu tro kro, ni ki chin.
A ni chin imi na mu yiri,
mu ni taan mu da.
28 Ŋga mu yiri mu ni taan,
na imi mu muyɛ kpɔɔri ni na,
mu da kre kro le ni ndie.
Ki tia mbe ni drawa gɔli mu mana,
mbe ni krafi le mu nyuu,
mbe ndru mbe tro na mu ni kolo
ŋga mna yii mu pan kre chɔɔ na,
mbe ndruu sɛ na mu ni.’”
29 Isaiah na yo Ŋunu Hezekiah pan mbo, “Kee ŋga kie pe kre sɛmbɛɛrɛ mbe mu nyina kre. Ala yɛlɛ ŋga nu, shɔlɔ klomboli ee kun mbe li, na yɛlɛ waa kna, nyjɛ yie ŋɔɔ yi na ee ta mbe kun mbe li. La, yɛlɛ taarɛ wo kre nu, yire titi we shɔlɔ luu mbe yi kun, kre nu ee kagblɛ pe, mbe yi sro ta mbe kun mbe li. 30 Judah katoo leele chiɛri mblɛ pie kro pre we pe na tiŋge ŋga ki didiŋge kan, mu fun mbe sɛ yi. 31 Leele chiɛri we kro Jerusalem na, o Tafun Nyiɛkpɔɔ Jaŋgafun wre chaara kie ti mbe ki pan ma.”
32 Kena kee ŋga o Tafun Nyiɛkpɔɔ wre yuu mu wru Assyria ŋunu wre haa yi kre. “Wa jaa le Jerusalem na, mbaa yo snimi we jaa ŋu wa. Wa jaa pan mbe yire Jerusalem leele yiɛ na ŋunɔwiyira ŋga ni lewo uyɛ toni ni, ndee mbe paan tra fa mbe ble Jerusalem mboo kre kro, mbe nduu le ki na. 33 Kolo ŋga wra yii mu pan kre chɔɔ na we ndruu troo sɛ, wa jaa le Jerusalem na fio. Mi e Tafun Nyiɛkpɔɔ wre ni ki yo. 34 Mi titi, na ni sumifun David ndra na, mbe wi mbe Jerusalem shɔ.”
35 Ki ble kre blee, o Tafun Nyiɛkpɔɔ nyjeeri bituŋu na sɛ leele kagbenyi lafaa, na fuloe jijirɛ na kunɔ gbo Assyria leele pre tni haa wa. Ŋga nyiŋge na se bnimi, a leele pre na nyi kre, na gboolo wa mu sni sni lawee kre nu kro poŋgo. 36 A kra tia Assyria ŋunu Sennacherib na yili lawee kre nu mna ndru mu sɛ pe kapɔɔ Nineveh kre na pe tra nu. 37 Praa wa ki wa ble ka, a ŋunu wre na sɛ le u sɛɛn Nisroch nyuŋgo na ki peerii, a u bibilɛ Adrammelech, na Sharezer na sɛ u tɔ mna u gbo na brɔfiɛn yiɛshiin ni, mna fɛ mu sɛ Ararat tra nu. A u biblɔ Esarhaddon na u krɔ li mna jɔɔn li.