Ŋunu Hezekiah Na Yaa Mna Saanla
20
Yire ble yire nu Hezekiah na yaa mna yire kumu kɛ na. A Amoz biblɔ Isaiah wre na sɛ yo u pan mbo, “Kee ŋga o Tafun Nyiɛkpɔɔ yo ni paan yo mu pan yi kre. Mu paan mbe ku, kena mu yɛ kna. Mu yira ŋga mu yaa, ŋga, ma saanla.” 2 A Hezekiah na yiɛ kna mna kan mboo na, mna o Tafun Nyiɛkpɔɔ wre tali mbo, 3 “Jande, o Tafun Nyiɛkpɔɔ ni sɔɔnri, imi na ni lɛɛ wɔ mu nyaari mu yiɛ na kpra ni, mu gbeŋmba mu taa kee ŋga ki fraka na.” Ŋga wraa nyiɛtali kre wra nyɛni chichie. 4 Ŋga Isaiah na yo we yili ŋunu kagbala wa mbe sɛ to, a o Tafun Nyiɛkpɔɔ na ndru mna yo u pan mbo, 5 “Ndru mu sɛ yo ni leele lefun Hezekiah pan na, ‘Kee ŋga mi e Tafun Nyiɛkpɔɔ, e tolɛɛ David Nyiɛkpɔɔ wre yo yi kre. Ni mu nyiɛtalaa kre loo, mu mu yotunyi yire nya. Mbe mu tra, a mna ble taarɛ ble na, mu yiri mbe sɛ ni Suminyuŋgo wa. 6 Mbe yɛlɛ kɛmbɔkunɔ ya mu ŋmaa na. A mbe ŋu na kakpɔɔ kre shɔ Assyria ŋunu kɛɛ. A mi titi, na Ŋunu David ndra na, mbe kɛ tɔ kakpɔɔ ŋga na.’” 7 Bawa Isaiah na kna mu yo ŋunu sumifɛɛnlɛ pre pan mbo, “E sɛ fig sɛŋgɛ tre e pan e ki taa u lawee ŋga ki tin kre na, we saanla.” 8 A Hezekiah na kna mna Isaiah wie mbo, “Sɛmbɛɛrɛ yira ŋgi kie ti mbe ni chin na o Tafun Nyiɛkpɔɔ wre we ni saanla mna ble taarɛ, mbe ni jaa yiri mbe sɛ u Suminyuŋgo wa hin?” 9 A Isaiah na kna mna u nyu wɔ mbo, “O Tafun Nyiɛkpɔɔ we li u nyu ŋga u yo kre na mbe mu ŋga sɛmbɛɛrɛ yira. Mu na chaa na yila shie tohaa, mbe mu ndile ndru ki kro sɔɔlɛɛ kɛ, ndee mbe sɛ ki yiɛ sɔɔlɛɛ kɛ ra?” 10 A Hezekiah na kna mbo, “Na yira ndile we sɛ yiɛ shɔlɔ kɛ, kala shelee ma kre, kena ti mbe ki sɛ kro shɔlɔ kɛ.” 11 A Nyiɛkpɔɔ keenyanyofun Isaiah na o Tafun Nyiɛkpɔɔ wre tali, a o Tafun Nyiɛkpɔɔ na tia lawee ŋga Ŋunu Ahaz na sin, a kraa nyjila nyina kre ndile na ndru kro ni shɔlɔ kɛ.12 Kre nyjila kre Baladan biblɔ Merodach-Baladan, Babylon ŋunu wre, na Ŋunu Hezekiah yira kre kee loo, mna hlɛ nyunɔ mna pan mu Hezekiah ŋga atɛ, mna u kɛ yirɛ mu ya. 13 Hezekiah na Babylon ŋunu bitumblɔ pre shɔ, mna pe nyina krɔyirɛ nyjɛ yiraa wa u pan kro, swafiŋge, na swanyiɛ, na tuwe ndiom tɛɛn, na simi li wee chichiele, na tlade, yirɛ nyjɛ yiraa wa u pan kro, wra pe nyina yi yi, hali u ŋunɔwiyirɛ kro, wra pe nyina yi yi. Kre yira nsraa wa ŋunu katoo wa, ndee u ŋunumu kre nu, a u nsra pe nyina yi yi. 14 A Isaiah na sɛ Ŋunu Hezekiah pan mna sɛ u wie mbo, “Sena leele mblɛ yiri hin? A pe mandiɛ hin?” A Hezekiah na kna mbo, “Babylon na pe yiri, pe yiri haalee.” 15 A Isaiah na ndru mu u wie mbo, “Yirɛ nyji pe nya mu ŋunu katoo mna hin?” A Hezekiah na kna mbo, “Yirɛ nyjɛ yii wa katoo mna kro pe yi nya. Kre yira ka n wa katoo mna a ni n pe nyina ki yi.”
16 A Isaiah na yo Hezekiah pan mbo, “Kee ŋga o Tafun Nyiɛkpɔɔ wre yo mu pan loo, 17 ‘Nyjila kaa wa na paan mbe yirɛ nyjɛ yii wa mu katoo mna, na yirɛ nyjɛ mu tolɛɛlɛ cha mu tɛɛ mu pan mu su aŋga yire kro, Babylon leele we pan mbe yi koli mbe sɛ. Pia yaka bie ti.’ Kee ŋga o Tafun Nyiɛkpɔɔ yo yi. 18 A pie ŋu titi nyimi leele, na mu biile plɛ yii mbe sɛ na pe ni Babylon tra nu, mbe sɛ pe san, mbe pe tɛɛ Babylon ŋunu katoo.” 19 A Hezekiah na kna mbo, “O Tafun Nyiɛkpɔɔ kee ŋga mu yo kre nyu.” Wra kee kre nɔɔ loo na wejinyiŋge we pe u tra kre nu u nyjila nu.