Judah Ŋunu Manasseh Kee
21
Ŋga pra Judah ŋunu Manasseh tɛɛ jɔɔn na kre, na u li yɛlɛ kɛmbɔshiin, a wra tni jɔɔn kre na Jerusalem na yɛlɛ fuloe shiin na kɛmbɔkunɔ. U lo mɛɛ naa Hephzibah. 2 Wra sisaa pe o Tafun Nyiɛkpɔɔ wre yiɛ. Waŋgrɛ nyjɛ leele o Tafun Nyiɛkpɔɔ na ni Israel leele pre yiɛ pre pe afunyi kee nyjɛ praa pini yire kro wra taa. 3 Sɛɛnlɛ pɛɛri ndoe nyjɛ u lɛ Hezekiah na juari nyambie yire na kre, wra ndru mna yi sin. Wra ndru mna Baal sɛɛn kre sragbuɛnlɛɛ yire sin, mna sɛɛn chlɔ Asherah kaan gedeŋge kre kan, imi na Israel ŋunu Ahab na pe kre. Hali wraa kosie kani na wɔɛlɛɛ sumi. 4 O Tafun Nyiɛkpɔɔ Suminyuŋgo ŋga nu wra yo na u mɛɛ fna mbe tni wa kre, Manasseh na sɛɛnlɛ sragbuɛnlɛɛ sin ki lam. 5 O Tafun Nyiɛkpɔɔ Suminyuŋgo lawee vankam shiin yire kro nu, wra sragbuɛnlɛɛ sin sin wa, mnaa wɔɛlɛɛ peerii. 6 Wra u biblɔ sro, mu u tɛɛ mu sra wɔ, mnaa chlɛ, na dobodobo kee pini, na gboolo yeerii. Wra sisam tataara pe o Tafun Nyiɛkpɔɔ yiɛ, mna tia u krɔ na kun kpɔɔ. 7 Wra sɛɛn chlɔ Asherah kaan gedeŋge kre ka nyini tɛ, mna sɛ ki tɛɛ Suminyuŋgo ŋga kee o Tafun Nyiɛkpɔɔ na yo Ŋunu David, na u biblɔ Solomon pan mbo, “Kre Suminyuŋgo ŋga Jerusalem na ŋga, kre ni wɔ Israel sele yire kro nu, mbe ni mɛɛ tni ki nu nyjila kro nu. 8 A na Israel leele we li ni kee nyjɛ ni pe nyina yire kro na kpra ni, mbe taa ni mbra nyjɛ ni sumifun Moses na pe ŋga yire kro na wala, mba ti mbe pe yili tra ŋga ndaa pe tolɛɛlɛ ŋga kre nu, mbe sɛ na kila mbra tro na.” 9 La, leele pre nsra ndie tɛɛ. Manasseh na pe wa mu fun, a kra tia pra sisam tataara pe mna wɛ waŋgrɛ nyjɛ o Tafun Nyiɛkpɔɔ na kla pre na.10 Ki ble ka o Tafun Nyiɛkpɔɔ na yo u keenyanyofɛɛnlɛ mblɛ na lɛ u sumifɛɛnlɛ pre plɛ pan mbo, 11 “Judah ŋunu Manasseh afunyi kee pe mu le sisam nu. Wra sisam pe kuraa mu wɛ Amora leele mblɛ pra yiɛ klu kre na. Wra tia Judah leele na u sɛɛnlɛ sumi mna sisam pe.” 12 Kena kee ŋga o Tafun Nyiɛkpɔɔ, Israel Nyiɛkpɔɔ wre yo yi kre, “Ni paan na kala kpɔɔ ni Jerusalem na Judah tra nu, ndro ŋmba we ki loo kpan, kie u pe kawako ni. 13 Mbe Jerusalem leele ndie tini imi na ndaa Samaria leele, na Israel ŋunu Ahab na u nanae pe kre. Mbe Jerusalem pɔ imi na lewo nɛɛrɛ poo mbe laa tafrabɔtɔ na mbe ki kna mbe juule kre, pan mbe pe pe. 14 A ni leele mblɛ pie kro chiɛri kre, mbe kɛ laa pe na, mbe pe wru mbe le pe loŋgoolo kɛɛ, mbe pe pe ju, mbe pe foolo, 15 ŋgi na hin? Pe sisam pe ni na, mu tia ni krɔ kun na pe ni kpɔɔ mu yire nyjila ŋga ni ndaa pe tolɛɛlɛ wɔ mna yili Egypt tra nu mu pan mu su aŋga na.”
16 A kee ŋga ki ya yi na, Manasseh lenɛɛrɛ nyimi kna mu wo finfin, a ki tia nyimi na fuu Jerusalem lete na. Kre chiin ma kple, u tia Judah leele sisam pe mi pe Tafun Nyiɛkpɔɔ yiɛ.
17 Manasseh kee nyjɛ wra pe yire kro, yire na sisam nyjɛ wra pe yire kro, pra yi nyunɔ mna le hlɛ ŋga nu praa Judah ŋulo fakee nyunɔi kre nu. 18 Manasseh na ku, a pra sɛ u le ŋunu katoo kagbla lam wa, Ŋunu Uzza kagbla kre nu. A u biblɔ Amon na u krɔ li, mna jɔɔn li.
Judah Ŋunu Amon
19 Ŋga Amon na jɔɔn li kre, na u li yɛlɛ fulo na shiin. A wra tni jɔɔn na Jerusalem na yɛlɛ shiin. U lo mɛɛ naa Meshullemeth, a u lelɛɛ na wi Haruz, a wra yiri Jotbah na. 20 Ŋunu Amon na sisaa pe o Tafun Nyiɛkpɔɔ yiɛ. Pan wra pe to na u lɛ Manasseh wi. 21 Kooloe nyjɛ na u lɛ na tro yire chɔɔ na wra tro, sɛɛlɛ nyjɛ u lɛ naa sumi yire chɔɔ kro wra taa, mnaa suulo yi yiɛ. 22 Wra o Tafun Nyiɛkpɔɔ, u tolɛɛlɛ Nyiɛkpɔɔ wre je, u nsra taa u kee na. 23 Ŋunu Amon loplombo plɛ na yiri mna u taan, mna sɛ u gbo ŋunu katoo wa. 24 A kra tia tra kre leele na yiri mna kolo cha mna leele mblɛ pra Ŋunu Amon gbo pre yii mna pe gbo mu fɔlɔ tɔ, mna tia u biblɔ Josiah na u krɔ li mna jɔɔn kre li. 25 Ŋunu Amon kee, na kaalɛɛ nyjɛ wra pe yire kro, pra yi nyunɔ mna le hlɛ ŋga nu praa Judah ŋulo fakee nyunɔi na leni kre nu. 26 Pra u le faŋga ŋga kraa wa Uzza kagbla wa kre nu. A u biblɔ Josiah na pan mna u krɔ li mna jɔɔn kre li.