Judah Ŋunu Manasseh
33
Ŋga Manasseh na ŋunumu li kre, na u li yɛlɛ kɛmbɔshiin, a wra tni Jerusalem na mna jɔɔn kre li yɛlɛ fuloe shiin na kɛmbɔkunɔ. 2 Wra sisaa pe o Tafun Nyiɛkpɔɔ wre yiɛ. Afuŋgo kee nyjɛ waŋgrɛ nyjɛ leele o Tafun Nyiɛkpɔɔ na ni Israel leele pre yiɛ yire kro wra taa. 3 Wra sɛɛnlɛ sumi ndoe nyjɛ yiraa wa nyambie lawee yire nu, a u lɛ Hezekiah na yi kla yire gbeele mu sin, mna sɛɛn Baal sragbuɛnlɛɛ yire gbeele mu sin, mna sɛɛn chlɔ Asherah kɛɛn yire kan, mnaa wɔɛlɛɛ sumi na. 4 Wra sɛɛnlɛ sragbuɛnlɛɛ sin o Tafun Nyiɛkpɔɔ wre Suminyuŋgo ŋga nu wra yo na, “Ni Mɛɛ we tni Jerusalem na nyjila kro nu kre nu.” 5 Wra sragbuɛnlɛɛ sin sin o Tafun Nyiɛkpɔɔ wre Suminyuŋgo kre lawee vankam shiin yire nu, a praa sra woni yi na, na wɔɛlɛɛ kaan. 6 Wraa shie Ben-Hinnom landɛɛ kre nu na u bibilɛ sroi na sra woni na pe ni. Wraa chlɛ, na dobodobo, na tiprɛm kee pini. Wra sisam tataara pe, mna tia o Tafun Nyiɛkpɔɔ wre krɔ na kun.7 Wra sɛɛn tɛ badaaŋga, mna sɛ ki tɛɛ o Tafun Nyiɛkpɔɔ Suminyuŋgo kre nu. Nyiɛkpɔɔ na yo Ŋunu David na u biblɔ Solomon pan mbo, “Kre Suminyuŋgo ŋga nu ni Mɛɛ we tni nyjila kro, a Jerusalem ni wɔ Israel tra kre kro nu, mbe pe ki sin. 8 Na ni leele pre we li ni mbra, na ni nyu kee nyjɛ ndaa yo ni sumifun Moses pan yire kro na kre, kena mba ti pe pe ni, mbe yili tra ŋga ndaa pe tolɛɛlɛ ŋga kre nu na fio.”
9 La, Manasseh rɛ, wra Jerusalem na Judah leele wa mu fun, mna tia pra sisam kee pe mu wɛ waŋgrɛ nyjɛ leele o Tafun Nyiɛkpɔɔ wre na kla pe yiɛ fa kre na.
10 O Tafun Nyiɛkpɔɔ wre na paara Manasseh na u leele pre pan, la, pe nsra ndie tɛɛ u pan. 11 Ki tia o Tafun wre na tia a Assyria ŋunɔwifɛɛnlɛ loplombo na pan mu wi na pe ni, mna Manasseh yii mna drawa le u mana, mna swafre sɛɛrɛ le u na mna sɛ na u ni Babylon tra nu. 12 Ŋga wraa kala nyaa kre, wra uyɛ nyjii mna o Tafun Nyiɛkpɔɔ ŋmba wi u tolɛɛlɛ Nyiɛkpɔɔ wre haa cha, mbe u nyu u na. 13 Ŋga wra tali kre, o Tafun Nyiɛkpɔɔ wre na ndie tɛɛ u pan, mna u talaa kre loo, a wra tia pra u wa, a wra ndru mna pan Jerusalem na, mna na u ŋunumu lii. Bawa Manasseh na chin na o Tafun wre wi Nyiɛkpɔɔ yɛŋgɛ.
14 Ŋga wra ndru mu pan kre, wra David kakpɔɔ kre mboo fimi wo ŋga kraa wa na shie Gihon blo kre yila tohaa kre sin mu sɛ su jlonwee ŋga praa yeeri Mbro Jlonwee kre na, hali mna lawee ŋga praa yeeri Ophel nyambie kre fɛ mu kun na ki ni, wra mboo kre sin a kra gede mu ya. A wra ŋunɔwifɛɛnlɛ loplombo wɔ mu tɛɛ Judah kakpɔɛ nyjɛ pra mboe sin mu fɛ mu kun yire kro na. 15 Wra tia pra sɛɛnlɛ yire wɔ tra kre nu, a wra sɛɛn ŋga wra tɛ mna sɛ tɛɛ o Tafun Nyiɛkpɔɔ Suminyuŋgo wa kre wru wa, yire na sɛɛnlɛ sragbuɛnlɛɛ nyjɛ wra sin nyambie ŋga na Suminyuŋgo kre na nyi, na Jerusalem na yire kro wɔ chia kre na, mna sɛ yi wo mbookrɔ. 16 Wra o Tafun Nyiɛkpɔɔ sragbunu kre gbeele mu sin, mna wejinyiŋge na mboo ŋgaa sra wɔ, mna yo Judah leele pre pan na praa o Tafun, Israel leele Nyiɛkpɔɔ wre chiin sumi. 17 Leele pre naa shie na sra woni nyambie lawee yire nu, la, o Tafun Nyiɛkpɔɔ wre chiin praa yi woni na kaan.
18 Kee nyjɛ Ŋunu Manasseh na pe u jɔɔn li nyjila, na u nyiɛtalaa kee, na kee nyjɛ Nyiɛkpɔɔ keenyanyofɛɛnlɛ na yo u pan yire kro, pe yi nyunɔ mu le Israel ŋulo fakee hlɛ nu. 19 Imi wra nyiɛtali a Nyiɛkpɔɔ na loo u pan, na sisam nyjɛ wra pe mna chin mu kɔ mu u jawala chinɛ, na kefuɛn nyjɛ wra pe sɛɛnlɛ sumi ndoe yire nu, na sɛɛn chlɔ Asherah ŋga wra tɛ, na sɛɛnlɛ nyjɛ wra sumi yire kro, pe yi kee nyunɔ mu le Nyiɛkpɔɔ keenyanyofɛɛnlɛ fakee hlɛ kre nu. 20 Manasseh na ku mna u tolɛɛlɛ kɔŋgɔ ni, a pra u le ŋunu katoo wa, a u biblɔ Amon na u krɔ li, mna tni jɔɔn kre na.
Amon Na Jɔɔn Li Judah Na
21 Ŋga Amon na jɔɔn li kre, na u li yɛlɛ fulo na shiin, a wra tni Jerusalem na mna jɔɔn kre li yɛlɛ shiin. 22 Wra sisam kee pe o Tafun Nyiɛkpɔɔ wre yiɛ, imi u lɛ Manasseh na pe kre. Amon na sɛɛnlɛ sumi, na sra woni na sɛɛnlɛ nyjɛ u lɛ na da mu pe yire kaan. 23 La, imi na u lɛ na kɔ mna uyɛ nyjii mna Nyiɛkpɔɔ ŋga kre, Amon nsra pe ma, wre sisam na wɛ. 24 Ŋunu Amon loplombo plɛ na kɔ mu yiri mu u taan, mna sɛ u gbo ŋunu katoo wa. 25 Ŋga kra pan ma kre, tra kre leele na leele mblɛ pra yiri mu Ŋunu Amon taan pre kro yii mna pe gbo, mna u biblɔ Josiah yii mu tɛɛ u titɛɛ.