3 Ŋga wra li yɛlɛ kɔɔnatarɛ jɔɔn kre na kre, na uu wa mu pe pɔ tɛ, kre nyjila kre wraa u tolɛɛ David Nyiɛkpɔɔ wre sumi. Ŋga wra ta yɛlɛ kɛmbɔshiin jɔɔn kre na kre, kre wra nɔɔhle na sɛɛnlɛ pɛɛri ndoe yire, na sɛɛn chlɔ Asherah kɛɛn yire, na sɛɛnlɛ nyjɛ pra tɛ, na nyjɛ pra tɔɔnrɔ nya mu pe yire kro klai Judah, na Jerusalem tra nu. 4 Wra tia pra Baal sragbuɛnlɛɛ yire gbun mu juari, mna tuwe ndiom tɛɛn sragbuɛnlɛɛ nyjɛ yira mbra yi na yire chile bujibuji mu wo, mna sɛɛn chlɔ Asherah kɛɛn yire gbun mu kuari, mna sɛɛnlɛ hɛnyi yire kro kla. Yire sɛɛnlɛ yire krɛrɛ wra yi gbun mu juari, mna yi juaraa yire nyina mu wo leele mblɛ praa shie na sra woni yi na pre fanyi na. 5 Josiah na tia pra sɛɛnlɛ pɛɛrifɛɛnlɛ pre kajle sro sragbuɛnlɛɛ yire na. Kre kolo ŋga na wra tro mna sɛɛn sumiɛ wɔ Jerusalem, na Judah tra nu. 6 Chiɛ nyjɛ yiraa wa Manasseh, na Ephraim, na Simeon tra yire nu, na kajɛɛ nyjɛ yira yi fɛ mu kun yire, wra sɛɛn sumiɛ wɔ yi na, hali mna sɛ su Naphtali tra nu. 7 Wra tia pra sragbuɛnlɛɛ yire gbun mu juari, yire na sɛɛn chlɔ Asherah kɛɛn yire ni kro. Wra sɛɛnlɛ yire gbun mu juari mbruru, mna tuwe ndiom tɛɛn sragbuɛnlɛɛ yire kro chile bujibuji Israel tra nu, ŋga wra kɔ kre, a wra ndru mu sɛ Jerusalem na.

8 Ŋga Josiah na li yɛlɛ kɛmbɔkɔɔnatarɛ jɔɔn kre na kre, wra paala pe mna nɛɛrɛ laa tra kre na, a wra tia Azaliah biblɔ ŋmba praa yeeri Shaphan wre, na Maaseiah ŋmba wraa Jerusalem le wre, na Joahaz biblɔ Joah ŋmba wra pe nyunɔfun wre wɔ, a pra sɛ o Tafun Nyiɛkpɔɔ Suminyuŋgo lawee nyjɛ yi kla yire gbeele.

9 Leele taarɛ pre na sɛ Levi leele mblɛ na lɛ Suminyuŋgo jlonwee nyu shiefɛɛnlɛ pre swa ŋga pra shɔ Manasseh, na Ephraim, na Judah, na Benjamin, na Jerusalem leele mblɛ pra kro kre pan kre ni, mna sɛ srawɔfun lopom titi Hilkiah ŋga. 10 A pra ki kna mu le leele mblɛ pra wɔ a praa o Tafun Suminyuŋgo kre tnumu le pre kɛɛ. A praa swa kre ka teeri na tnumu tunfɛɛnlɛ pre fɔlɔ toni. 11 Pra kapintae, na brichae pre ŋga swa kre ka, mbe pe tɛɛ mbe dnɛ chichiele, na kɛɛn nyjɛ ni pie tɛɛ mbe nyinyi nyjɛ lawee fa Judah ŋulo na tia yira kla yire tnumu tun. 12 Tnumu tunfɛɛnlɛ pre na tnumu kre tun lɛɛ nunu ni. Mblɛ praa pe le pre na lɛ Jahath, na Obadiah, a pra pe Levi leele mna yiri Merari katoo, na Zechariah, na Meshullam, Kohath nanae na lɛ pre. Pre Levi leele mblɛ na mɛɛ kɔyirɛ yire tɛɛ mu mɛɛ gbun mu chin, 13 a pre praa tnumu tunfɛɛnlɛ pre kro le pe tnumu nyjɛ praa tuni nu. Levi leele pre plɛ na lɛ nyunɔfɛɛnlɛ, na nyinafɛɛnlɛ, na Suminyuŋgo kre shiefɛɛnlɛ.

14 Ŋga praa swa ŋga ni pra pan o Tafun Suminyuŋgo wa kre woni kre, kre nyjila kre srawɔfun Hilkiah na o Tafun Nyiɛkpɔɔ mbra hlɛ ŋga Moses na pe ŋga kre nya Suminyuŋgo wa. 15 A srawɔfun lopom titi Hilkiah wre na kna mu yo nyunɔfun Shaphan wre pan mbo, “Ni Mbra hlɛ kre nya o Tafun Nyiɛkpɔɔ Suminyuŋgo wa.” A wra ki wru mna Shaphan ŋga. 16 A Shaphan na ki wru mna sɛ ŋunu nyina mna ki kee yo u pan mbo, “Mu loplombo pree wa na tnumu ŋga mu le pe kɛɛ kre tuni imi na ki fna. 17 A pe swa ŋga kii wa o Tafun Suminyuŋgo wa kre wru mu pan mu le loplombo mblɛ pe tnumu tunfɛɛnlɛ pre le pre kɛɛ.” 18 A Shaphan ŋmba na wi nyunɔfun wre na ndru mu yo mbo, “Srawɔfun lopom Hilkiah u ni ŋga hlɛ ŋga.” A wra ki lam kee tɔɔnri ŋunu wre pan.

19 Ŋga ŋunu wre na Mbra kee yire loo kre, a wra fooro tɛɛ mu u dodonyi tini mna wla uyɛ na, 20 mna kna mu yo Hilkiah, na Shaphan biblɔ Ahikam, na Micah biblɔ Abdon, na nyunɔfun Shaphan, na Asaiah ŋunu wre lefun wre pan mbo, 21 “E sɛ yire o jeelee na, e o Tafun Nyiɛkpɔɔ wre wie mi na Israel leele, na Judah leele mblɛ pe kro chiɛri pre pan mu wru kee nyjɛ yii wa hlɛ ŋga o nya ŋga nu ŋga haa. Ŋgi na hin? O chin na o Tafun Nyiɛkpɔɔ wre krɔ kun na o ni kpɔɔ, ŋga o tolɛɛlɛ pre nsra taa u kee na, mna li hlɛ kre lam kee na kre ndra na.”

22 Titɛɛ kre nu, Hilkiah na pre leele jijirɛ pre na sɛ Nyiɛkpɔɔ keenyanyofun chlɔ ŋmba praa yeeri Huldah wre pan. U plɔ na wi Tokhath biblɔ Shallum wre, a u tolɛɛ na wi Hasrah, a wre kɛɛ ŋunu dodonyi nyjɛ u leni na nyi. Huldah naa wa mu tni na shie Jerusalem nyjeeri haa wa, a leele pre na sɛ u pan katoo. 23 A chlɔ wre na yo pe pan mbo, “Ŋunu Josiah u e tun ni pan, la, kee ŋga o Tafun Israel Nyiɛkpɔɔ wre yuu u pan yi kre, 24 ‘Ni paan mbe Jerusalem na ki leele kro ndie tini, mbe ti suŋgɔ kee nyjɛ pe tɔɔnri hlɛ kre nu Judah ŋunu yiɛ na yire kro pe yii. 25 Ŋgi na hin? Pe ni je mu sɛ na tuwe ndiom tɛɛn sroi na sɛɛnlɛ kaan, mu tia krɔ ni kun sɛɛnlɛ nyjɛ pre titi kɛnyi tɛɛ mu pe yire ndra na. Kee nyjɛ pe pe yire ndra na, mbe ti mbe pe ni krɔkuɔn sisaa kre nya, a ndro wa jaa ki nyu yii.’ 26 Kena e sɛ yo Judah ŋunu ŋmba u e tun na e pan mbe ni o Tafun Israel Nyiɛkpɔɔ wre wie e pan wre pan na, Kee ŋga o Tafun Israel Nyiɛkpɔɔ yuu mu yire kaalɛɛ nyjɛ mu loo hlɛ kre nu haa yi kre, 27 ‘Ŋga mu kee nyjɛ Nyiɛkpɔɔ paan mbe pe Jerusalem na ki leele na yire loo kre, mu mu jawala chinɛ, mu muyɛ nyjii mi Nyiɛkpɔɔ yiɛ, mu mu dodonyi wla muyɛ na, mu nyɛni ni yiɛ, ki tia ni mu nyiɛtalaa kre loo, pan mi mu Tafun Nyiɛkpɔɔ wre yo. 28 Fuŋga rɛ, mbe ti mbe mu mu tolɛɛlɛ pre kɔŋgɔ ni, a pie mu le wejinyiŋge ni. Mu nyibie wa kala ŋga kie Jerusalem na ki leele da kre nya.’” A bitumblɔ pre na pan mu ŋunu bɔ mandiɛ.

29 Ŋga pra sɛ mandiɛ kre bɔ Ŋunu Josiah pan kre, a wra u loplombo mblɛ praa wa Jerusalem, na Judah tra nu kro yeeri. 30 A wre na Judah, na Jerusalem leele pre kro na sɛ le Suminyuŋgo wa. Pre na srawɔfɛɛnlɛ pre, na Levi leele pre ni kro. Swafɛɛnlɛ, na shianfɛɛnlɛ kro na ka sɛ wa. A ŋunu na Nyu Nunu Mbra hlɛ ŋga pra nya Suminyuŋgo wa kre tɔɔnri kpɔɔ, a pe kro na loo. 31 Ŋga wra hlɛ kre tɔɔnri mu kɔ kre, na uu wa mu yire mu mbra ŋulo pilaasi kre na, Suminyuŋgo wa, a wra yire o Tafun Nyiɛkpɔɔ wre yiɛ mna nyu nunu kre gbeele mu pe fɔŋgɔ, mna nyu yo na we li Nyiɛkpɔɔ mbra, na u kee kro na, na loloŋgo nunu, na u nyiɛ kro ni, mbe taa kee nyjɛ pe nyunɔ nyu nunu hlɛ kre nu yire kro na.

32 A wra tia Jerusalem, na Benjamin leele pre kro na nyu yo Nyiɛkpɔɔ pan na pie li Nyiɛkpɔɔ ŋmba pe tolɛɛlɛ naa sumi wre kee na.

33 Ŋunu Josiah na tia Israel leele pre afunyi sɛɛnlɛ yire wɔ kro tra kre nu, mna tia pe kro na kna na o Tafun Nyiɛkpɔɔ wre sumi. Nyjila ŋga nu wraa wa kre, pe nsra laa pe tolɛɛlɛ Nyiɛkpɔɔ wre kro.