3 Ŋga Ŋunu Josiah na da jɔɔn kre na yɛlɛ kɛmbɔkɔɔnatarɛ kre, wra u nyunɔfun Shaphan, Azaliah biblɔ ŋmba tolɛɛ na wi Meshullam wre tun o Tafun Nyiɛkpɔɔ Suminyuŋgo wa mbo, 4 “Sɛ yo srawɔfun lopom titi Hilkiah pan, na u swa ŋga srawɔfɛɛnlɛ pre shio leele pre pan Suminyuŋgo jlonwee nyu na kre le mbe tɛɛ. 5 Mbe mu yo u pan na u leele mblɛ pe o Tafun Nyiɛkpɔɔ Suminyuŋgo kre le pra ki tnumu tuni pre ŋga swa kre, mbe pe ki tɛɛ mbe tnumu tunfɛɛnlɛ pre fɔlɔ tɔ, 6 kapintae pre, na brichae pre, na tnumu tunfɛɛnlɛ pre kro pe pe fɔlɔ tɔ. Mbe ka tɛɛ mbe kɛɛn, na dnɛ nyjɛ pe tɛtɛ yire yɛ lɔ, mbe Suminyuŋgo kre gbeele. 7 Leele mblɛ pie swa kre tɛɛ mbe tnumu tun kre fraka, kena pia shia pan mbe ki kuntaa pe.”

8 A srawɔfun lopom Hilkiah na yo Shaphan, ŋunu nyunɔfun wre pan mbo, “Ni Mbra hlɛ kre nya o Tafun Nyiɛkpɔɔ Suminyuŋgo wa.” A wra ki wru mna Shaphan ŋga, a wra ki tɔɔnri. 9 A Shaphan na pan mna mandiɛ kre bɔ ŋunu pan mbo, “Tolɛɛ, mu loplombo pre swa ŋga kii wa o Tafun Nyiɛkpɔɔ Suminyuŋgo wa kre wru mu le tnumu tunfɛɛnlɛ pre, na mblɛ pe ki gbeele pre kɛɛ.” 10 Ŋunu nyunɔfun Shaphan wre na ŋunu bɔ mandiɛ ka na mbo, “Srawɔfun Hilkiah u ni ŋga hlɛ ŋga.” A Shaphan na hlɛ kre tɔɔnri ŋunu yiɛ na.

11 Ŋga ŋunu na Mbra hlɛ kre lam kee loo kre, a wra fooro tɛɛ mna u dodonyi tini mu wla uyɛ na. 12 Titɛɛ kre nu, a wra srawɔfun lopom Hilkiah, na Shaphan biblɔ Ahikam, na Micaiah biblɔ Acbor, na ŋunu nyunɔfun Shaphan, na ŋunu lefun Asaiah yeeri mna yo pe pan mbo, 13 “Ki pe na o Tafun Nyiɛkpɔɔ wre krɔ kun na mi na Judah leele pre kro ni kpɔɔ, ŋgi na hin? O tolɛɛlɛ pre nsra ndie tɛɛ Nyiɛkpɔɔ mbra yire pra nyunɔ mu tɛɛ, a o sɛ yili yi na yire na. Kena e sɛ o Tafun Nyiɛkpɔɔ wre wie mbe u o nyina kee ŋga u chaa mbe o pe.”

14 A srawɔfun Hilkiah, na Ahikam, na Acbor, na Shaphan, na Asaiah na sɛ paara na keenyanyofun chlɔ wa Huldah ni, Tikvah biblɔ Shallum chɔ na wi, a Shallum tolɛɛ na wi Harhas. Harhas wraa srawɔfɛɛnlɛ dodonyi le Suminyuŋgo wa. Jerusalem nyjeeri haa Huldah na nyi mu tni. Ŋga pra sɛ u pan kre, 15 a wra yo pe pan mbo, “Kee ŋga o Tafun Nyiɛkpɔɔ wre yo yi kre, ‘Israel Nyiɛkpɔɔ yo na, e sɛ yo blɔ ŋmba u e tun ni pan wre pan na, 16 e Tafun Nyiɛkpɔɔ yo u paan mbe keesaa kpɔɔ ka pe Jerusalem na ki leele na, imi na pe ki nyunɔ mu le hlɛ ŋga pe tɔɔnri Judah ŋunu yiɛ na kre. 17 Ŋgi na hin? Leele pre laa ni kro mu sɛ na tuwe ndiom tɛɛn sroi na sɛɛnlɛ kaan, mu tia ni krɔ kun na pe ni sɛɛnlɛ nyjɛ pe pre titi kɛnyi tɛɛ mu pe yire na. Ki tia ni krɔ we nyi na kanhun yi mbe le pe nu, a yaka wa ja mbe ki fii.’ 18 E sɛ yo Judah ŋunu ŋmba u e tun na e pan mbe o Tafun Nyiɛkpɔɔ wre wie wre pan na, ‘Israel Nyiɛkpɔɔ wre yo na, kee nyjɛ pe tɔɔnri a mu yi loo kre, 19 ni nya imi na mu yiɛ je mu da, ŋga mna loo na ni paara mu chia kre na ki leele taan, na mbe ti mbe ki kaari kataa kre ndra na, mna fooro tɛɛ mna mu dodonyi tini mu wla muyɛ na, hali mna nyɛni ni yiɛ. Mi mu Tafun Nyiɛkpɔɔ wre na mu mana loo. 20 Ki tia mbe ti mbe mu ku wejinyiŋge nu, mbe ni chin mbe Jerusalem kla, mba ti mbe ki pe mu yiɛ na.’” A bitumblɔ pre na sɛ mandiɛ kre bɔ ŋunu pan.