Ŋunu Josiah Na Klɛntro Ble Yire Li
35
Ŋunu Josiah na tia pra Klɛntro ble yire li Jerusalem na, mna Klɛntro ble mbɔɔ wre gbo nyiɛpɔ jlewo kre ble kɛmbɔjijirɛ wo kre na. 2 Wra srawɔfɛɛnlɛ pre wɔ mna pe nyina pe tnumu, mna pe le gbeŋmbaa mbe praa pe tnumu tuni o Tafun Nyiɛkpɔɔ Suminyuŋgo wa. 3 Ŋunu Josiah na yo Levi leele mblɛ praa Israel leele pre nyina Nyiɛkpɔɔ mbra yire pan mbo, “Pra ki yo fa na, ki n fna mbe e na Nyu-Nunu-Daka cheche kre tru mbra shie mbra paan, ki fna mbe tni Suminyuŋgo ŋga Israel ŋunu David biblɔ Solomon wre sin kre nu, mbe e na u sumi wa nyjila kro nu. 4 Ki fna mbe e eyɛ yɔɔlɛ selesele, e fekofeko yire nu imi na Israel ŋunu David na u biblɔ Solomon na ki nyina a pra ki nyunɔ mu tɛɛ kre. 5 E eyɛ yɔɔlɛ fekofeko, e eyɛ kna e yire Suminyuŋgo kre nu, kena na e yire na sumi kre, mbe e jaa na yaa e wolo Israel leele pre na. 6 Kena na leele pre pan na pe Klɛntro ble mbaala pre ni kre, mbe e paala pe mbe nɛɛrɛ laa eyɛ na tun, mbe chiin yurɛ pre gbo pe pan. E le na ee ki pe imi na o Tafun Nyiɛkpɔɔ na yo Moses pan kre.”7 Ŋunu Josiah titi na mbaala na sikaala kagbenyi fulo na kɛ, na nablɛm kagbenyi taarɛ wɔ a pra pe tɛɛ mu sra wɔ leele pre pan. 8 U loplombo pre na yurɛ pre plɛ wɔ leele pre, na srawɔfɛɛnlɛ pre, na Levi leele pre pan, a pra pe tɛɛ mu sra wɔ. Hilkiah, na Zechariah, na Jehiel pre na lɛ loplombo mblɛ praa Suminyuŋgo kre le, pre na wɔ mbaala kagbenyi shiin na lafɛɛ kɔɔnanu, na nablɛm lafɛɛ taarɛ, a pra pe tɛɛ mu Klɛntro ble yire li. 9 A blɔ ŋmba praa yeeri Conaniah wre, na u lɛbiile Shemaiah, na Nethanel, mu wru mu ya Hashabiah na Jeiel na Jozabad, pre na lɛ Levi leele pre loplombo, pre na wɔ mbaala na sikaala kagbenyi kunɔ, na nui lafɛɛ kunɔ mna Levi leele pre ŋga a pra sra wɔ.
10 Ŋga yirɛ nyjɛ ni pie tɛɛ mbe Klɛntro ble yire li yire kro na fni kre, a srawɔfɛɛnlɛ pre, na Levi leele pre na sɛ yire pe yire haa imi na ŋunu wre na pe nyina kre. 11 A pra Klɛntro ble mbaala pre gbo, a srawɔfɛɛnlɛ pre na nyimi yire wru mna nyaara sragbunu kre na, a Levi leele pre na yurɛ pre ŋɔni. 12 Pra yurɛ mblɛ pie sro mbe sra wɔ kre wɔ mu tɛɛ, mna pe yɔɔlɛ mu leele pre ŋga imi na pra nyi sele fekofeko kre, mbe pe pe sro mbe o Tafun Nyiɛkpɔɔ wre ŋga imi na pe ki nyunɔ Moses hlɛ kre nu kre. Pan chɔɔ pra nui pre pe na. 13 Pra yurɛ pre kla kanhun na imi na pe ki nyunɔ mu tɛɛ kre, mna srawɔɔ yurɛ cheche pre sɔɔ chɔɛ, na taahɛɛ nu, mna kaara yire kɛ nyaanyaa mna leele pre kro ŋga. 14 Ŋga pra kɔ kre, a Levi leele pre, na srawɔfɛɛnlɛ pre na peyɛ kna mna sɛ yurɛ pre, na pe nyina yire sro mna Nyiɛkpɔɔ ŋga a ble na pan mu wɔ. 15 Pre Asaph nanae mɛkɔmblɔ pre naa wa mu yire pe yirehɛɛ nyjɛ Ŋunu David, na Asaph, na Jeduthun ŋunu keenyanyofun wre na pe nyina kre nu. A jlonwee nyu shiefɛɛnlɛ pre naa wa mu yire krɔɛ yire nyu na, pe nsra jɔŋgɔ pe titɛɛ, ŋgi na hin? Na pe wolo Levi leele pree wa na sra woni pe pan.
16 Kena imi na Ŋunu Josiah na ki yo kre, pra yira kro pe mna Klɛntro ble yire li, mna yurɛ sroo sra kre wɔ sragbunu kre na mna o Tafun Nyiɛkpɔɔ wre ŋga. 17 Israel leele mblɛ praa wa kre na Klɛntro ble yire li, mna ble kpɔɛ nyjɛ nu pe nsraa yiisi paanu kaa yire li ble kɔɔnashin. 18 Mu yire Nyiɛkpɔɔ keenyanyofun Samuel nyjila, pe nsra da mu Klɛntro ble yire li ma tun. A Israel ŋulo pre wa nsra da mu Klɛntro ble yire li na Ŋunu Josiah wi. Srawɔfɛɛnlɛ, na Levi leele, na Judah na Israel leele pre kro na pan mu fni Jerusalem na. 19 Ŋga Josiah na jɔɔn li kre, ki yɛlɛ kɛmbɔkɔɔnatarɛ wo na pra yire Klɛntro ble yire li.
Ŋunu Josiah Kumu
20 Ŋga Ŋunu Josiah na kee nyjɛ krɛrɛ pe mna Suminyuŋgo kre gbeele mu kɔ kre kɔkro ni, kre Egypt ŋunu Neco wre na ŋunɔ kun na Carchemish chia ŋga kraa wa mu mbra Euphrates lɔɔ na kre leele ni. Ŋunu Josiah na ki loo mna uyɛ kna mbe sɛ u fni mbe pe wi. 21 A Neco na ki loo, mna leele tun u pan mbo, “Tolɛɛ Judah ŋunu, kakrɔ ŋgi kii wa mi na ŋu lalaa hin? Ŋu ni ma ni paan mbe wi fuŋgaami, la, ni loŋgoolo ni ni paan mbe wi, a Nyiɛkpɔɔ yo uu wa ni kro, kena sɛ nyaanyaa, kena maa Nyiɛkpɔɔ tɔ kolo, na kre ma we mu kla.” 22 Ŋunu Josiah nsra kee ŋga Neco na yo kre loo, a wra uyɛ chinɛ ka nyini, mbe sɛ wi na u ni. Kee ŋga Neco na yo na Nyiɛkpɔɔ u ki yo u pan kre, ki nsra le Josiah ndie, wra uyɛ kna mna sɛ wi na u ni Megiddo landɛɛ kre nu. 23 Ŋga praa ŋunɔ kre wii kre, Egypt wifɛɛnlɛ pre wa na Ŋunu Josiah ŋu snimi ni, a wra kna mna yo u sumifɛɛnlɛ pre pan mbo, “E yili na ni ni mna, snimi to ni na.” 24 A pra u wɔ mna yili u sookaa kre nu mna le u sookaa fɔŋgɔ ka nu mna pan na u ni Jerusalem na, a wra pan mu ku, a pra u le u tolɛɛlɛ lehaa wa, a Jerusalem na Judah tra leele kro na u nyɛni. 25 Nyiɛkpɔɔ keenyanyofun Jeremiah wre na kumu mɛɛ kɔ mna Josiah le yɛnyiŋge, hali mu pan mu su aŋga na, bilɛ na chiɛlɛ mɛkɔmblɔ kre mɛɛ kre koni na Ŋunu Josiah sɔɔnri. Kre mɛɛ kre pe ki nyunɔ mu chaa kumu mɛɛ nu.