Assyria Ŋunu Sennacherib Na Wi Na Judah Leele Ni
32
Ŋga Ŋunu Hezekiah na yire kee nyjɛ krɛrɛ pe, mna lɛɛ wɔ mu o Tafun Nyiɛkpɔɔ sumi kɔkro ni kre, Assyria ŋunu kpɔɔ Sennacherib na u ŋunɔwifɛɛnlɛ na pan mu Judah leele tɔ. Wra pan mna pe kakpɔɛ nyjɛ pra mboe sin mu fɛ mu kun yire kun mu le lalaa, mnaa chaa mbe wi mbe chiɛ yire shɔ mbe ta. 2 Ŋga Ŋunu Hezekiah na nya na Sennacherib pan mbe wi na Jerusalem leele ni kre, 3 wre na u loplombo na ŋunɔwifɛɛnlɛ loplombo pre na jawala wru na ki fna pe lɔɛ bɛɛlɛ na bloe nyjɛ yii wa Jerusalem mbookrɔ yire yurɔ. 4 Kena imi kie pe na Assyria leele pre da Jerusalem na mbe pia nyumu ta mbe gbɔ kre, loplombo pre na yiri mna lenɛɛrɛ wru a pra sɛ lɔɛ bɛɛlɛ, na bloe yire kro yurɔ. 5 Ŋunu Hezekiah na tia pra chia kre mboe juaraa yire gbeele mu sin. A wra tia pra nyinyi gedenyi nyjɛ na pie na yire mbra chia kre sri sin, a wra ndru mu tia pe mboo ka sin mboo lɛɛ kre kro mu ki tɔ. Wra tia pra Ŋunu David kakpɔɔ kre lawee ŋga kraa wa na shie Jerusalem na kre gbeele mu sin. Mna tia pra chombo na ŋunɔwiyirɛ nyjɛ ni lewo uyɛ toni tataara gbeele mu tɛɛ. 6 Wra ŋunɔ wi loplombo wɔ mu tɛɛ u ŋunɔwifɛɛnlɛ pre nyu na, mna pe kro yeeri a pra pan mu fni chia kre jlonwee kre lawee ŋga nu leele fni kre nu, a wra pe le gbeŋmbaa mbo, 7 “E gbun ta e yire gbiŋmbi, yaa ti mbe fiɛrɛ e yii Assyria ŋunu wre, na u wifɛɛnlɛ tataara mblɛ pe u kro tɔ kre na, ŋgi na hin? Jaŋga ŋga kii wa o kro kre wɛ jaŋga ŋga kii wa pe kro na. 8 Lewo na nyjuro jaŋga kii wa pe kro, la, o Tafun Nyiɛkpɔɔ wre wa o kro mbe ya o na, mbe wi mbe o ŋga.” Kee nyjɛ ŋunu na yo kre na leele pre le gbeŋmbaa.9 Kraa wa wa nyjila ka nu, a Assyria ŋunu Sennacherib na u wifɛɛnlɛ na pan mu Lachish fɛ mu kun mna yire wa mu leele tun Ŋunu Hezekiah, na Judah leele mblɛ praa wa Jerusalem na wa pre pan mbo, 10 “Mi Sennacherib, Assyria ŋunu kpɔɔ wre, mi ni e wie na, yira ŋgi na e kaan mu tni Jerusalem ŋga mi na ni wifɛɛnlɛ paan mbe tɔ ŋga na hin? 11 Hezekiah u yuu e pan na, e Tafun Nyiɛkpɔɔ wre we e shɔ mbe yili o kɛɛ. La, ni chaa mbe yo e pan mbe e loo na, fana u e fana, mbe ti mbe klo na gbɔɔ e gbo finfin. 12 Wre Hezekiah wre ma wra lawee nyjɛ nu praa sɛɛnlɛ sumi nyambie lawee yire nu, mna sragbuɛnlɛɛ nyjɛ yiraa wa wa yire kla, mna yo Judah na Jerusalem leele pan na, e na shie e na Nyiɛkpɔɔ wre sumi, mbra tuwe ndiom tɛɛn sroi, sragbunu nunu chom na kree? 13 E n loo kee ŋga mi na ni tolɛɛlɛ pre na pe waŋgrɛ hɛnyi yire leele na tun ra? E da mu loo na waŋgra ka sɛɛn da mu ki leele shɔ mi Assyria ŋunu kɛɛ tun ra? 14 Ŋgi ble e da mu loo na waŋgra ka sɛɛn ki leele shɔ o kɛɛ tun hin? Kena yira ŋgi ki tia e na jawa na, e Nyiɛkpɔɔ wre we jaa e shɔ ŋga hin? 15 Kena yaa ti mbe Hezekiah e fana, mbe e jawala wa mbe fun ma. Yaa u shɔ mbe li, ŋgi na hin? Waŋgra ka sɛɛn n wa mu da mu ki leele shɔ Assyria ŋunu kpɔɔ wa kɛɛ tun. Ki tia e jawa e chin na e Nyiɛkpɔɔ wre wa ja mbe e shɔ ni kɛɛ.”
16 Ŋunu Sennacherib loplombo pre na kee tataara yo mna o Tafun Nyiɛkpɔɔ wre na u sumifun Hezekiah taan. 17 Hlɛ ŋga ŋunu wre na nyunɔ kre kuraa na nɛɛrɛ wo o Tafun Israel Nyiɛkpɔɔ wre na, wra yo u hlɛ kre nu mbo, “Imi na waŋgrɛ yire sɛɛnlɛ n da mu pe leele shɔ ni kɛɛ kre, pan chɔɔ Hezekiah Nyiɛkpɔɔ wre wa jaa u leele shɔ ni kɛɛ.” 18 Yire kee nyjɛ, Sennacherib loplombo pre na yi paara badaaŋga Hebrew yolo nu, mbe ki ti mbe Jerusalem leele mblɛ praa wa mu tni mboo ndra na kre kro loo mbe fiɛrɛ pe yii mbe pe sɔɔnrɔ ku, kena pe ja mbe le chia kre na mbe wi mbe ki shɔ. 19 Praa wre Jerusalem Nyiɛkpɔɔ wre kee yuu mnaa jawa na yira waa yi imi na waŋgrɛ sɛɛnlɛ nyjɛ pe kɛnyi tɛɛ mu pe yire yi.
20 Kra tia Ŋunu Hezekiah na Amoz biblɔ Isaiah, Nyiɛkpɔɔ keenyanyofun wre na nyɛni mna Nyiɛkpɔɔ yeeri mbe u paan ya pe na. 21 A o Tafun Nyiɛkpɔɔ wre na tia u bituŋu na pan mna Assyria ŋunu ŋunɔwifɛɛnlɛ pre, na pe loplombo pre gbo peii, a ŋunu wre na ndru mna sɛ Assyria na nyifɛɛrɛ ni. Ki ble ka, wraa wa u sɛɛn nyuŋgo, a u bibilɛ plɛ na sɛ u tɔ mna u gbo brɔfiɛn yiɛshiin ni.
22 Kre kolo ŋga na o Tafun Nyiɛkpɔɔ wre na tro mna Ŋunu Hezekiah na u leele shɔ mu yili Assyria ŋunu Sennacherib na pe loŋgoolo hamblɛ pre kɛɛ. Nyiɛkpɔɔ na kɛ tɔ pe na kolo kro na. 23 Ŋga kra pan ma kre, leele tataara naa paan na sra woni Jerusalem na na o Tafun Nyiɛkpɔɔ wre kaan, mnaa Ŋunu Hezekiah kee yirɛ. Mu yire kre nyjila kre krɛrɛ waŋgrɛ yire leele naa Ŋunu Hezekiah kaan buuro kpɔɔ.
24 Kre nyjila kre chɔɔ nu Ŋunu Hezekiah na to yira nu, mna chaa ku. A wra o Tafun Nyiɛkpɔɔ wre tali, a wra loo u pan mna u nyina sɛmbɛɛrɛ kee na we saanla. 25 La, Ŋunu Hezekiah na uyɛ kpɔɔ, u nsra tia Nyiɛkpɔɔ kee ŋga wra pe mu u ŋga kre na u yiɛ nyi, a kra tia o Tafun Nyiɛkpɔɔ wre na wre Hezekiah na Jerusalem na Judah leele ndie tini. 26 Kra pan na Hezekiah na Jerusalem leele pre na peyɛ nyjii mna pe jawala chinɛ, a ki tia o Tafun Nyiɛkpɔɔ nsra pe ndie tini na, mna sɛ su na Ŋunu Hezekiah na ku.
27 Ŋunu Hezekiah na uyɛ ta titi, a kra tia ndro kro naa u kaan buuro. Wra nyinyi sin mna na swafiŋge, na swanyiɛ, na dnɛ chiɛnri wee, na tuwe ndiom tɛɛn, na ŋunɔ wiyirɛ, na u keshiɛn yirɛ kro teeri wa. 28 Wra nyinyi sin sin mna wraa shɔlɔ, na simi gbɔwo, na olive simi teeri. Mna ndru mu nui na mbaala na sikaala nagbɛɛ sin. 29 Yire yirɛ nyjɛ krɛrɛ kɔkro ni wra see chiɛ pɔ tataara mna ndru mu mbaala, na nui tataara ta mu ya, na yɛtaara yirɛ nyjɛ mu chin ŋga kro ni.
30 Ŋunu Hezekiah wra tia pra Gihon lɔɔ kre nyjeerihaa kre yurɔ, mna tia pra ki yiɛ kna mu le David kakpɔɔ kre na Jerusalem na. Yira ŋga wra pe kro na nyu mu u ŋga. 31 Ŋga Babylon loplombo na leele wɔ mu tun Ŋunu Hezekiah pan na pe sɛ u wie na, sɛmbɛɛrɛ kee nyi Nyiɛkpɔɔ u ŋga hin? Nyiɛkpɔɔ na tia Ŋunu Hezekiah wre titi na paara u jawala ni, a wra ki tɛɛ mu u pe mu le mbe u jawala chin.
32 Kee nyjɛ Ŋunu Hezekiah na pe u ŋunumu nyjila, na imi na wra Nyiɛkpɔɔ sumi kpra ni, Isaiah na yi nyunɔ mu le u hlɛ nu, a pra yi nyunɔ mu le Israel na Judah ŋulo fakee hlɛ yire nu. 33 Hezekiah na ku, a pra sɛ u le u tolɛɛ David nanae lehaa wa nyambie yire na. Ŋga wra ku kre, Jerusalem, na Judah leele pre kro na u kumu pe mna u le yɛnyiŋge. A u biblɔ Manasseh na u krɔ li, mna tni jɔɔn kre na.