Leele Pre Na Sɛɛnlɛ Sumindoe Yire Kla
31
Ŋga Klɛntro ble yire nyu na to kre, Israel leele mblɛ praa wa wa pre na sɛ Judah chiɛ yire na, mna sɛ dnɛ nyjɛ pe peerii wa yire kro gbun mu juari, mna sɛɛn chlɔ Asherah kɛɛn nyjɛ yiraa wa chiɛ yire na wa kro chile mu wo. Pra sɛɛnlɛ ndoe, na yi sragbuɛnlɛɛ nyjɛ yiraa wa nyambie lawee yire nu kro kla Judah, na Benjamin, na Ephraim, na Manasseh tra yire nu. Ŋga pra yi kla mu kɔ kre, a Israel leele pre na ndru mna sɛ pe chiɛ na.2 Ŋunu Hezekiah na srawɔfɛɛnlɛ pre, na Levi leele pre yɔɔlɛ fekofeko, mna pe tnumu nyjɛ pie na tuni yire le pe kɛɛ, mbe praa yurɛ sroo sra, na wejinyiŋge sra yire woni mbra o Tafun Nyiɛkpɔɔ wre kaan, a pre pie na leele pre le mbe praa mɛɛ koni o Tafun Nyiɛkpɔɔ wre tnihaa kre jlonwee nyu na wa, mbra u kaan mboo, na mɛɛ. 3 Ŋunu wre titi na yirɛ wɔ, a pra tɛɛ na bnimi, na yilakɔŋgɔ sra yire, na Wuuble, na nyiɛpɔ fɔŋgɔ sra yire woni, mnaa ble kpɔɛ lii imi na pra ki nyunɔ o Tafun Nyiɛkpɔɔ mbra yire nu kre. 4 Wra yo Jerusalem leele pre pan na praa paan mbra sɔfue, na Levi leele pre kaan sra yirɛ nyjɛ yi fna pe ta yire, imi kie pe mbe pe nyjila ta mbe Nyiɛkpɔɔ tnumu kre tun. 5 Ŋga mandiɛ kre na le Israel leele pre ndie kre, a leele pre na lam wɔ mna pe shɔlɔ jle, na simi fɔŋgɔ, na olive simi, na srɛ, na pe see yirɛ nyininyini kro yɛ wɔ. Pra yirɛ nyjɛ pra ta pe seele nu kre yɔɔlɛ kɛ kɛ, mna yi yɔm nunu wɔ, ki tia pra yirɛ ta tataara mu pan mu pe ŋga. 6 Israel na Judah leele mblɛ praa wa mu tni Judah chiɛ yire na pre kro na pe yurɛ mblɛ pe pɔɔri kro yɔɔlɛ kɛ kɛ, mna yi yɔm nununu wɔ, yire na yirɛ nyjɛ pra pe cheche mu o Tafun Nyiɛkpɔɔ ŋga yire ni, a pra pan mu yirɛ yire ble titɛɛ a yira gede. 7 Nyiɛpɔ taarɛwo kre nu leele pre na nɔɔ hle mnaa paan na pe yirɛ yire ni mna sɛ su nyiɛpɔ kɔɔnashin wo kre nu. 8 Ŋga Ŋunu Hezekiah na u loplombo pre na pan mna yirɛ yire nya na yi ble ble ma kre, a pra Nyiɛkpɔɔ ŋga mboo, mna dwan mu leele pre ŋga.
9 A Ŋunu Hezekiah na srawɔfɛɛnlɛ pre, na Levi leele pre wie na mni a yirɛ yire nɛɛ ma hin? 10 A srawɔfun lopom titi Azariah ŋmba wra yiri Zadok sele nu kre na kna mbo, “Mu yire ŋga pe nɔɔ hle na paan na pe kɛ nyu yirɛ ni o Tafun Nyiɛkpɔɔ Suminyuŋgo mna na o kaan, sro bɔ o na o na taa na lii, a yɛ na kro. Ŋgi na hin? O Tafun Nyiɛkpɔɔ wre u leele pre dwan, a ki tia sro bɔ o na.”
11 Ŋga kra pan ma kre, Ŋunu Hezekiah na tia pra sro tɛɛ nyinyi gbeele o Tafun Nyiɛkpɔɔ wre Suminyuŋgo wa. 12 Ŋga pra kɔ kre, a pra leele pre srayirɛ nyjɛ ni pra pan a yɛ na kro kre koli mna sɛ tɛɛ wa. A Ŋunu Hezekiah na srawɔfun lopom titi Azariah na Levi ndro Conaniah wɔ mna yirɛ yire le u kɛɛ, mna tia u chunu Shimei naa yaa u na. 13 Leele mblɛ pra wɔ a pre na pre naa tnumu tuni na lɛ, Jehiel, na Azaziah, na Nahath, na Asahel, na Jerimoth, na Jozabad, na Eliel, na Ismakiah, na Mahath, na Benaiah. Pre leele mblɛ krɛrɛ Ŋunu Hezekiah na srawɔfun lopom Azariah pra pe wɔ, a Conaniah, na u chunu Shimei naa pe le.
14 Imnah biblɔ Kore Levi ndro wre pra wɔ a wraa Suminyuŋgo kre jlonwee ŋga kraa wa na shie yila finhaa kre sri, a wre wraa leele pre titi chaara sra yirɛ yire le, mna na yirɛ nyjɛ ni leele pre naa paan na o Tafun Nyiɛkpɔɔ kaan yire yɔɔlɛ na leele pre kaan, yire na yirɛ nyjɛ praa woni na Nyiɛkpɔɔ kaan yire ni. 15 Levi leele mblɛ praa yaa Imnah na, a praa pe wolo srawɔfɛɛnlɛ pre kaan sro imi na pe fekofeko yire na nyi kakpɔɛ yire na pre na lɛ, Eden, na Miniamin, na Jeshua, na Shemaiah, na Amariah, na Shecaniah. 16 Pra sro yire yɔɔlɛ a bilɛ mblɛ pra li yɛlɛ fulo na kɛ mu na shie, a pra pe kee nyunɔ mu tɛɛ pre kro na ta. Pe mblɛ praa tnumu tuni Suminyuŋgo wa fekofeko pre krɛrɛ na ta. 17 Pra srawɔfɛɛnlɛ pre wɔ jlomu yire na a praa pe tnumu tuni, mna Levi leele mblɛ pra li yɛlɛ fulo na shie wɔ fekofeko ma na a praa pe tnumu tuni. 18 Pe biile fiɛnfiɛn, na pe chiɛlɛ, na pe bibilɛ, na pe bichiɛlɛ, na leele mblɛ pre na pre naa wa mu tni kro na chaa, ŋgi na hin? Na pe kro kpra li mu paala pe mu nɛɛrɛ laa peyɛ na, mbe jaa o Tafun Nyiɛkpɔɔ tnumu tun kpra ni. 19 Ŋunu Hezekiah na leele plɛ wɔ a praa srawɔfɛɛnlɛ na Levi leele mblɛ praa wa mu tni yurɛ kahɛɛ yire nu Judah tra nu kre kaan sro. La, pre srawɔfɛɛnlɛ pre fna mbe pe srawɔfun Aaron nanae, a Levi leele pre fna mbe pe mɛɛ chaa Levi sele leele mblɛ mɛɛ pe nyunɔ mu le hlɛ nu kre nu.