Ŋunu Hezekiah Na Klɛntro Ble Yire Li
30
Ŋunu Hezekiah na kɛ wa mna Israel, na Judah leele kro yeeri, mna hlɛ nyunɔ mna sɛ Ephraim jlom, na Manasseh jlom yire leele mblɛ pee wa na shie nyjeeri haa wa pre ŋga na pe kro pe pan mbe klɛntro ble yire li Jerusalem na o Tafun wre Suminyuŋgo wa. 2 Ŋunu wre na u loplombo, na chia kre leele kro na jawala ta na pie Klɛntro ble yire li nyiɛpɔ shiinwo kre nu. 3 Pe nsra ja mna ble yire li ki nyjila nu, ŋgi na hin? Na srawɔfɛɛnlɛ mblɛ pe paala pe mu nɛɛrɛ laa peyɛ na kre fiɛn, a na leele pre n sɛ fni Jerusalem na tun. 4 Jawala ŋga pra ta kre na nyu ŋunu wre na leele pre kro pan. 5 Ki tia pra kɛ wa mna Israel leele pre kro yeeri, mu yire Dan ŋga kii wa na shie nyjeeri haa wa kre na, mu sɛ su Beersheba ŋga kii wa na shie tapan haa kre na. Na pe kro pe pan mbe fni Jerusalem na, mbe Klɛntro ble kre li imi na Nyiɛkpɔɔ mbra yire nyina kre. Leele pre fna mbe nɛɛ mbe wɛ imi praa ki lii fa kre na.6 Ŋunu Hezekiah na u loplombo pre na leele wɔ mu tun Israel, na Judah trɛ yire nu kro, na hlɛ ni. Kee ŋga kraa wa hlɛ kre nu na yi kre mbo, “Yire Israel leele, ŋga e shɔ Assyria ŋunu kɛɛ ŋga, e ndru e pan o Tafun Nyiɛkpɔɔ wre pan, wre wi Abraham, na Isaac, na Jacob e tolɛɛlɛ pre Nyiɛkpɔɔ wre, mbe u yire mblɛ e kro kre shɔ. 7 Yaa shia eyɛ pe na e lɛɛlɛ, na e wolo pre lɛ, pre na ayɛte o Tafun Nyiɛkpɔɔ ŋmba na wi pe tolɛɛlɛ Nyiɛkpɔɔ wre na. Kee nyjɛ pe pe kre tia u yiɛ wɔ pe na, imi na e ki nyaa ŋga. 8 Yaa ti mbe e ndie kan na pre lɛ. E eyɛ nyjii e o Tafun Nyiɛkpɔɔ wre ŋga. E pan u pan u Suminyuŋgo ŋga u pe cheche Jerusalem na kre nu. E e Tafun Nyiɛkpɔɔ wre sumi imi kie pe mbe wa krɔ sisaa yii na e ni. 9 Na e ndru mu pan o Tafun Nyiɛkpɔɔ wre pan kre, we ti mbe e nyjɔɔlɔ, na e chinlɛ, na e biile pre loŋgoolo mblɛ pe pe yii kre pe fooro le, mbe pe wa, mbe pe ndru mbe pan tra ŋga nu, ŋgi na hin? E Tafun Nyiɛkpɔɔ wre pe lewo foorochinfun, na ndro dumifun. Na e ndru mu pan u pan, wa krɔ kna mbe wa e na.”
10 Bitumblɔ pre na sɛ na yire hlɛ yire ni Ephraim, na Manasseh chiɛ yire kro na, mna sɛ su Zebulun tra nu, la, leele pre naa pe pini na tɛɛ, na pe pe tɛɛlɛ. 11 La, leele plɛ na yiri Asher, na Manasseh, na Zebulun tra nu mna peyɛ nyjii, mna yiri mu sɛ Jerusalem na. 12 A Nyiɛkpɔɔ na ya Judah leele na, mna tia pra jawala nunu ta, mna yire o Tafun Nyiɛkpɔɔ kee na mna li kee ŋga ŋunu na u loplombo na yo kre na.
13 A leele tataara na sɛ fni Jerusalem na, mna ble kpɔɛ nyjɛ nu pe nsraa yiisi paanu kaa yire li nyiɛpɔ shiinwo kre nu. 14 Pra sɛɛnlɛ sragbuɛnlɛɛ, na tuwe ndiom tɛɛn sragbuɛnlɛɛ nyjɛ yiraa wa Jerusalem na yire kro koli mna sɛ yi wo Kidron landɛɛ kre nu.
15 Kena nyiɛpɔ shiinwo kre ble kɛmbɔjijirɛ na, pra Klɛntro ble mbɔɔ wre gbo. A kra tia nyifɛɛrɛ na Levi na srawɔfɛɛnlɛ pre plɛ gbo na pe n nɛɛrɛ laa peyɛ na, a kra tia pra sɛ paala pe mu nɛɛrɛ laa peyɛ na, mna pan na yurɛ sroo sra yurɛ ni mu sra wɔ mu o Tafun Nyiɛkpɔɔ wre ŋga Suminyuŋgo wa. 16 Ŋga kra pan ma kre, a pra chin mu ja mu le Suminyuŋgo wa mu sɛ tnumu nyjɛ pe fna mbe tun yire tun imi na Nyiɛkpɔɔ ndro Moses na ki nyunɔ mbra yire nu kre. A Levi leele pre na srawɔfɛɛnlɛ pre ŋga yurɛ pre nyimi yire a pra yi nyaara mu wo sragbunu kre na. 17 Ŋga leele pre tataara nsra paala pe mu nɛɛrɛ laa peyɛ na kre ndra na, pe nsra ja mbe klɛntro ble mbaala pre gbo, ki tia Levi leele pre praa pe kuu pe pan, mna yurɛ pre wru mu o Tafun Nyiɛkpɔɔ ŋga. 18 Leele tataara mblɛ pra yiri Ephraim, na Manasseh, na Issachar, na Zebulun jlom yire na pre plɛ nsra nɛɛrɛ laa peyɛ na, nde pra klɛntro ble mbaala pre kaara ka, kra mbra ŋga pra nyunɔ mu tɛɛ kre taan. La, Ŋunu Hezekiah na ki nya ma mna nyiɛtali mu pe ŋga mbo, 19 “O Tafun, o tolɛɛlɛ Nyiɛkpɔɔ foorochinfun, kii wa na leele mblɛ mu sumi loloŋgo nunu ni, nde pe n nɛɛrɛ laa peyɛ na paala kolo na, kena jande nyu pe na, mu pe sisam ti mu pe kɛ.” 20 O Tafun Nyiɛkpɔɔ wre na Hezekiah talaa kre loo, mna leele pre sisam ti mu pe kɛ.
21 Israel leele mblɛ pra fni Jerusalem na wa pre kro na ble kpɔɛ nyjɛ nu pe nsraa yiisi paanu kaa yire li ble kɔɔnashin, pra yɛshɔɔrɔ kpɔɔ li, a Levi leele pre, na srawɔfɛɛnlɛ pre naa mɛɛ koni na o Tafun Nyiɛkpɔɔ wre kaan. Ble nyini ŋga, praa o Tafun Nyiɛkpɔɔ mɛɛ kɔyirɛ yire teeri na mɛɛ gbuun na u kaan mɛɛ. 22 Ŋunu Hezekiah na paara mna Levi leele ŋga mboo, imi na pra lɛɛ wɔ mna yiɛklu leele ni, a praa o Tafun Nyiɛkpɔɔ wre sumi kre na. Ble kɔɔnashin yire nu krɛrɛ kre, pe yirɛ nyjɛ praa woni na pe kaan yire praa kaa, mna ndru na wejinyiŋge sra woni, na o Tafun pe tolɛɛlɛ Nyiɛkpɔɔ wre kaan mɛɛ.
23 Ŋga ble kɔɔnashin yire nyu na to kre, a pra ndru mu nyu nunu ta na pie ble kpɔɛ yire li ble kɔɔnashin nu na mbe ya. A pra ble kɔɔnashin tɛɛ mna ble kpɔɛ yire li na yɛshɔɔrɔ kpɔɔ ni mu ya. 24 A Ŋunu Hezekiah na pe ŋga nablɛm kagbeŋge, na mbaala na sikaala kagbenyi kɔɔnashin, a loplombo pre na pe ŋga nablɛm kagbeŋge, na mbaala na sikaala kagbenyi kɛ. Ki ble kre srawɔfɛɛnlɛ pre tataara na paala pe mna nɛɛrɛ laa peyɛ na. 25 Judah leele pre kro yiɛ na shɔ, pre na srawɔfɛɛnlɛ pre, na Levi leele pre, na Israel leele mblɛ pra yiri nyjeeri haa wa mu pan kre, na fumblɔ mblɛ pra yiri waŋgrɛ nu mu pan mu tni Judah tra na kro. 26 Ki ble kre yɛshɔɔrɔ kpɔɔ naa wa Jerusalem na, mu yire Ŋunu David biblɔ Solomon wre nyjila, kre yɛshɔɔrɔ ŋga ka n da mu pan Jerusalem na tun. 27 Srawɔfɛɛnlɛ pre, na Levi leele pre na yiri mu yire mna leele pre dwan, a o Tafun Nyiɛkpɔɔ na loo pe pan, ŋgi na hin? Pe talaa kro na da o Tafun Nyiɛkpɔɔ wre na, u tni haa cheche kre nu nyjeeri wa.