3 Ŋga pra u tɛɛ jɔɔn kre na, ki yɛlɛ kre nyiɛpɔ jlewo kre nu wra o Tafun Nyiɛkpɔɔ wre Suminyuŋgo kre krɔɛ yire nyaala, mna yi gbeele. 4 Wra srawɔfɛɛnlɛ pre, na Levi leele pre yeeri mna pan mu fni Suminyuŋgo kre lawee vankam ŋga kraa wa na shie yilafinhaa kre nu, 5 mna yo pe pan mbo, “Yire Levi leele pre e loo ni pan, e nɛɛrɛ laa eyɛ na paala kolo na fuŋgaami, e paala pe e o Tafun Nyiɛkpɔɔ Suminyuŋgo kre pe cheche. E yirɛ nyjɛ pe tɔ nɛɛrɛ ni yire kro wɔ e yili wa. 6 O tolɛɛlɛ pre plɛ na ayɛte, mna sisam kee pe o Tafun Nyiɛkpɔɔ wre na, mna u je. Pra yiɛ wɔ o Tafun Nyiɛkpɔɔ wre tnihaa kre na, mna krɔ kna mu wa u na. 7 Pra Suminyuŋgo kre krɔɛ yii mu tɔ, mu tia kaniɛ nyjɛ yii wa wa yire fii. Pe nsraa tuwe ndiom tɛɛn sroi wa na, a pe nsraa yurɛ sro sra yire woni na Israel Nyiɛkpɔɔ wre kaan na. 8 Ki tia o Tafun Nyiɛkpɔɔ wre krɔ na kun na Jerusalem, na Judah tra kro ni. A ki leele fo, mu pe yii fiɛrɛ na wra pe ndie tini. A yire titi ki nya. 9 Yire kee nyjɛ yira tia pra o tolɛɛlɛ pre gbo brɔfiɛn yiɛshiin ni ŋunɔ, mna pe bibilɛ, na pe bichiɛlɛ, na pe chiɛlɛ yii mu sɛ. 10 Fuŋgaami ni jawa na mi na o Tafun Israel Nyiɛkpɔɔ wre we nyu nunu pe, mbe ki ti u krɔ ŋga ki kun na o ni sisaa kre nyjii. 11 Kena ni wolo, yaa nyjila kla, ŋgi na hin? O Tafun Nyiɛkpɔɔ wre u e wɔ mbe e na sra woni mbra u kaan, mbra yiɛklu u leele pre pan mbe praa u sumi.”

12-14 Ŋga Hezekiah na paara mu kɔ kre, a Levi leele pre yɛkulo pre na yiri, a pe wolo pre na ya pe na na, pre na lɛ,

Amasai biblɔ Mahath, na Azariah biblɔ Joel, pre na yiri Kohath katoo. Mblɛ pra yiri Merari katoo na lɛ, Abdi biblɔ Kish, na Jehallelel biblɔ Azariah. Mblɛ pra yiri Gershon katoo na lɛ, Zimmah biblɔ Joah, na Joah biblɔ Eden. Mblɛ pra yiri Elizaphan katoo na lɛ, Jeiel na Shimri. Mblɛ pra yiri Asaph katoo na lɛ, Zechariah, na Mattaniah. Heman nanae na lɛ Jehiel, na Shimei. A Jeduthun nanae na lɛ, Shemaiah, na Uzziel.

15 Ŋga pra pe wolo pre fni, mna paala pe mu nɛɛrɛ laa pe na kre, a pra sɛ o Tafun Nyiɛkpɔɔ Suminyuŋgo kre pe cheche, imi na o Tafun Nyiɛkpɔɔ mbra yire nyina, imi ŋunu na yo pe pan kre. 16 Srawɔfɛɛnlɛ pre na sɛ le o Tafun Nyiɛkpɔɔ wre Suminyuŋgo wa mbe nɛɛrɛ laa ki na. Yirɛ nyjɛ pra nya o Tafun Nyiɛkpɔɔ wre Suminyuŋgo wa mna pe nɛɛrɛ yira kpan, pra ki wɔ mu pan mu tɛɛ lawee vankam kre nu. A Levi leele pre na yi wru mna sɛ yi wo Kidron landɛɛ kre nu, kakpɔɔ kre mbookrɔ. 17 Pra nɛɛrɛ laa paala yire nɔɔhle nyiɛpɔ jle wo kre ble nunu na. Ble kɔɔnatarɛ ni pra tɛɛ mu lawee vankam yire pe cheche, mna ble kɔɔnatarɛ tɛɛ mna Suminyuŋgo kre pe cheche. Kena kre nyiɛpɔ jlewo kre ble kɛmbɔkɔɔnanu wo na pra kɔ.

18 Ŋga pra kɔ kre, a pra sɛ Ŋunu Hezekiah bɔ mandiɛ mbo, “O nɛɛrɛ laa o Tafun Nyiɛkpɔɔ Suminyuŋgo kre na mu kɔ. Yurɛ sroo sragbunu kre, na tahɛɛ yire, na tebru nyjɛ na pie na paanu cheche yire taari kre, na ki yirɛ bɛɛlɛ yire kro o nɛɛrɛ laa yi na. 19 Yirɛ nyjɛ Ŋunu Ahaz na koli mu yili Suminyuŋgo wa, u ŋunumu nyjila, mna ayɛte Nyiɛkpɔɔ na kre kro, o nɛɛrɛ laa yi na, mu ndru mu pan mu yi tɛɛ sragbunu kre yiɛ wa.”

20 Ŋga nyiŋge na se bnimi kre, a Ŋunu Hezekiah na chia kre loplombo kro fni, a pe kro na sɛ o Tafun Nyiɛkpɔɔ Suminyuŋgo wa. 21 Pra nablɛm kɔɔnashin, na mbapilɛ kɔɔnashin, na mbapɔɛlɛɛ bilɛ kɔɔnashin, na kapilɛ kɔɔnashin tɛɛ mu leele pre na lebiile pre kro sisam sra wɔ, mna nɛɛrɛ laa Suminyuŋgo kre na. Ŋunu wre na yo srawɔfɛɛnlɛ mblɛ lɛ Aaron nanae pre pan na, pe sra kre wɔ o Tafun Nyiɛkpɔɔ sragbunu kre na. 22 A pra nablɛm pre gbo, a srawɔfɛɛnlɛ pre na pe nyimi wru mna yi nyaara sragbunu kre na, a pra chin mu mbapilɛ pre gbo, mna pe nyimi yire nyaara sragbunu kre na, mna chin mu mbapɔɛlɛɛ bilɛ pre gbo, mna pe nyimi yire nyaara mu wo sragbunu kre na. 23 Sikapilɛ mblɛ ni pie sisam sra wɔ kre, pra pan na pe ni ŋunu wre na leele pre yiɛ, a pra kɛnyi taa pe na tun, 24 a srawɔfɛɛnlɛ pre na chin mna pe gbo mna nyimi yire kna mu wo sragbunu kre na, kre yi sra ŋga kie Israel leele pre kro ndra lɔ, ŋgi na hin? Ŋunu wre na yo na pe yurɛ sroo sra kre, na sisam sra kre wɔ mbe Israel leele pre kro ŋga.

25 Ŋunu wre na taa kee nyjɛ o Tafun Nyiɛkpɔɔ na yire u Ŋunu David na keenyanyofun Gad na keenyanyofun Nathan na mna yo kre na, mna Levi leele pre tɛɛ o Tafun Nyiɛkpɔɔ Suminyuŋgo wa na pe yambrawa, na juru, na saŋgo ni kɛɛ. 26 Levi leele pre na peyɛ kna mna Ŋunu David mɛɛkɔyirɛ yire wru, a srawɔfɛɛnlɛ pre na pe bnɔɛ yii mu yire. 27 A Ŋunu Hezekiah na tia pra yurɛ sroo sra kre wɔ sragbunu kre na. Ŋga praa sra kre woni kre, na pee wa na mɛɛ koni, na bnɔɛ foo, Ŋunu David mɛɛkɔyirɛ yire ni. 28 A Leele pre kro naa lɛɛlɛ mna Nyiɛkpɔɔ sumi, a mɛkɔmblɔ pre naa mɛɛ koni, a bnɔ fɔfɛɛnlɛ pre naa pe bnɔɛ foo. Yire kee nyjɛ pra piin mna sɛ su na pra sra yire wɔ mu kɔ. 29 Ŋga pra sra kre wɔ mu kɔ kre, a ŋunu wre na u leele mblɛ praa wa u jaara kre na kosie kan tra mna o Tafun Nyiɛkpɔɔ wre sumi. 30 Ŋunu Hezekiah na u loplombo pre na tia Levi leele pre na Ŋunu David, na keenyanyofun Asaph mɛɛ nyjɛ pra nyunɔ mu tɛɛ yire kɔ mna o Tafun Nyiɛkpɔɔ wre ŋga mɛɛ. A leele pre kro na mɛɛ yire kɔ na yɛshɔɔrɔ kpɔɔ ni, mna kosie kan mna Nyiɛkpɔɔ sumi.

31 A Ŋunu Hezekiah na yo mbo, “Ŋga nɛɛrɛ laa e na fuŋga ŋga, rɛ, e pan e mboo ŋgaa sra wɔ o Tafun Nyiɛkpɔɔ wre Suminyuŋgo wa.” Ŋga kra pan ma kre, a leele pre kro na pan mna sra wɔ mu o Tafun Nyiɛkpɔɔ wre ŋga mboo, a pe mblɛ praa chaa, na pan mu yurɛ sroo sra wɔ. 32 Yurɛ mblɛ ni pra pan mu yurɛ sroo sra wɔ naa nablɛm fuloe taarɛ na kɛ, na mbapilɛ lafaa, na mbapɔɛlɛɛ bilɛ lafɛɛ shiin, a pra pe kro tɛɛ mna yurɛ sroo sra wɔ mna o Tafun Nyiɛkpɔɔ wre ŋga. 33 Pra nablɛm lafɛɛ kɔɔnanu, na mbaala kagbenyi taarɛ wɔ mna sra wɔ a leele pre na ka. 34 Srawɔfɛɛnlɛ pre nsra nɛɛ mbe jaa yurɛ sroo sra yurɛ pre ŋɔni, ki tia pe wolo Levi leele pre na ya pe na mna sɛ su na tnumu kre na kɔ. Kena kre kɔkro pra chin mna nɛɛrɛ laa srawɔfɛɛnlɛ pre plɛ na mu ya. Levi leele pre tataara na klu mna nɛɛrɛ laa peyɛ na mu wɛ srawɔfɛɛnlɛ pre na. Kre kra tia pra ja mna ya pe wolo pre na a pra yurɛ pre ŋɔni. 35 Yurɛ sroo sra tataara yire kɔkro kre, srawɔfɛɛnlɛ pre we yurɛ mblɛ ni pe sra wɔ pre nyina yire sro, mbe sra wɔ simɛɛlɛ yire kna mbe wo sragbunu kre na. Ŋga kra pan ma kre, pra ndru na o Tafun Nyiɛkpɔɔ sumi Suminyuŋgo wa na. 36 Ŋunu Hezekiah na leele pre kro yiɛ na shɔ, ŋgi na hin? Nyiɛkpɔɔ na ya pe na a pra ja mna yire kee yire pe nyaanyaa.