5 Kee nyjɛ wraa pini kre ndra na, o Tafun Nyiɛkpɔɔ wre na u wru mu le Syria ŋunu kɛɛ. Syria leele pre na pan mna wi wre na u leele ni mna pe ja, mna Judah leele pre tataara yii mna sɛ Damascus na. Kraa wa wa na, a o Tafun Nyiɛkpɔɔ wre na tia Israel ŋunu ŋmba praa yeeri Pekah, a u lɛ na wi Remaliah wre na pan mna wi na Judah ŋunu wre ni mna u leele pre tataara gbo. 6 Pekah na Judah ŋunɔwifɛɛnlɛ pre kagbeŋge lafaa na fulo gbo ble nunu na. Ŋgi na hin? Na Judah leele pre pe tolɛɛlɛ Nyiɛkpɔɔ wre je. 7 Ŋunɔ kre nu Ephraim ŋunɔwifun wa praa u yeeri Zicri na sɛ Ŋunu Ahaz biblɔ Maaseiah, na Azrikam ŋmba kɛɛ ŋunu katoo kre na nyi wre, na Elkanah ŋmba wraa jaŋga ni mu taa ŋunu na pre gbo.

8 Israel leele, na Judah leele pre kro leele nunu na lɛ, nde Israel leele pre na Judah leele pre chiɛlɛ, na pe biile kagbenyi lafɛɛ shiin yii tinlɛ, mna yirɛ tataara foolo mu sɛ pe chia Samaria na.

9 Kre nyjila kre o Tafun Nyiɛkpɔɔ keenyanyofun Oded ŋmba wraa wa Samaria na wa kre na yiri mna sɛ Israel wifɛɛnlɛ pre fni na pe ndru na paan, a wra yo pe pan mbo, “Ŋga e tolɛɛlɛ Nyiɛkpɔɔ wre krɔ kun na Judah leele ni kre ndra na, u kɛ laa pe na mu pe wru mu le e kɛɛ. La, e ndrashelee tɛɛ mu pe gbo titi, ki tia pe nyɛni, a ki le Nyiɛkpɔɔ ndie. 10 A fuŋgaami ŋga e chaa mbe Jerusalem, na Judah bilɛ na chiɛlɛ kro pe e tinlɛ. Kena e n chin na e pimi li na e sisam pe mu o Tafun Nyiɛkpɔɔ wre taan ra? 11 E loo ni pan, e ndru e sɛ na yire titi sele leele mblɛ e yii tinlɛ pre ni pe chia. Ŋgi na hin? O Tafun Nyiɛkpɔɔ wre krɔ kun na e ni titi.”

12 Bawa pra nyi to, a Israel loplombo pre jijirɛ na pan, pre na lɛ Azariah ŋmba lɛ na wi Jehohanan wre, na Meshillemoth biblɔ Berekiah, na Shallum biblɔ Jehizkiah, na Hadlai biblɔ Amasa, ŋga pra wifɛɛnlɛ mblɛ pe yiri ŋunɔ kre nu na paan kre fni kre, a pra taan pe na chichie, mna yo pe pan mbo, 13 “Yaa shia le na leele mblɛ e yii ŋga ni o pan chia, na kre ma oo pimi li o Tafun Nyiɛkpɔɔ wre yiɛ. E chaa mbe ka chaa ya o sisam na o pimi ŋga o li na ra? Wre Israel leele pimi li kpɔɔ Nyiɛkpɔɔ yiɛ fa, a ki tia u krɔ kun na o ni mu ya.” 14 A ŋunɔwifɛɛnlɛ pre na leele mblɛ pra yii pre wa loplombo pre na leele mblɛ pra fni wa pre yiɛ na wa, mna pe yirɛ nyjɛ pra koli ŋunɔ kre nu yire kro wru mu pe ŋga. 15 A loplombo jijirɛ pre na le Judah leele mblɛ pra yii tinlɛ pre yirɛ nu, mna yonyi wɔ mna pe mblɛ praa tro wejinwaara kre tɔ. Pra pe ŋga yonyi, na dodonyi, na kpawrɛ a pra le, mna pe ŋga nyumu na sro, mna tuwe le le pe klɛ nu. A pe mblɛ pra pe yiɛyiɛ kre, pra pe wru mu taa bubunlɔ na. A pra sɛ na pe ni Jericho na, kre chia kre praa yeeri Shuɛ Kakpɔɔ kre, mna sɛ pe wru mu le pe wolo kɛɛ, mna ndru mu sɛ Samaria na.

16 Nyjila ka nu Judah ŋunu Ahaz na leele tun Assyria ŋunu pan mbe u paan ya u na. 17 Na Edom leele pan mu pe tɔ na, mna pe plɛ yii mu sɛ. 18 A kre nyjila kre chɔɔ Philistine leele na pan mu chiɛ nyjɛ yii wa yila tohaa nyambie yire jaara, na shie Judah tapan haa yire tɔ. Chiɛ nyjɛ pra shɔ mu tni yire na yi Beth-Shemesh, na Aijalon, na Gederoth, na Soco, na Timnah, na Gimzo, na yi seechiɛ nyjɛ yira wa yi mbɛɛlɛ na yire kro. 19 O Tafun Nyiɛkpɔɔ wre na Judah leele pre pe fiɛn leele yiɛ na, ŋgi na hin? Ŋunu Ahaz na ndikana pe mna tia Judah leele pre naa sisam pini. 20 Ŋga Ahaz na kɛ wa mna Assyria ŋunu Tiglath-Pileser wre yeeri kre, wra pan, la, ŋga wra le na we paan ya u na kre, u nsra ya u na, kanyana nu wra pan mu u le mu ya. 21 Ŋunu Ahaz na sɛ o Tafun Nyiɛkpɔɔ Suminyuŋgo, na ŋunu katoo wa yirɛ yɛ wru, mna yɛ shɔ u loplombo pre pan mu ya, mna sɛ Assyria ŋunu wre ŋga, nde kre nsra tia wra ya u na.

22 A nde Ahaz kanyana nyjila nyjɛ krɛrɛ nu, wra je mnaa ndikana piin o Tafun Nyiɛkpɔɔ wre na na yaa. 23 Wraa sra woni na Damascus leele mblɛ pra pan mu pe tɔ pre sɛɛnlɛ kaan, ŋgi na hin? Wraa jawa na Syria sɛɛnlɛ yire yira ya pe na, a pra u ja. Kena na u sra wɔ mu yi ŋga, aada yie ya u na. Kre sisam kre nyini kuraa kra tia wra to, a kre kra tia pra Israel kla. 24 Ahaz na yirɛ nyjɛ yiraa wa Nyiɛkpɔɔ Suminyuŋgo wa yire kro koli mna sɛ yi gbun mu juari, mna krɔɛ yire yii mu tɔ, mna sɛɛnlɛ sragbuɛnlɛɛ sin sin Jerusalem lete, na ki kɔm lawee kro nu. 25 Judah chiɛ yire kro na, wra tia pra sɛɛnlɛ nyinyi sin sin, a wraa sra woni na sɛɛnlɛ yire kaan, mna tia u tolɛɛlɛ Nyiɛkpɔɔ wre krɔ na kun kpɔɔ. 26 Ŋunu Ahaz kee nyjɛ wra pe nyjila ŋga wra jɔɔn li mna sɛ su u kumu nyjila kre, pe yi nyunɔ mu le Judah, na Israel ŋulo fakee hlɛ nu. 27 Ŋunu Ahaz na ku, a pra u le Jerusalem kakpɔɔ kre na, la, pe nsra u le ŋulo lehaa wa. A u biblɔ Hezekiah na u krɔ li mna jɔɔn li.