Nyiɛkpɔɔ Na Uyɛ Wɔ Mna Solomon Nyina Na
9
Ŋga Ŋunu Solomon na o Tafun Nyiɛkpɔɔ Suminyuŋgo, na ŋunu katoo yire sin mu kɔ, mna yirɛ nyjɛ wraa chaa mbe pe yire kro pe mu kɔ kre, 2 o Tafun Nyiɛkpɔɔ na ndru mu uyɛ wɔ mu u nyina ŋunɛ nu gbee shiinwo na, imi na wra uyɛ wɔ mna u nyina Gibeon na kre. 3 O Tafun Nyiɛkpɔɔ wre na yo u pan mbo, “Ni mu nyiɛtalaa, na kee ŋga mu yo ni pe kre loo. Ni Suminyuŋgo ŋga mu sin mbe ni Mɛɛ tni wa nyjila kro nu kre pe cheche. Ni yiɛ we pe ki na, a ni loloŋgo wa laa ki na fio. 4 Na mu fraka mbe ni sumi na kpra ni, imi na mu lɛ David na pe kre, mbe li ni mbra, na ni kee nyjɛ ni yo mu pan yire na wala, 5 kena mbe ti mbe mu ŋunumu lie yire gbiŋmbi Israel tra nu nyjila kro nu, imi na ndaa ki yo mu lɛ David pan na, ‘Nyjila kro nu ma ndro cha mbe la ŋmba we ŋunumu li Israel leele na.’ 6 La, na ŋu, ndee mu nanae waa laa ni na, a pe nsra li ni mbra, na ni kee nyjɛ ni yo mu pan yire na, maa sɛ sɛɛnlɛ sumi kre, 7 kena mbe Israel leele kɔ mbe yili tra ŋga ndaa pe ŋga kre nu, mbe Suminyuŋgo ŋga ni pe cheche mbe ni Mɛɛ tni wa kre je. Mbe leele kro we na Israel leele le fiɛn, mbra pe pini mbra tɛɛ. 8 Kre Suminyuŋgo ŋga we kaari mbokuɛn, a leele mblɛ pie na tro kro we ki nya, mbe ki pe fo, mbe praa yuu mbo, ‘Yira ŋgi ki tia pe Tafun Nyiɛkpɔɔ kre kee ŋga nyini pe u tra, na u Suminyuŋgo na ma ŋga hin?’ 9 Mbe plɛ na yuu mbo, ‘Ŋga pe pe Tafun Nyiɛkpɔɔ ŋmba wra pe tolɛɛlɛ wɔ mu yili Egypt tra nu wre je, mu sɛ sɛɛnlɛ yii kɛshiin na yi sumi, kre ki tia pe Tafun Nyiɛkpɔɔ wre tia yire kee nyjɛ pe da kre.’”Solomon Yirɛ Hɛnyi Nyjɛ Wra Pe
10 Yɛlɛ fulo ni Solomon na tɛɛ mna Suminyuŋgo kre, na ŋunu katoo yire sin. 11 Tyre ŋunu ŋmba praa yeeri Hiram wre wra Solomon ŋga cedar, na kɛɛn nyjɛ yira u shian kro, mna ndru mu u ŋga swanyiɛ ŋga wra shian mbe tɛɛ mbe tnumu kre kro tun. Ŋga wra tnumu kre kro tun mu kɔ kre, a Ŋunu Solomon na Ŋunu Hiram ŋga chiɛ fulo Galilee tra nu. 12 Ŋunu Hiram na sɛ yire chiɛ fulo yire lehaa. Ŋga wra sɛ yi nya kre, u yiɛ nsra shɔ yi na. 13 Ki tia wra yo Ŋunu Solomon pan mbo, “Awe, kena yire chiɛ nyjɛ nyini mu ni ŋgaa?” Ki tia pra tra kre ŋga mɛɛ Cabul, hali mu pan mu su aŋga na pan pe ki yeeri.a 14 Na Ŋunu Hiram tia pe sɛ Ŋunu Solomon ŋga swanyiɛ bribri ŋga snamu ki da kradnɛ kagbenyi kɔɔnanyjirɛ.
15 Ŋunu Solomon na tnumu tunfɛɛnlɛ wru jaŋga na mna pe tɛɛ mu Suminyuŋgo kre, na ŋunu katoo kre sin. Mna lawee yɛ sin mna yi yurɔ tra ni na shie Jerusalem yila finhaa, a yira pe mbrɛrɛ, mna tia pra Jerusalem mboo kre, na kakpɔɛ nyjɛ praa yeeri Hazor, na Megiddo, na Gezer yire sin na. 16 Egypt ŋunu Pharaoh na da mu sɛ wi na Gezer leele ni mna pe gbo, mna kanhun le chia kre na, mna Canaan leele mblɛ praa wa wa pre gbo peii, mna tra kre wru mna u bichlɔ ŋmba Ŋunu Solomon na leŋge wre ŋga, na u bijam yira ŋga wra u kɛ yi. 17 Ŋunu Solomon na ndru mna chiɛ yire yɛ gbeele mu sin na. Wra u tnumutunfɛɛnlɛ pre tɛɛ mna Beth-Horon tapan wo kre sin, 18 kre na Baalath, na Tadmor ŋga kraa wa Judah tablɔ tra nu kre. 19 Na kakpɔɛ nyjɛ na wraa u yirɛ teeri, na kabɛɛlɛ nyjɛ na wraa u sookɛɛ, na u soolo teeri. Lawee nyjɛ wraa chaa mbe sin Jerusalem na, na Lebanon na, na tra ŋga wra ta kre nu kro, wra yi sin.
20 Amora, na Hittite, na Perizzite, na Hivite, na Jebusite, leele mblɛ pra kro a Israel leele pre nsra pe gbo nyjila ŋga pra wi na pe ni mna tra kre shɔ kre, 21 pe mblɛ pra kro wa pre, pre Solomon na yii jaŋga na, a pra yire lawee yire sin sin, hali pe nanae wa mu pe tinlɛ wa tɛ. 22 La, Solomon nsra Israel leele pre wa pe tnu, pre na lɛ u ŋunɔwifɛɛnlɛ, a pe plɛ wra wɔ abani loplombo, na u loplombo, na u ŋunɔwifɛɛnlɛ loplombo, na u sookɛɛ lefɛɛnlɛ, na sookɛɛ nduufɛɛnlɛ.
23 Solomon nyinyi yire wraa siin na tnumutunfɛɛnlɛ pre ni jaŋga na kre, loplombo lafɛɛ kunɔ na fuloe shiin na kɛ praa tnumu tunfɛɛnlɛ pre le.
24 Ŋga Pharaoh bichlɔ wre na yiri David chia kre na mna sɛ tni ŋunu katoo ŋga Solomon na sin mu u ŋga kre nu kre, Solomon na tia pra Jerusalem lawee ŋga kraa wa na shie yila finhaa kre sin, mna ki yurɔ tra ni a kra pe mbrɛrɛ.
25 Yɛlɛ nyini kpan, Solomon naa yurɛ sroo sra, na wejinyiŋge sra woni sragbunu ŋga wra sin kre na gbee taarɛ, na o Tafun Nyiɛkpɔɔ kaan. Wraa tuwe ndiom tɛɛn sroi na yaa. Pan kra nyina na ki fna u pe Suminyuŋgo wa.b
26 Ŋunu Solomon na krɔɛ badɛnyi nyjɛ yi tro epo yiɛ na yire yɛ pe chia ŋga praa yeeri Ezion-Geber kre na. Chia kre naa wa mu mbra Elath ŋga kraa wa Edom tra nu kre na, a kraa wa epo nyiɛ kre nyu na. 27 A Ŋunu Hiram na u sumifɛɛnlɛ mblɛ pra krɔɛ kpɔɛ ŋmaa mu chin wɔ a pra sɛ ya Solomon leele pre na. 28 Pra krɔɛ yire ŋmaa mna sɛ Ophir tra nu mna sɛ pan na swanyiɛ ŋga snamu kra da kradnɛ kagbenyi fulo na kɛmbɔshiin ni mna pan mna Ŋunu Solomon ŋga.