Solomon Na Suminyuŋgo Kre Sin
6
Ŋga Israel leele pre na yili Egypt tra nu kre, ki yɛlɛ lafɛɛ jijirɛ na fuloe jijirɛ nyu na Ŋunu Solomon na jɔɔn li Israel leelee na yɛlɛ jijirɛ. A nyiɛpɔ shiinwo ŋga praa yeeri Ziv kre nu wra nɔɔhle mnaa o Tafun Nyiɛkpɔɔ Suminyuŋgo kre siin. 2 Suminyuŋgo ŋga Ŋunu Solomon na sin mu o Tafun Nyiɛkpɔɔ ŋga kre titnɔmu naa fiiti fuloe jijirɛ na kɛ, a ki valam naa fiiti fulo na kɛ, a ki gedem naa fiiti fuloe shiin na kunɔ. 3 Suminyuŋgo bamba kre titnɔmu na da fiiti kɛmbɔkunɔ, a ki valam kre naa fiiti fulo na kɛ, pan kra da na nyuŋgo titi kre ni. 4 Suminyuŋgo kre naa wa na vromboe ni. Pra yi pe a yira vala lam mu wɛ fimi haa na. 5 Pra lawee ka sin vankam mu nyuŋgo titi kre fɛ mu kun, mna nyinyi bɛɛlɛ wɔ yi nu. 6 Yire nyinyi bɛɛlɛ yire, pra yi sin mu taala taarɛ. Tapan wo kre valam naa fiiti kɔɔnashin na yɔɔ, a ŋga kra taa shiin kre valam naa fiiti kɔɔnanyjirɛ, a nyjeeri wo kre valam naa fiiti kɛ na yɔɔ. Yire nyinyi bɛɛlɛ yire pra sin kre, pra kɛɛn wa mu taa yi ndra na, mna pan mu yi taa suminyuŋgo titi kre ndra na, pe nsra yi le nyuŋgo kre mboo kre nu.7 Dnɛ nyjɛ pra tɛ dnɛ tɛ lawee wa kre chiin ni pra tɛɛ mu Suminyuŋgo kre sin. Ki tia pe nsra tɔɔnrɔ yira koori wo, ndee mu tɔɔnrɔ yira kun wo, ndee mna yira ka na ki nyini tɛɛ mu yira koori Suminyuŋgo kre lawee, nyjila ŋga ni praa ki siin kre. 8 Nyinyi bɛɛlɛ yire tapan wo kre jlonwee naa wa na shie tapan haa. Bawa mu yire mbe le ki nu, mbe nduu ki taan nduuhaa na mbe chiin sɛ nyuŋgo lalaa wo kre nu, mbe yire shiinwo kre lam, mbe nduu mbe sɛ taarɛwo kre nu. 9 Ŋunu Solomon na Suminyuŋgo kre sin mu kɔ, mna cedar kɛɛn tɛɛ mu ki ndra tɔ. 10 Nyinyi bɛɛlɛ yire yiraa wa mu fɛ mu suminyuŋgo titi kre kun kre, yi kro gedem na yila. Yiraa fiiti kɔɔnashin na yɔɔ. A pra cedar kɛɛn wa mu yire nyinyi bɛɛlɛ yire ndra na mu sɛ taa Suminyuŋgo kre jenu na.
11 O Tafun Nyiɛkpɔɔ na yo Ŋunu Solomon pan mbo, 12 “Kii wa na mu Suminyuŋgo siin mbe ni ŋga, la, na mu li ni mbra yire, na kee nyjɛ mbe yo mu pan kro na kre, kena mbe yire mu na mbe kee nyjɛ nyu ndaa yo mu lɛ David pan yire kro pe. 13 A mbe tni ni leele Israel leele pre nu, a mba kɛ laa pe na fio.”
Nyiɛkpɔɔ Suminyuŋgo Lam Kre Kɔ
14 Solomon na Suminyuŋgo kre sin mu kɔ peii. 15 Wra Suminyuŋgo kre lam mboo mbɛɛ yire tɔ na cedar kɛɛn ni, mu yire ki nɔɔ na, mu sɛ su ki ndra na. Ki tra lam kre chɔɔ, kɛɛn ni wra tɛɛ mu ki tɔ. 16 Suminyuŋgo kre, cedar kɛɛn ni pra tɛɛ mna ki yɔ, mu yire nyjeeri mu pan mu su tra. Lam wo kre praa yeeri Cheche Ndoo Titi. Ki valam na ki titnɔmu yire na yila, yiraa fiiti fulo na kɛ kɛ. 17 Nyuŋgo kpɔɔ ŋga kraa wa Cheche Ndoo Titi kre yiɛ kre titnɔmu naa fiiti fuloe taarɛ. 18 Suminyuŋgo kre, cedar kɛɛn ni pra tɛɛ mu ki lam mboo mbɛɛ yire kro san, mna toto na lagɔnyi pe mboo mbɛɛ kɛɛn yire na. Kena na mu le nyuŋgo kre lam, ma na dnɛ nyjɛ ni pe ki sin yire nyaa, na cedar kɛɛn yire bɔkɔ. 19 Cheche Ndoo Titi kre, pra ki pe mna o Tafun Nyiɛkpɔɔ Nyu Nunu Daka kre tɛɛ wa. 20 Cheche Ndoo Titi kre titnɔŋɔ naa fiiti fulo na kɛ, a ki valam naa fiiti fulo na kɛ, a ki gedem naa fiiti fulo na kɛ. Pra swanyiɛ nya mu wo ki lam yirɛ yire kro na. A sragbunu ŋga kraa wa wa kre, cedar kɛɛn ni pra ki pe, mna swanyiɛ nya mu wo ki na poŋgo. 21 Ŋunu Solomon na swanyiɛ nya mu wo Suminyuŋgo kre lam kro nu, mna swanyiɛ jlɔnyi pe mu yi paari Cheche Ndoo Titi kre nyu na, mna swanyiɛ nya mu wo jlonwee nyu kre na. 22 Kena Suminyuŋgo kre lam kro na pe swanyiɛ poŋgo, kre na Cheche Ndoo Titi sragbunu kre kro.
23 Wra olive tiŋge kɛɛn tɛɛ mu Cherubim shiin pe mu tɛɛ Cheche Ndoo Titi wa. Pe kro gedem na yila, praa fiiti kɛmbɔkunɔ kunɔ. 24 Cherubim pre kuɛn titnɔmu naa fiiti kɔɔnashin na yɔɔ. Kena mu yire nunu ŋmba kuan na mu sɛ su ŋmbaa kuan na kre, yi titnɔmu naa fiiti kɛmbɔkunɔ. 25 Cherubim pre kumu, na pe kpɔɔrɔm na yila. 26 Cherubim pre kro gedem naa fiiti kɛmbɔkunɔ kunɔ. 27 A wra Cherubim pre tɛɛ Cheche Ndoo Titi kre nu, a pra pe kuɛn nyaa a yira su yi yɛ na, a ŋmba kuan nunu sɛ su mboo na, a ŋmba wo sɛ su mboo na. 28 A wra swanyiɛ nya mu wo Cherubim pre na.
29 Suminyuŋgo kre, na Cheche Ndoo Titi kre mboe yire kro, wra Cherubim, na shuɛ tinyi, na toto tɛ tɛ yi na. 30 A nyinyi yire kro shiin, tra lam yire kro, wra swanyiɛ nya mu wo yi na.
31 Cheche Ndoo Titi kre, olive tiŋge kɛɛn ni wra tɛɛ mu ki krɔɛ jeelee na yi bie tɛ. Krɔɛ yire jeelee yire jeŋgle naa kunɔ kunɔ. 32 A wra krɔɛ bie yire le yi na, a praa yi nyaari kokoo shiin. Mna shuɛ tinyi, na toto, na Cherubim tɛ tɛ yi na, mna swanyiɛ nya mu wo yi na. 33 Pan chɔɔ wra olive tiŋge kaan tɛɛ mna nyuŋgo jlewo kre jlonwee nyu krɔ jeelee tɛ, a yi jeŋgle yire naa jinyjirɛnyjirɛ, a yi valam na yi gedem na yila. 34 Wra pine tiŋge kaan tɛɛ mna ki krɔɛ bie shiin tɛ a praa yi nyaari kokoo shiin. Pie krɔɛ bie shiin kan mbe mbra kokoo nunu na, mbe chiin yi nyaa. 35 A wra Cherubim, na shuɛ tinyi, na toto tɛ krɔɛ bie yire na, mna swanyiɛ nya mu wo yi na. 36 Wra dnɛ tɛ mna yi sin mu taala taarɛ, mna tɛɛ mu kagbala kpɔɔ kre buŋgo sin mu fɛ mu kun, mna cedar kɛɛn tɛ mu taa buŋgo kre ndra na.