5 Solomon, ŋu titi chin kee ŋga Zeruiah biblɔ Joab na pe ni na. Imi na wra Ner pɔ Abner, na Jether pɔ Amasa Israel ŋunɔwifɛɛnlɛ loplombo shiin pre gbo. Wra pe gbo na u u loŋgoolo ta ŋunɔ, la, ki nyjila kre na wejinyiŋge nyjila yi. Wra pe gbo finfin, ki tia u pimi li, kena nyjila da mbe mu fɔlɔ tɔ u na. 6 Ŋu na wre e ki li kachindɛ kolo na, la, maa shia u ti mbe u nyjofinyi ta, mbe u tolɛɛlɛ kɔŋgɔ ni kuulo na wejinyiŋge ni. 7 La, Barzillai ŋmba u yiri Gilead na wre biile pre rɛ, nyu pe na. Ti mbe pe chaa leele mblɛ ŋu na pre we na chaa mbra lii pre nu. Ŋgi na hin? Nyjila ŋga ni Absalom naa ni chaa, a ndaa fɛ kre, pre pra nyu ni na.

8 Solomon, sɔɔnri na Gera pɔ ŋmba pe yeeri Shimei, a u pe Benjamin ndro, a u yiri Bahurim na wree wa mu ya mu na. Ŋga ble ndaa sɛ Mahanaim na kre, wra ni sun lamsusrom suŋgɔ. La, ŋga wra ndru mu ni fni Jordan lɔɔ kre lawee kre, ndaa o Tafun Nyiɛkpɔɔ wre mɛɛ tɛɛ mu da mu u ŋga na mba u gbo. 9 La, ni yuu mu pan na maa shia u ti. Ŋga kachiŋu wi ŋu ŋga, mu chin kolo ŋga na mu tro na u ni, le na mu ti mbe u ku nyimi nu.”

10 Ŋga Ŋunu David na paara mu kɔ to, mna fii, a pra sɛ u le Jerusalem na. 11 David na ŋunumu li yɛlɛ fuloe shiin Israel leele na. Wra tni chia ŋga praa yeeri Hebron kre na mna ŋunumu li wa yɛlɛ kɔɔnashin, mna ŋunumu li Jerusalem na yɛlɛ fulo na kɛmbɔtaarɛ. 12 Ŋga kra pan ma kre, Solomon na tni u lɛ David ŋujɔɔn kre na, a u ŋunumu kre na yire titi.

13 Ki ble ka Haggith pɔ Adonijah na yiri mna sɛ Solomon lo Bathsheba da, a Bathsheba na u wie mbo, “A ki tna woo?” A Adonijah na kna mbo, “Ɛnhɛɛn, wejinyiŋge kee yi.” 14 A wra kna mbo, “Kala ka ni paan mbe yo mu pan.” A chlɔ wre na kna mbo, “Ki yo ni pan, ni ndru.” 15 A Adonijah na kna mbo, “Ŋu titi chin na ŋunumu kre ni wo yi, a mi Israel leele kro le mbe ni pe pe ŋunu. La, ki kɔ mu kna, a Solomon sɛ ki li, ni chin na o Tafun Nyiɛkpɔɔ u u ŋga jɔɔn kre. 16 Fuŋgaami ŋga, nii wa kee nunu ka ni mbe mu tali, maashia je ni pan.” A chlɔ wre na kna mbo, “Kee kre yo ni pan.” 17 A Adonijah na kna mbo, “Jande yo Ŋunu Solomon pan mbe waa shia je mu pan kee ŋga na. Ni chaa mbe u ni ŋga Abishag Shunem ndro wre mbe ni leŋge.” 18 A Bathsheba na kna mbo, “Ni loo, mbe sɛ paara na Ŋunu Solomon ni mu pan.” 19 A Bathsheba na sɛ Ŋunu Solomon pan mbe sɛ Adonijah kee kre yo u pan. Ŋga ŋunu na u nya kre, a wra taan mu yiri mna pan mu u fni, mna kosie kan u yiɛ, mna yiri mu sɛ tni u ŋujɔɔn na. A ŋunu na tia pra sɛ pan na ŋujɔɔn ka ni mna pan mu tɛɛ u lo pan, a wra tni u kalie kɛ. 20 A u lo wre na kna mbo, “Kala fiɛn ka ni paan mbe mu tali, jande maa shia ki je.” A Ŋunu Solomon na kna mbo, “Maa, ki yo ni pan, mba ki je.” 21 A u lo wre na kna mbo, “Ti mbe Shunem ndro Abishag mu nyjɔ Adonijah leŋge.” 22 A Ŋunu Solomon na kna mu u lo wie mbo, “Yira ŋgi ki tia mna Shunem ndro Abishag tali mbe Adonijah ŋga mbe u leŋge hin? Kena ni ŋunumu kre tali mu ya u pan na hin. Ni chin na ni nyjɔ wi. Maa ki tali mbe wre chiin ŋga, la, ki tali mu srawɔfun Abiathar, na Zeruiah pɔ Joab wre ŋga na.” 23 A Ŋunu Solomon na o Tafun Nyiɛkpɔɔ wre da mbo, “Nyiɛkpɔɔ u ni ndie tini kpɔɔ, na ni nsra Adonijah gbo aŋga, kee ŋga u ni wie ŋga ndra na. 24 Ŋga o Tafun Nyiɛkpɔɔ wre u ni tɛɛ ni lɛ David ŋujɔɔn na, imi na wra ki yo na ni katoo leele pie na Israel jɔɔn lii kre, ki tia ŋga o Tafun Nyiɛkpɔɔ wa ŋga, Adonijah wa u ndra ta aŋga.” 25 A Ŋunu Solomon na Jehoiada pɔ Benaiah yeeri mna paara u pan, mna tia wra sɛ Adonijah gbo.

26 Ŋunu Solomon na yo srawɔfun Abiathar pan mbo, “Sɛ tni mu katoo Anathoth na. Mu fna mbe ndaa mu gbo, la, mba mu gbo fuŋgaami, ŋgi na hin? Mna o Tafun Nyiɛkpɔɔ Jaŋgafun wre Nyu Nunu Daka kre tio mna yiɛklu ni lɛ David pan, a ŋu na wre na kanyana nunu nya.” 27 Solomon na Abiathar wɔ o Tafun Nyiɛkpɔɔ srawɔɔ tnumu kre nu, a kra tia o Tafun Nyiɛkpɔɔ kee ŋga wra yo Shilo na mu wru Eli katoo leele haa kre na pe kpra.

28 Nyjila ŋga ni Absalom naa ŋunumu chaa mbe li kre, Joab nsra ya u na, la, wra kɔ mna yire Adonijah kro. Ki tia ŋga Joab na Adonijah kumu loo kre, a wra fɛ mna sɛ le o Tafun Nyiɛkpɔɔ yoŋgo nyuŋgo kre nu, mna sɛ sragbunu kre nyamblɛ yire yii mbe pia u gbo. 29 A pra sɛ bɔ Ŋunu Solomon pan na Joab fɛ mu sɛ le o Tafun Nyiɛkpɔɔ yoŋgo nyuŋgo wa mu yire sragbunu kre jaara. A Solomon na yo Jehoiada pɔ Benaiah wre pan mbo, “Sɛ u gbo.” 30 A Benaiah na sɛ le o Tafun Nyiɛkpɔɔ yoŋgo nyuŋgo kre nu mna yo Joab pan mbo, “Yili mu pan fimi na.” A Joab na kna mbo, “Ɔɔhɔn, mna ni chaa mbe ku.” A Benaiah na ndru mna sɛ mandiɛ bɔ ŋunu pan mbo, “Kee ŋga Joab yo ni pan yi kre.” 31 A ŋunu na yo Benaiah pan mbo, “U pe imi na u yo kre. Sɛ u gbo, mu u wru mu sɛ le. Kena mi na ni lɛ katoo leele wa Joab leele mblɛ wra gbo finfin pre pimi li. 32 O Tafun Nyiɛkpɔɔ we u fɔlɔ tɔ leele mblɛ wra gbo finfin kre ndra na. Ŋgi na hin? U nsra ni lɛ David bɔ mandiɛ, mna sɛ leele shiin plɛ tɔ mna pe gbo brɔfiɛn yiɛshiin ni. Pre leele shiin pre na lɛ Ner pɔ Abner, a wra pe Israel leele ŋunɔwifun lopom. Na Jether pɔ Amasa, wre na pe Judah leele ŋunɔwifun lopom. Pre leele shiin mblɛ na pe leele chichiele mna fraka mu wɛ u na. 33 Pre leele mblɛ kumu hakɛ ki Joab na u nanae yii nyjila kro nu. La, David na u nanae mblɛ pie jɔɔn li pre rɛ, o Tafun Nyiɛkpɔɔ u pe ŋga wejinyiŋge nyjila kro nu.” 34 A Jehoiada pɔ Benaiah wre na sɛ Joab gbo, a pra u wru mna sɛ le wre titi tra nu nyaa lam. 35 Ŋunu Solomon na Jehoiada pɔ Benaiah pe ŋunɔwifɛɛnlɛ pre lopom, a wra tni Joab titɛɛ, mna tia Zadok na tni srawɔfun Abiathar titɛɛ.

36 Ŋunu Solomon na ndro tun Shimei pan mbo, “Katoo sin Jerusalem na mu tni ki nu, maa shia yili chia kre na mbe sɛ haka. 37 Ŋga ble mu yili mbe Kidron lafolo kun to, mu chin na mu kumu ble yi, a na ki waa pan ma, kena ŋu mu mu kumu cha.” 38 A Shimei na kna mu yo Ŋunu Solomon pan mbo, “Tolɛɛ, kee ŋga mu yo kre nyu. Ni tafun, kee ŋga mu yo kre, mu sumifun we ki pe.” Ki tia Shimei na kro Jerusalem na nyjila tataara.

39 La, yɛlɛ taarɛ kɔkro kre, Shimei tinlɛ shiin na fɛ mna sɛ Maacah pɔ Achish ŋmba na wi Gath ŋunu wre pan. A pra sɛ yo Shimei pan mbo, “Mu tinlɛ pre fɛ mu sɛ Gath na.” 40 Ŋga wra ki loo ma kre, a wra yiri mna sɛ u bubnɔ san, mna wru mu sɛ Achish pan Gath na, u tinlɛ pre cha haa. Shimei na sɛ u tinlɛ pre yii Gath na mna ndru mu pan na pe ni. 41 Ŋga Solomon na loo na Shimei yili Jerusalem na mu sɛ Gath na mu ndru mu pan kre, 42 ŋunu na tia pra Shimei yeeri mu u ŋga, a wra yo u pan mbo, “Ni nsra tia mna da o Tafun Nyiɛkpɔɔ mɛɛ ni, a ndaa mu jaari na, ‘Ŋga ble mu yili mbe sɛ haka kpan, kena mu kumu ble yi kree?’ A ki ble kre mna yo ni pan na, ‘Tolɛɛ, kala ŋga mu yo kre nyu, mbe li ki na.’ 43 Yira ŋgi ki tia mu n li o Tafun Nyiɛkpɔɔ wre daŋga, na kee ŋga ndaa yo mu pan kre na hin?” 44 A Ŋunu Solomon na ndru mu kna mu yo Shimei pan mbo, “Ŋu titi chin mu loloŋgo nu kee fuɛn nyjɛ mna pe ni lɛ David na. Fuŋga ki da mbe o Tafun Nyiɛkpɔɔ wre mu sisam nyjɛ mna pe yire fɔlɔ tɔ. 45 La, mi Ŋunu Solomon rɛ, Nyiɛkpɔɔ we ni dwan, mbe kɛ tɔ David ŋujɔɔn kre na nyjila kro nu.” 46 A ŋunu na tia Jehoiada pɔ Benaiah na sɛ Shimei gbo.

Ŋga kra pan ma kre, Solomon ŋunumu lie kre na yire u kɛɛ.