Yirɛ Nyjɛ Leele Pre Na Wɔ//A Pra Suminyuŋgo Kre Sin
29
A ŋunu David na yo leele mblɛ pra fni wa pre kro pan mbo, “Ni pɔ Solomon ŋmba Nyiɛkpɔɔ wɔ mu e ŋga ŋga, u n lɛ, a u n chin kpɔɔ. A tnumu kre kpɔɔ, ŋgi na hin? Nyuŋgo waara ka ma we sin, Nyiɛkpɔɔ wre titi Suminyuŋgo yi. 2 Kre ki tia, ni gbeŋmba mu yirɛ nyjɛ ni ki fna mbe ki sin kro cha, ni swanyiɛ, na swafiŋge, na swafre, na tɔɔnrɔ, na kɛɛn, na dnɛ chichiele nyjɛ yi chiɛnri kro cha mu tɛɛ tataara.3 Ŋga ni yire krɛrɛ cha mu kɔ kre, a ni nyu yo na mbe mi titi swanyiɛ, na swafiŋge wɔ, mbe pe yi tɛɛ mbe Nyiɛkpɔɔ Suminyuŋgo kre sin, ŋgi na hin? Ki keshian wa ni na. 4 Swanyiɛ ŋga ndaa wɔ kre na da tons lafaa, a swafiŋge kre snam na da tons lafɛɛ shiin na fuloe shiin, mbe pe yi nya mbe tɛɛ mbe Suminyuŋgo kre mboo mbɛɛlɛ san, 5 mbe yi ka tɛɛ mbe Suminyuŋgo kre yirɛ bɛɛlɛ pe. Kena ndro ŋmbi u chaa mbe lɛɛ wɔ mbe yaka wɔ mbe o Tafun Nyiɛkpɔɔ wre ŋga hin?”
6 Ŋga ŋunu David na paara a u nyu na to kre, a jlom loplombo pre, na pe katoo loplombo pre, na ŋunɔwifɛɛnlɛ loplombo pre, na ŋunu loplombo pre na yiri mna yirɛ nyjɛ yii wa pe pan wɔ mna Nyiɛkpɔɔ ŋga. 7 Yirɛ nyjɛ pra wɔ yire snam na da swanyiɛ tons lafaa na fuloe jijirɛ na kɛ, na swafiŋge tons lafɛɛ taarɛ na fuloe jijirɛ, swafre ton lafɛɛ kɔɔnanu na fuloe taarɛ na kɛmbɔkunɔ, na tɔɔnrɔ ŋga snam kra da ton kagbenyi taarɛ na lafɛɛ kɔɔnashin na fuloe shiin na kɛ. 8 Leele mblɛ praa wa na dnɛ chiɛnri wee chichiele ni na yi wɔ mna ŋga, a pra sɛ yi ya o Tafun Nyiɛkpɔɔ Suminyuŋgo yirɛ yire na, a Gershon jlom ndro ŋmba praa yeeri Jehiel wre naa yi le.
9 Leele pre yiɛ na shɔ na pe kro lɛɛ nunu tɛɛ mu yirɛ yire wɔ mu o Tafun Nyiɛkpɔɔ wre ŋga. Pan ŋunu David titi yiɛ na shɔ kpɔɔ na.
David Nyiɛtalaa
10 Ŋunu David na yire leele pre kro yiɛ na, mna o Tafun Nyiɛkpɔɔ wre ŋga mɛɛ mna yo mbo,
“O Tafun Nyiɛkpɔɔ ni mu kaan mɛɛ,
ŋu wi o tolɛɛ Jacob wre Nyiɛkpɔɔ,
u wo yi mɛɛ nyjila kro nu.
11 O Tafun Nyiɛkpɔɔ,
mu wo yi kpɔɔmu, na jaŋga,
a mu yɛnyiŋge tia
mna chiɛnri lawee kro nu,
yira ŋga kii wa nyjeeri na tra na kro,
mu wee yi.
Ŋu wi ŋunu,
a mna ŋunumu lii yira kro na.
12 Ŋu pan yɛtaara,
na buuro yiri na paan,
a ŋu wi yira ŋga mu chin
ŋga kro ŋunu.
A ŋu kɛɛ jaŋga, na faŋga kro nyi,
a ŋu mu lewo kpɔɔri,
na u kaan faŋga.
13 O Tafun Nyiɛkpɔɔ,
ni mu kaan mboo,
na mu mɛɛ kaan yɛnyiŋge.
14 O Tafun Nyiɛkpɔɔ, wre lɛ mblɛ, mbe o jaa yirɛ wɔ mbe mu ŋga imi hin? Ŋu pan yirɛ kro yiri, kena yirɛ nyjɛ yi yili mu kɛɛ mu pan o pan yire yɛ o wɔ mu mu ŋga. 15 Nyiɛkpɔɔ, waŋgra ka nu o yiri mu pan mu tni mna na fumblɔ lɛ mu yiɛ, a pan o tolɛɛlɛ pre chɔɔ na nyi na. Pan ble nyjɛ oo li tra ŋga nu troi nyaanyaa na yira ndile yi, kia mu na ki fun, na mu ki chaa ma ki nya.
16 O Tafun Nyiɛkpɔɔ, yirɛ tataara nyjɛ o wɔ mbe pe yi tɛɛ mbe mu Suminyuŋgo sin mbe mu mɛɛ cheche kre ŋga kre, mu wee yi kro, a mu o ŋga yi yi. 17 Ni Nyiɛkpɔɔ, ni chin na mu kee ŋga kii wa ndro kro loloŋgo nu chin, a na ndro kpra lii, mu yiɛ shio u na. Ni yire yirɛ nyjɛ kro wɔ mu mu ŋga lɛɛ nunu, na jawala chichie ni. A fuŋgaami ni yiɛ shɔ na ni nya na mu leele mblɛ pee wa mna, lɛɛ nunu tɛɛ mu yirɛ wɔ mu mu ŋga. 18 O Tafun Nyiɛkpɔɔ, ŋu wi o tolɛɛlɛ Abraham, na Isaac, na Jacob Nyiɛkpɔɔ, jande ti mbe kre kepele ŋga kro mu leele nu, mbe pe ja mbra kpra lii mu yiɛ nyjila kro nu. 19 Jande ti mbe ni biblɔ Solomon lɛɛ wɔ mbe li mu mbra, na mu nyu kee yire kro na, mbe jaa mu Suminyuŋgo ŋga na ni yila mu yirɛ nyjɛ wɔ ŋga sin.”
20 A David na yo Israel leele pre pan mbo, “E e Tafun Nyiɛkpɔɔ wre ŋga mɛɛ.” A pe kro kro na o Tafun Nyiɛkpɔɔ ŋmba wi pe tolɛɛ Nyiɛkpɔɔ wre ŋga mɛɛ. Pe kro o Tafun Nyiɛkpɔɔ wre ŋga mɛɛ mna to mu yiɛ juule tra, ŋunu David yiɛ.
Pra Solomon Pe Ŋunu Na
21 Ŋga nyiŋge na se kre, a pra sra yurɛ sro mna sra wɔ mu o Tafun Nyiɛkpɔɔ wre ŋga. Pra gbo nablɛm kagbeŋge, na mbapilɛ kagbeŋge, na mbapɔɛlɛɛ bilɛ kagbeŋge, a pra simi sra wɔ wee ya yurɛ pre na. Pra yurɛ tataara tɛɛ mna sra wɔ mu ya. 22 Ki ble kre leele pre na yɛshɔɔrɔ kpɔɔ tɛɛ mna li, mna gbɔ o Tafun Nyiɛkpɔɔ wre yiɛ, mna olive simi kna mu wo Solomon ndra na o Tafun Nyiɛkpɔɔ wre yiɛ na, mna u pe ŋunu, a pra olive simi kna mna wo Zadok ndra na mna u le sɔfu.
23 Solomon na u lɛ David krɔ li, mna tni jɔɔn ŋga o Tafun Nyiɛkpɔɔ na Israel leele ŋga kre na. Yira ŋga wraa pini kro na nyu mu u ŋga, a Israel leele pre kro naa lii u nyu kee na. 24 Tra kre loplombo, na ŋunɔwifɛɛnlɛ, na ŋunu David biile kro na nyu yo na pie kpra li mbe taa ŋunu Solomon kro. 25 O Tafun Nyiɛkpɔɔ wre na tia Solomon na pe ŋunu kpɔɔ Israel leele pre kro yiɛ, a mɛɛ ŋga wra ta kre na leele pre fo, ŋunu nsraa wa mu yiri Israel tra nu mna mɛɛ ta na Solomon wi.
26 David wra ŋunumu li Israel tra nu, a u lɛ mɛɛ naa Jesse. 27 Wra Israel ŋunumu li yɛlɛ fuloe shiin. Wra tni Hebron na yɛlɛ kɔɔnashin, mna tni Jerusalem na yɛlɛ fulo na kɛmbɔtaarɛ. 28 Wra lɛ blɛlɔɔ titi, mna chin mu ku. U kɛ na nyu, a leele naa u kaan buuro. Ŋga wra ku kre, a u biblɔ Solomon wre na u krɔ li, mna tni jɔɔn kre na.
29 Ŋunu David kee nyjɛ wra pe u ŋunumu nyjila yire krɛrɛ, pe yi nyunɔ mu le Nyiɛkpɔɔ keenyanyofɛɛnlɛ Samuel, na Nathan, na Gad fakee hlɛ nyjɛ pra nyunɔ mu tɛɛ yire nu. 30 Kee nyjɛ wra pe u ŋunumu nyjila, na jaŋga ŋga wra ta, na kee nyininyini nyjɛ yira u da, na kee nyjɛ yira Israel leele nya, na kee nyjɛ yira waŋgrɛ nyjɛ yira u fɛ mu kun da kre, yire pra nyunɔ mu le hlɛ kre nu mu tɛɛ.