David Na Solomon Nyina//Imi We Sumindoo Kre Sin
28
Ki ble ka, ŋunu David na Israel loplombo kro yeeri a pra pan mu fni Jerusalem na. Wra jlom loplombo, na abani loplombo, na ŋunɔwifɛɛnlɛ loplombo, na loplombo mblɛ praa ŋunu na u biile yirɛ, na pe yurɛ le, na ŋunu katoo wa loplombo, na ŋunɔ wifɛɛnlɛ gbuntitremfɛɛnlɛ pre kro, wra pe yeeri a pra pan mu fni.2 Ŋga pe kro na fni kre, a ŋunu David na yiri mna yire sholo mna paara mbo, “Ni wolo, ndaa chaa mbe Suminyuŋgo sin, mbe o lawee ta mbe o Tafun Nyiɛkpɔɔ Nyu Nunu Daka ŋga yi Nyiɛkpɔɔ jele tɛɛ yira kre tɛɛ. Ni niyɛ kna mu yirɛ nyjɛ ni kie sin kro cha. 3 La, Nyiɛkpɔɔ na yo ni pan mbo, ‘Ŋu ma ki fna mu Suminyuŋgo sin mbe ni ŋga, ŋgi na hin? Mu ŋunɔ wi mu leele gbo tataara.’
4 Kii wa na o Tafun Israel Nyiɛkpɔɔ wre wra ni wɔ Judah jlom na, mna ni pe Israel leele ŋunu. A Judah jlom kre wra wɔ mbe praa Israel leele yiɛklu, kre jlom kre nu wra le mna ni lɛ biile wɔ, a ki yire ki na a wra ni pe Israel leele ŋunu. 5 O Tafun Nyiɛkpɔɔ wre ni dwan mu ni ŋga bibilɛ tataara, a u le pe nu mu Solomon wɔ, na ni waa ku mbe u ni krɔ li, mbe Israel leele le. 6 Wra yo ni pan mbo, ‘Mu biblɔ Solomon we ni Suminyuŋgo kre, na ki lawee vankam yire kro sin, ŋgi na hin? Mi Nyiɛkpɔɔ ni u wɔ na ni biblɔ wi, a mbe pe u lɛ. 7 Na u taa ni mbra, na ni nyu kee na imi na mu nyi fuŋgaami ŋga wala, mbe ti mbe u ŋunumu kre kro ma nyjila kro nu.’
8 Kena ni wolo, o Tafun Nyiɛkpɔɔ wre, na e kro yiɛ ni yire na kre kee ŋga yuu e pan kre, kena e le na ee li o Tafun Nyiɛkpɔɔ wre mbra yire, na u nyu kee kro na. Na e pe ma, kre tra ŋga we pe yire na e nanae wo nyjila kro nu.
9 Solomon, mu tolɛɛlɛ Nyiɛkpɔɔ wre yii kɛshiin, ti mbe mu jawala saan mu na, mbe mu lɛɛ wɔ mbe u sumi. U mu lɛɛ, na mu jawala kee kro chin. Na mu u haa cha, we ti mu u nya, la, na mu laa u kro, we mu je nyjila kro nu. 10 Jawa mu chin na o Tafun Nyiɛkpɔɔ wre u mu wɔ, mbe mu u Suminyuŋgo kre sin, kena gbeŋmba mu tnumu kre tun.”
11 Ŋga David na paara a u nyu na to kre, a wra Solomon nyina kolo ŋga na we tro mbe nyuŋgo kre titi sin, kre na ki lawee vankam yire, na ki nyinyi nyjɛ nu pie na yirɛ teeri, na ki nyinyi tapan, na nyjeeri wee, na cheche ndoo titi yire kro. 12 Nyiɛkpɔɔ Ŋumu wre na David nyina imi na pie ki lawee vankam yire, na nyinyi nyjɛ nu pie na keshian yirɛ, na yirɛ nyjɛ yi pe Nyiɛkpɔɔ wee yire teeri yire sin.
13 O Tafun Nyiɛkpɔɔ na u nyina imi we na srawɔfɛɛnlɛ, na Levi leele pre yɔɔlɛ, mbe praa tnumu ŋga ki fna pra tuni Suminyuŋgo wa, mbraa yirɛ nyjɛ ni pe tnumu tuni yire le. 14 Wra Solomon nyina swanyiɛ, na swafiŋge yire damu nyjɛ ni pie cheche yirɛ nyjɛ ni pie na Nyiɛkpɔɔ sumi yire pe. 15 Wra u nyina imi na swanyiɛ ŋga ni pie swanyiɛ kaniɛ kaan kre, na nyjɛ ni pie ki kaniɛ yire pe kre snamu fna mbe da, na imi swafiŋge ŋga ni pie swafiŋge kaniɛ kaan kre, na ki kaniɛ yire pe snam fna mbe da. 16 Na imi swanyiɛ ŋga ni pie tebru ŋga na pie na paanu cheche yire taari kre snam fna mbe da. Na imi swafiŋge ŋga ni pie tebru pe kre snam fna mbe da. 17 Na swanyiɛ ŋga ni pie damia, na kotie nyjɛ nu pie na nyimi leni mbra nyaara yire, na gbɔyirɛ, na swafiŋge ŋga ni pie tɛɛ mbe swafiŋge kotie yire pe. 18 Na imi swanyiɛ titi ŋga ni pie tɛɛ mbe sragbunu ŋga na pie na tuwe ndiom tɛɛn sroi kre pe kre snam fna mbe da. Wra u nyina kolo ŋga na we tro mbe sookaa ŋga na pie swanyiɛ Cherubim gbeele mbe taa, mbe pe yire mbe kuɛn nyaa mbe o Tafun Nyiɛkpɔɔ Nyu-Nunu-Daka kre nyutɔŋgɔ kre tɔ.
19 Yire yirɛ nyjɛ krɛrɛ, David na yo mbo, “O Tafun Nyiɛkpɔɔ wre jaŋga kra pan mu le ni nu, a wra ni nyina imi nyini mbe yi pe, a ndaa yi nyunɔ mu tɛɛ.”
20 A David na yo u pɔ Solomon pan na, mbo, “Muyɛ yii, mu gbun ta, mu tnumu kre tun. Maa shia fiɛ, a maa shia ti mbe mu kɛ gblɛ, ŋgi na hin? Ni Tafun Nyiɛkpɔɔ wre we ya mu na. Wa fɛ mbe mu wa, a wa laa mu kro mbe sɛ su na u Suminyuŋgo ŋga tnumu we paan kɔ. 21 Srawɔfɛɛnlɛ, na Levi leele pre, na kɛ nyu tnumu tunfɛɛnlɛ pre kroo wa, mbra pe tnumu tuni imi na ki fna. A loplombo pre, na Israel leele pre kro we li mu nyu kee kro na.”