David Ŋunɔwifɛɛnlɛ Loplombo//Nyina Pe Tnumu
27
Israel jlom loplombo pre, na pe ŋunɔwifɛɛnlɛ loplombo mblɛ praa ŋunɔwifɛɛnlɛ lafɛɛ, na kagbenyi kagbenyi le, na ŋunu loplombo mblɛ wra wɔ mu tɛɛ pe nyu na pre mɛɛ yi kre. Nyiɛpɔ kro nu, pie leele kagbenyi fulo na jijirɛ wɔ, mbe lopom tɛɛ pe nyu na, mbe pe tnumu tun u ŋunumu kre nu nyiɛpɔ.2 Pe yɔmu ŋga kra yiɛ klu mbe tnumu tun nyiɛpɔ jlewo kre nu kre lopom na wi Zabdiel biblɔ Jashobeam. Bilɛ kagbenyi fulo na jijirɛ praa wa u kɛɛ. 3 Wre Jashobeam ŋmba na yiri Perez jlom na.
4 Ŋmba wra yiɛ klu nyiɛpɔ shiin wo kre wolo pan na wi Dodai ŋmba wra yire Ahoah sele na wre, a ŋmba wraa yaa u na na wi Mikloth. Leele pre naa kagbenyi fulo na jijirɛ.
5 Lopom ŋmba wra yiɛklu nyiɛpɔ taarɛ wolo pre pan na wi srawɔfun Jehoiada biblɔ ŋmba praa yeeri Benaiah wre. Leele mblɛ praa wa u kɛɛ pre naa kagbenyi fulo na jijirɛ. 6 Wre chɔɔ na wi ŋunɔwifɛɛnlɛ faŋgafɛɛnlɛ fulo na kɛ mblɛ pra mɛɛ shɔ pre lopom. A u biblɔ ŋmba praa yeeri Ammizabad wre chɔɔ ŋunɔwifɛɛnlɛ lopom na wi.
7 Ŋmba wra taa jijirɛ mna nyiɛpɔ jijirɛ wolo pre yiɛklu na wi Joab chunu ŋmba praa yeeri Asahel wre, a u biblɔ na wi Zebadiah, wre wra kɔ mna u lɛ krɔ li, mnaa leele kagbenyi fulo na jijirɛ pre le.
8 Ŋmba wra kunɔ wolo pre yiɛklu nyiɛpɔ kunɔ wo kre nu na wi Izrahite katoo wo Shamhuth wre. Leele mblɛ praa wa u kɛɛ naa kagbenyi fulo na jijirɛ.
9 Ŋmba wra kɔɔnanu wolo pre yiɛklu nyiɛpɔ kɔɔnanu wo kre nu na wi Ikkesh biblɔ Ira ŋmba wra yiri Tekoa na wre. Leele mblɛ praa wa u kɛɛ naa kagbenyi fulo na jijirɛ.
10 Ŋmba wra nyiɛpɔ kɔɔnashin wolo pre yiɛklu na wi Helez ŋmba wra yiri Pelon na Ephraim tra nu kre. Leele mblɛ praa wa u kɛɛ naa kagbenyi fulo na jijirɛ.
11 Nyiɛpɔ kɔɔnatarɛ wolo pre lopom na wi Sibbecai, a wra yiri Hushah na mna yiri Zerah katoo. Leele mblɛ praa wa u kɛɛ naa kagbenyi fulo na jijirɛ.
12 Nyiɛpɔ kɔɔnanyjirɛ wolo pre lopom na wi Abiezer ŋmba wra yiri chia ŋga pe yeeri Anathoth, a kraa wa Benjamin tra nu kre na. Leele mblɛ praa wa u kɛɛ naa kagbenyi fulo na jijirɛ.
13 Nyiɛpɔ kɛ wolo pre lopom na wi Maharai ŋmba wra yiri Netophah na, mna yiri Zerah katoo kre. Leele mblɛ praa wa u kɛɛ naa kagbenyi fulo na jijirɛ.
14 Nyiɛpɔ kɛmbɔnunu wolo pre lopom na wi Benaiah ŋmba wra yiri Pirathon na Ephraim tra nu kre. Leele mblɛ praa wa u kɛɛ naa kagbenyi fulo na jijirɛ.
15 Nyiɛpɔ kɛmbɔshiin wolo pre lopom na wi Heldai. Wra yiri Netophah na, mna yiri Othniel katoo. Leele mblɛ praa wa u kɛɛ naa kagbenyi fulo na jijirɛ.
David Israel Jlom Yire Loplombo Wɔ
16 Israel jlom loplombo pre na lɛ kre.
Blɔ ŋmba praa yeeri Zicri wre biblɔ Eliezer wre na wi Reuben jlom kre lopom.
A Maacah biblɔ Shephatiah wre na wi Simeon jlom kre lopom.
17 Kemuel biblɔ Hashabiah wre na wi Levi jlom kre lopom. A Zadok na pe Aaron jlom kre lopom.
18 A David nyjɔ Elihu wre na wi Judah jlom kre lopom.
A Michael biblɔ Omri wre na wi Issachar jlom kre lopom.
19 Obadiah biblɔ Ishmaiah wre na wi Zebulun jlom kre lopom.
A Azriel biblɔ Jerimoth wre na wi Naphtali jlom kre lopom.
20 Azaziah biblɔ Hoshea wre na wi Ephraim jlom kre lopom,
a Pedaiah biblɔ Joel wre na wi Manasseh jlom yɔɔ ŋga kraa wa na shie yila tohaa wa kre lopom.
21 Zechariah biblɔ Iddo wre na wi Manasseh jlom yɔɔ ŋga kraa wa mu tni Gilead tra nu na shie yila finhaa wa kre lopom.
Abner biblɔ Jaasiel wre na wi Benjamin jlom kre lopom.
22 Jeroham biblɔ Azarel wre na wi Dan jlom kre lopom.
Kena pre leele mblɛ na lɛ Israel jlom yire loplombo.
23 Ŋga David na yo we pe tɔɔnri kre, u nsra tia pra bilɛ mblɛ pe n da yɛlɛ fulo pre tɔɔnri mu chaa, ŋgi na hin? Na o Tafun Nyiɛkpɔɔ wre klu mu nyu yo Israel leele pre pan na we ti mbe pe nɛɛ na wɔɛlɛɛ nyjɛ nyiɛ yiɛ na yi, mbe ndro wa jaa pe tɔɔnri. 24 Joab ŋmba lo na wi Zeruiah wre wra klu na Israel leele pre tɔɔnri, la, u nsra ta mu kɔ, a Nyiɛkpɔɔ krɔ na kun na pe Israel leele pre tɔɔnri. Ki tia pe nsra leele mblɛ pra tɔɔnri mu ta kre nyu nyunɔ mna le ŋunu David fakee hlɛ kre nu.
Leele Mblɛ Praa Ŋulo Yirɛ Le
25 Adiel biblɔ Azmaveth wre wraa lebiile nyinyi nyjɛ nu praa yirɛ teeri kre le.
A Uzziah biblɔ Jonathan wraa yirɛ tɛɛ nyinyi nyjɛ yiraa wa chiɛ hɛnyi yire na yire le.
26 Kelub biblɔ Ezri wre wra na ŋunu see tnumu tunfɛɛnlɛ pre le.
27 A Shimei ŋmba wra yiri Ramah na wre wraa ŋunu tre seele le,
A Zabdi ŋmba wra yiri Shepham na wre wraa lawee ŋga praa simi gbɔ wee teeri kre le.
28 Baal-Hanan ŋmba wra yiri Geder na wre wra na olive tinyi, na sycamore fig tinyi nyjɛ yiraa wa nyambie nyjɛ yiraa wa na shie yila tohaa kre le.
A Joash naa olive simi nyjɛ praa woni yire le.
29 A Shitrai ŋmba wra yiri Sharon na wre wraa ŋunu nui mblɛ praa wa Sharon tra mbrɛrɛ kre nu pre le.
A Adlai biblɔ Shaphat wre wraa nui mblɛ praa wa landɛɛ lawee yire nu pre le.
30 Ishmael ndro ŋmba praa yeeri Obil wre wra na krɔnisoolo pre le.
A Jehdeiah ŋmba wra yiri Meronoth na wre naa bubunlɔ pre le.
31 Jaziz Hagar ndro wre wra na mbaala, na sikaala pre le.
Kena pre leele mblɛ praa ŋunu kɛ yirɛ le u pan.
Leele Mblɛ Praa David Kaan Jawala
32 David nalɔ Jonathan wre na pe jawalafun mna hlɛ chin, na leele kaan jawala. Wre na Hacmoni biblɔ Jehiel praa ŋunu biile nyina hlɛ.
33 Ahithophel wraa ŋunu David kaan jawala, a Arki ndro Hushai wre na pe ŋunu nunu ŋmba wraa u kaa jawala na. 34 Ŋga Ahithophel nsraa wa kre, Abiathar, na Benaiah biblɔ ŋmba praa yeeri Jehoiada wre praa wa u titɛɛ.
A Joab na pe Israel wifɛɛnlɛ pre lopom.