Shiefɛɛnlɛ Pre Tnumu
26
Imi na pra leele mblɛ pie na Suminyuŋgo kre sri pre yɔɔlɛ na yi kre. Mblɛ pra wɔ Korah leele nu na lɛ kre. Kore biblɔ Meshelemiah wra pe Asaph nana. 2 Meshelemiah na se bibilɛ kɔɔnashin. Zechariah na wi lopom, a Jediael na taa shiin, Zebadiah wra taa taarɛ, a Jathniel na taa jijirɛ, 3 a Elam na taa kunɔ, a Jehohanan na taa kɔɔnanu, a Eliehoenai na taa kɔɔnashin.4 Obed-Edom bibilɛ naa kɔɔnatarɛ. Shemaiah na wi lopom, a Jehozabad na taa shiin, a Joah na taa taarɛ, a Sacar na taa jijirɛ, a Nethanel na taa kunɔ, 5 a Ammiel na taa kɔɔnanu, a Issachar na taa kɔɔnashin, a Peullethai na taa kɔɔnatarɛ. Nyiɛkpɔɔ na Obed-Edom dwan.
6 Obed-Edom biblɔ Shemaiah na bibilɛ se, a pe kro na pe loplombo pe lɛ sele nu, ŋgi na hin? Pra peyɛ ja kro. 7 Pre na lɛ Othni, na Rephael, na Obed, na Elzabad. U sele leele na lɛ, Elihu na Semakiah, a pra peyɛ ja na. 8 Pre leele mblɛ krɛrɛ Obed-Edom nɔɔ leele na lɛ. Pre na pe biile, na pe sele leele kro na peyɛ ja na, a faŋga naa wa pe nu mbe pe jaa tnumu kre tun. Kena Obed-Edom leele pre naa fuloe taarɛ na shiin. 9 A Meshelemiah bibilɛ na u sele wolo naa leele kɛmbɔkɔɔnatarɛ. A pe kro na peyɛ ja.
10 Merari ndro Hosah wre na bibilɛ se, Shimri wra pe pe yɛklo, la, wre na ma lopom. Pe lɛ wra u wɔ na u pe pe yɛklo. 11 Hilkiah wra taa shiin, a Tabaliah na taa taarɛ, a Zechariah na taa jijirɛ. Kena Hosah bibilɛ na u sele leele pre naa kɛmbɔtaarɛ.
12 Pra yire shiefɛɛnlɛ loplombo pre na mna shiefɛɛnlɛ pre yɔɔlɛ, mna pe ŋga pe tnumu, imi na pra pe sele leele pre pe kre. 13 Imi na sele yire na da kpan, pan pra kɛɛn tɛɛ mna chin jlonwee nyjɛ na pie tni tni. Pe loplombo, na pe yirifumblɔ kro na tnumu ta na tuni.
14 Pra kɛɛn tɛɛ a kra Shelemiah wɔ na wre we yire yila finhaa jlonwee kre na. A pra kɛɛn tɛɛ u biblɔ Zechariah na, a kra u wɔ na wre we yire nyjeeri haa jlonwee kre na. Zechariah wre na pe ndro ŋmba u jawala chiriri kaan. 15 Pra kɛɛn tɛɛ tapan haa jlonwee kre na, a kra Obed-Edom wɔ, a pra kɛɛn tɛɛ nyinyi nyjɛ nu praa yirɛ teeri kre na, a kra u biile wɔ. 16 Pra kɛɛn tɛɛ yilatohaa jlonwee kre, na Shalleketh Jlonwee ŋga kii wa nyjeeri kolo kre na, a kɛɛn yire na Shuppim na Hosah wɔ.
Shiefɛɛnlɛ pre naa shie na tunumu tuni na taala. 17 Blenyini ŋga shiefɛɛnlɛ kɔɔnanu we sɛ yire yilafinhaa jlonwee kre na, mbe jijirɛ sɛ yire nyjeeri haa wo kre na, mbe jijirɛ sɛ yire tapan haa wo kre na, mbe shiin shiin sɛ yire nyinyi shiin nyjɛ nu pe yirɛ teeri kre nyu na. 18 Kolo ŋga ki shie lawee vankam ŋga ki shie yilatohaa kre, leele jijirɛ pie yire wa, la, leele shiin pie yire lawee vankam kre lam.
19 Kena imi pra Korah na Merari nanae lawee shiefɛɛnlɛ pre yɔɔlɛ mna pe ŋga pe tnumu na yi kre.
Suminyuŋgo Tnumu Yire Yɛ
20 Pe wolo Levi leele pre plɛ pra wɔ a praa Nyiɛkpɔɔ katoo kre swa tɛɛ haa kre, na yi yirɛ cheche yire le.
21 Ladan na yiri Gershon jlom nu, a u pɔ na wi Jehieli. Ladan leele hamblɛ pre tataara na pe sele loplombo kro pe jlom kre na. 22 Jehieli bibilɛ na lɛ Zethan, na u chunu Joel, pra chaa leele mblɛ praa Nyiɛkpɔɔ katoo keshian yirɛ yire le kre nu.
23 Pe plɛ na yiri Amram, na Izhar, na Hebron, na Uzziel jlom yire nu.
24 Moses bibilɛ Gershom wre nana na wi Shubael, wre na wi lopom titi ŋmba wra swa tɛɛhaa kre, na keshian yirɛ yire le. 25 Gershom chunu Eliezer wre nanae plɛ na lɛ Rehabiah, na Jeshaiah, na Joram, na Zicri, na Shelomith.
26 Shelomith na u sele leele pre kɛɛ swa yirɛ nyjɛ ŋunu David na o Tafun Nyiɛkpɔɔ ŋga yire na nyi, yire na nyjɛ u sele leele, na u loplombo, na u ŋunɔwifɛɛnlɛ loplombo na pan mu Nyiɛkpɔɔ ŋga yire kro. 27 Yirɛ nyjɛ pra foolo ŋunɔ kre, pra yɛ wɔ a pra o Tafun Nyiɛkpɔɔ Suminyuŋgo kre gbeele na yi ni. 28 Yirɛ nyjɛ Nyiɛkpɔɔ keenyanyofun Samuel, na Kish biblɔ Saul, na Ner biblɔ Abner, na Zeruiah biblɔ Joab, na yirɛ hɛnyi yire pra pan mu o Tafun Nyiɛkpɔɔ ŋga yire kro, Shelomith na u sele leele pre kɛɛ yira nyi.
29 Kenaniah ŋmba wra yiri Izhar jlom na wre na u bibilɛ pre, pra pre ŋga tnumu peyɛ. Pe nsraa tnumu tuni Suminyuŋgo wa. Pre na lɛ Israel leele pre kaalɛɛ nyunɔfɛɛnlɛ, na pe kprakunfɛɛnlɛ.
30 Hashabiah na yiri Hebron jlom na, wre na u sele leele naa kagbeŋge na lafɛɛ kɔɔnashin, mna peyɛ ja. Pre praa Israel leele mblɛ praa wa mu na shie Jordan lɔɔ kre yilatohaa wa kre le, na tnumu tuni Nyiɛkpɔɔ, na ŋunu wre pan.
31 Hebron jlom leele pre, Jeriah na wi pe lopom, a imi na pra pe nɔɔ leele pre kee nyunɔ mu tɛɛ yi kre. Ŋga David na jɔɔn li kre, ki yɛlɛ fuloe shiin na kre, pra pe fakee nyjɛ pra nyunɔ mu tɛɛ kre le le, pra nya na leele titie plɛ naa wa Hebron jlom leele nu a pra tni Jazer na Gilead tra nu. 32 Jeriah sele leele naa kagbenyi shiin na lafɛɛ kɔɔnashin, mna peyɛ ja, mna pe sele loplombo. A ŋunu David na Reuben jlom leele, na Gad jlom leele, na Manasseh jlom yɔɔ kre le pe kɛɛ, mbe praa kee nyjɛ yie yiri pe nu Nyiɛkpɔɔ haa, na ŋunu haa yire kro, mbe praa yi le.