Ŋunu Saul Na U Bibilɛ Kumu
10
Philistine leele na sɛ wi na Israel leele ni, a Israel leele pre na fɛ pe yiɛ, a pra pe tataara gbo nyua Gilboa na. 2 Philistine leele pre na Saul na u bibilɛ pre kɔŋgɔ ni mna sɛ u bibilɛ taarɛ gbo, pre na lɛ Jonathan, na Abinadab, na Malki-Shua. 3 Ŋunɔ kre na wɛ Saul na mna sɛ su na u loŋgoolo pre wa na u ta mu wa na snimi ni.4 Ŋga kra pan ma kre, a Saul na kna mu yo u ŋunɔwiyirɛ tiofun wre pan mbo, “Mu brɔfiɛn yiɛshiin tini mu ni taa mu gbo, na kre ma Philistine leele mblɛ pe n Nyiɛkpɔɔ chin ŋga we paan ni fiŋge, mbe chiin ni gbo.” La, fiɛrɛ na u ŋunɔwiyirɛ tiofun wre yii, ki tia u nsra sro mu u gbo. A Saul na wre titi brɔfiɛn yiɛshiin kna mna kan u lɛɛ na, mna to mu ki fɛɛri, a kra u su mu gbo. 5 Ŋga u ŋunɔwiyirɛ tiofun wre na nya na Saul ku kre, a wre na to u brɔfiɛn yiɛshiin na mna uyɛ gbo na. 6 Kena Saul na u bibilɛ taarɛ pre na u katoo leele pre kro na chaa mu ku.
7 Ŋga Israel leele mblɛ praa wa mu tni Jezreel landɛɛ kre nu kre na nya na pe ŋunɔwifɛɛnlɛ pre fɛ, a Saul na u bibilɛ pre ku kre, a pe kro na fɛ mna pe chiɛ yire ti, a Philistine leele pre na pan mu yi shɔ mu tni.
8 Ŋga ki nyiŋge na se kre, Philistine leele pre na sɛ Israel leele pre yirɛ foolohaa, ŋga praa shie kre, pra Saul na u bibilɛ pre nya na pe ku mu sni nyua Gilboa na. 9 A pra u yirɛ wɔ u na, mna u ŋunɔwiyirɛ kro koli, mna u ndra kɔ u na, mna leele tun Philistine tra kre nu kro, a pra ki kpali mu tro tra kre nu, a pra pe sɛɛnlɛ yire ŋga mboo. 10 A pra sɛ ŋunu Saul ŋunɔwiyirɛ yire tɛɛ pe sɛɛnlɛ yire nyuŋgo, mna sɛ u ndra kre hlu pe sɛɛn Dagon kre nyuŋgo.
11 Ŋga Jabesh Gilead leele pre na loo kee nyjɛ Philistine leele pre na pe Saul na kre, 12 a pe gbunfɛɛnlɛ plɛ na sɛ ŋunu Saul, na u bibilɛ pre gboolo pre wru mna pan na pe ni Jabesh na, mna sɛ pe le tiŋge badaaŋga ka jaara, mna ble fun ble kɔɔnashin.