Pe David Pe Israel Na Judah Ŋunu
5
Israel leele pre kro na sɛ David pan Hebron na mna sɛ yo u pan mbo, “Mu nyimi leele lɛ wre. 2 Nyjila ŋga ni Saul na pe o ŋunu kre, ŋu mnaa yiɛ klu na o ni, na shie ŋunɔ. A o Tafun Nyiɛkpɔɔ wre na yo mu pan na ŋu mu yiɛklu na u leele pre ni, mbe mu pe pe ŋunu.” 3 Ki tia Israel loplombo pre kro na pan David pan Hebron na. A wre na pre na nyu nunu pe, a pra u fa na simi ni, a wra pe Israel leele pre kro ŋunu. 4 David na li yɛlɛ fulo na kɛ, a pra chin mu u tɛɛ jɔɔn na, a wra ŋunumu li yɛlɛ fuloe shiin. 5 Wra ŋunumu li Hebron na Judah na yɛlɛ kɔɔnashin na yɔɔ. A wra kɔ mu sɛ tni Jerusalem na mna pe Israel, na Judah ŋunu yɛlɛ fulo na kɛmbɔtaarɛ.6 Ki ble ka Ŋunu David na u leele na peyɛ kna mbe sɛ wi na Jerusalem leele ni. Jebusite leele mblɛ praa wa wa pre naa jawa na David wa pe ja, a praa yuu u pan mbo, “Ma jaa le o chia ŋga na, fuunlo na finla kuraa pie mu ni.” 7 La, David na sɛ wi na pe ni mna Zion chia kre shɔ, a pra kɔ na ki yeeri, “David kakpɔɔ.”
8 Kre ble kre David na yo u leele pre pan mbo, “E Jebusite pre gbo kro, e sɛ le lafoelee yire nu, e sɛ fuunlo na finla mblɛ pe sɛ ndra wa kre kro gbo. Ŋgi na hin? Ni n na pe kee chaa mbe loo.” Kre ki tia pe ki yo na, “Fuunlo na finla wa le katoo kre.”
9 Ŋga David na wi mu chia kre shɔ mu kɔ kre, a wra sɛ tni wa, mna ki mɛɛ tɛɛ, “David Kakpɔɔ.” A wra ka sin mu ya chia kre na, a kra kpɔɔ mu ya. 10 David na jaŋga ta kpɔɔ mu ya. Ŋgi na hin? O Tafun Nyiɛkpɔɔ Jaŋgafun wre naa wa u kro.
11 Kre kee ŋga kɔkro kre, Tyre ŋunu Hiram na tia u leele na sɛ David ŋga cedar tinyi, na kapintae, na brichae mbe pe ŋunu katoo sin u pan. 12 Bawa David na chin na o Tafun Nyiɛkpɔɔ wre u u pe Israel leele ŋunu, a u leele pre saara na, u ŋunumu kre naa kpɔɔri na yaa.
13 Ŋga David na kɔ Hebron na mna sɛ Jerusalem na kre, wra sɛ chiɛlɛ leŋge mna bichilɛ wru tataara, mna biile se tataara. 14 Jerusalem na wra pre biile mblɛ kro se. Shammua, na Shobab, na Nathan, na Solomon, 15 na Ibhar, na Elishua, na Nepheg, na Japhia, 16 na Elishama, na Eliada na Eliphelet.
Philistine Na Pan Mu Wi David Ni
17 Ŋga Philistine leele na loo na pe David tɛɛ ŋunu Israel na kre, pe ŋunɔwifɛɛnlɛ na peyɛ kna mbe sɛ wi na u ni. Ŋga David na ki loo kre, a wra sɛ ndra lawee ka nu. 18 A Philistine leele pre na pan mu Rephaim lafolo lawee kre tɔ poŋgo. 19 A David na o Tafun Nyiɛkpɔɔ wre wie mbo, “Ni sɛ wi na Philistine leele pre ni ree? A mu ti ni pe ja ra?” A o Tafun Nyiɛkpɔɔ na yo u pan mbo, “Ɛnhɛɛn, sɛ wi na pe ni, ni pe le mu kɛɛ.”
20 A David na sɛ Baal-Perazim lawee ŋga kra mbra Rephaim na kre nu, bawa wra wi na Philistine leele pre ni mna pe ja. A wra yo mbo, “O Tafun Nyiɛkpɔɔ ni loŋgoolo pe imi na lɔɔ nyini mbe yirɛ wru kre.” A praa lawee kre yeeri Baal-Perazim. 21 Ŋga Philistine leele pre naa feni kre, pra fɛ mu pe sɛɛnlɛ ti wa, a David na u leele pre na yi koli mu sɛ na yi ni.
22 Ki nsra tna Philistine leele pre pan, a pra ndru mu sɛ ble Rephaim lafolo kre nu na mbe wi. 23 A David na ndru mu sɛ o Tafun Nyiɛkpɔɔ wre wie na, a wra yo u pan mbo, “Yaa yire mna mbe sɛ pe pan, la, e sɛ yire pe kro, e pe tɔ e yire balsam tinyi yire lawee. 24 Na e waa leele tiŋge loo tinyi yire ndra na, kena e na wii na pe ni, kre ki nyina na ni yiɛklu e pan mbe wii e ŋga.” 25 A David na kee ŋga o Tafun Nyiɛkpɔɔ na yo u pan kre pe. Kra tia pra ja mu Philistine leele pre ni, hali mna yire na pe ni Geba na, mna sɛ su Gezer na.