Pra Ish-Bosheth Gbo
4
Ŋga Saul pɔ Ish-Bosheth na loo na pe Abner gbo Hebron na kre, fiɛrɛ na u yii, a gbun na yɔ Israel leele pre kro na. 2 Ish-Bosheth naa wa na loplombo shiin plɛ ni, a praa yiɛklu u wolo mblɛ praa shie na leele toni pre pan. Nunu mɛɛ naa Baanah, a wa mɛɛ na Rechab, a pe lɛ mɛɛ na Rimmon, a pra yiri Beeroth na. Benjamin sele nu pra yiri. A Leele mblɛ praa wa Beeroth na kre, Benjamin sele wolo na lɛ. 3 La, leele mblɛ pra klu mu tni Beeroth na pre na gbɛ wa mu sɛ tni Gittaim na, bawa pe nyi mu tni mu pan mu su aŋga na.4 Saul nana wa naa wa, Jonathan pɔ na wi, a praa u yeeri Mephibosheth. Ŋga wra li yɛlɛ kunɔ kre, a pra Saul na u pɔ Jonathan gbo. Ŋga pe kumu kre mandiɛ na yiri Jezreel na mu da pe na kre, a chlɔ ŋmba wraa pɔ wre le kre na u wru na feni na shie, imi wraa fiɛlɛ kre, a pɔ wre na foli mu to, mna fuuru, mu kaari fna.
5 Ki ble ka, Rimmon biile Recab na Baanah na yili na shie Ish-Bosheth katoo, mna sɛ le wa lafo na, na ki nyjila kre na u sni na wuui. 6 Chlɔ wa naa wa mu tni katoo kre jlonwee nyu na, na u yua fɔ mu fna, mu tni na gbunu, a Recab na Baanah na tro fɛɛ mu le katoo kre lam. 7 Ŋga pra le kre, a pra sɛ le Ish-Bosheth sni nyuŋgo, na uu wa mu sni na ŋunu kama. A pra u ndra kɔ, mna yili mu to kolo. Pra nyaari blee kre mna Jordan lɔɔ kre kun. 8 Pra sɛ na u ndra kre ni mna sɛ David ŋga ki yi Hebron na, mna yo u pan mbo, “Ish-Bosheth ndra yi kre, mu loŋgo Saul wre pɔ ŋmba wraa mu chaa mbe gbo kre. Aŋga o Tafun Nyiɛkpɔɔ wre tia o Saul na u sele leele fɔlɔ tɔ mu pan.”
9 A David na kna mbo, “Ni Tafun Nyiɛkpɔɔ ŋmba u ni shɔ kanyana nu wre mɛɛ nu, mbe kpra yo e pan. 10 Bituŋu ŋmba wra pan ni pan Ziklag na mna pan mu Saul kumu yo ni pan kre, wraa jawa na mandiɛ taan ni u paan ni pan. La, ndaa tia pra u yii mu gbo. Tnu ŋga wra ta u mandiɛ taan ŋga wraa jawa kre nu na yi u kumu. 11 Kena fɔtɔɔrɔ ŋgi e jawa na yire sisampefɛɛnlɛ linkufɛɛnlɛ mblɛ we ta, ŋga e sɛ lewo ŋmba u sni na ŋunu tɔ mu gbo finfin ŋga hin? Gboo ŋga e u gbo ŋga ndra na, mbe e gbo ka mbe fɔlɔ tɔ, mbe e luuro ŋga pɔ mbe laa tra ŋga yiɛ na.” 12 A David na kolo ŋga, a u ŋunɔwifɛɛnlɛ na Rechab na Baanah yii mna pe gbo, mna pe kɛnyi na pe jeelee knumu mna sɛ yi pɔ mu hlu tapla ŋga kraa wa Hebron na kre mbɛɛ na. A wra tia pra Ish-Bosheth ndra kre wru mna sɛ ki le dnɛ wee ŋga nu pra sɛ Abner le kre nu.