Nyu Nunu Daka Kre Pan//Jerusalem Na
6
David na ndru mu Israel ŋunɔwifɛɛnlɛ titie pre yeeri mu pan mu fni, praa bilɛ kagbenyi fulo na kɛ. 2 A wra yiɛ klu pe pan mna sɛ Baalah na, Judah tra nu mbe sɛ Nyiɛkpɔɔ Nyu Nunu Daka ŋga na o Tafun Nyiɛkpɔɔ Jaŋgafun wre mɛɛ nyi, a u tnihaa wa Cherubim shiin lalaa kre wru mbe pan Jerusalem na. 3 Pra sɛ ki wru Abinadab katoo ŋga kraa wa nyua na kre, mna ki taa soo kaa fɔŋgɔ na. Uzzah, na Ahio, Abinadab biile pre, pre praa ki le, a praa paan, 4 Ahio wra yiɛ klu ki pan. 5 David na Israel leele pre naa mɛɛ koni, na yoo na pe faŋga kro ni, na o Tafun Nyiɛkpɔɔ wre kaan yɛnyiŋge. Praa juru, na janyila, na binyi, na dawro gbuun, na yambrawa nyaara o Tafun Nyiɛkpɔɔ wre yiɛ.6 Ŋga praa shie mna da Nacon yua gbun lawee kre, nui mblɛ pra Nyu Nunu Daka kre tio kre wa na gbro, a kra tia Uzzah na sɛ kɛ taa Nyu Nunu Daka kre na. 7 Titɛɛ kre nu wa to, o Tafun Nyiɛkpɔɔ krɔ na kun na Uzzah ni, ŋga wra pe kre ndra na. A wra u gbo Nyu Nunu Daka kre jaara wa. 8 Ki tia pra lawee kre mɛɛ tɛɛ Perez-Uzzah, mu pan mu su aŋga na, a David krɔ na kun, na o Tafun Nyiɛkpɔɔ Uzzah ndie tini.
9 Kre kee ŋga na tia David na o Tafun Nyiɛkpɔɔ fiɛ, a wra yo mbo, “Mni mbe pe mbe sɛ na Nyu Nunu Daka kre ni na hin?” 10 Ki tia wra u jawala pe na wa sɛ na ki ni Jerusalem na, a wra yɔ mu sɛ na ki ni Obed-Edom katoo, wre blɔ wre na yiri Gitt na. 11 Kra tni wa nyiɛpɔ taarɛ, a o Tafun Nyiɛkpɔɔ na Obed-Edom na u sele leele dwan.
12 Ŋunu David na loo na Nyu Nunu Daka kre pe sɛ tɛɛ Obed-Edom katoo kre tia, o Tafun Nyiɛkpɔɔ u kɛ yira kro dwan, wre na u sele leele kro ni. Ki tia wra sɛ ki wru Obed-Edom katoo wa, mna pan na ki ni Jerusalem na, na yɛshɔɔrɔ kpɔɔ ni. 13 Ŋga bilɛ mblɛ pra pan mu Nyu Nunu Daka kre wru na shie kre na sɔɔlɛɛ kɔɔnanu kɔ to, a David na tia pra yire, a wra sra wɔ na nuu ŋmba nu nyina nyi ni, mu Nyiɛkpɔɔ ŋga. 14 Na mbɔfiŋge yoŋgo chiin kii wa mu pɔ David sɛlɛ, a wra yɔ na u faŋga kro ni mu o Tafun Nyiɛkpɔɔ wre le yɛnyiŋge. 15 A wre na Israel leele pre kro na sɛ na Nyu Nunu Daka kre ni Jerusalem na. A praa bnɔɛ foo, mna yɛshɔɔrɔ tɛɛ na gble leni mu taa ki na.
16 Ŋga praa lee na daka kre ni Jerusalem na kre, Michal, Saul pɔ chlɔ wre na yiɛ wɔ to vromboo nu, mna Ŋunu David nya na u yoo na yeni Nyiɛkpɔɔ yiɛ, a wra u le fiɛn u jawala nu.
17 Pra le na Daka kre ni, mna sɛ ki le yoŋgo nyuŋgo ŋga David na pe ki pan kre nu. A wra yirɛ sroo, na wejinyiŋge sra wɔ mu o Tafun Nyiɛkpɔɔ wre ŋga. 18 Ŋga wra sra kre wɔ mu kɔ kre, a wra leele pre dwan o Tafun Nyiɛkpɔɔ wre mɛɛ ni. 19 Mna chin mu leele pre ŋga sro. Wra Israel leele pre kro, chlɔ na blɔ taala paanu nunu nu na, na kaara, na tinyi sɛnyi yɛ ni, a leele pre na ndru mu sɛ pe kalonyi nu.
20 Ŋga pra kɔ a David na sɛ katoo kre, u chɔ Michal na pan mu u fni mna kna mbo, “Israel ŋunu uyɛ ŋga mɛɛ kpɔɔ aŋga. U uyɛ wɔ mu tia u sumifɛɛnlɛ chiɛlɛ u nya na jijuo wi.”
21 A David na kna mbo, “O Tafun Nyiɛkpɔɔ ni yoo na leni yɛnyiŋge. Ŋgi na hin? Wre wra mu lɛ na u sele leele ti, mna ni wɔ na ni u leele yiɛklu. Ki tia mbe yɔ mbe u ŋga yɛnyiŋge, 22 a fuŋga kuraa mbe nyifɛɛrɛ yɔɔrɔ yɔ. Mu jawa na kee ŋga ni pini kre n nyu, la, chiɛlɛ hamblɛ pre ni pni.”
23 Michal, Saul pɔ wre nsra se na mna sɛ su u kumu ble.