7
Ŋunu David na tni u katoo wejinyiŋge ni, a o Tafun Nyiɛkpɔɔ na kɛ tɔ u na, u loŋgoolo kɛɛ. 2 Ki ble ka ŋunu na yo Nyiɛkpɔɔ kee nyanyofun Nathan pan mbo, “Mii wa mu tni nyuŋgo ŋga pe sin na cedar kɛɛn chichiele ni nu, a Nyiɛkpɔɔ Nyu Nunu Daka kree wa yoŋgo nyuŋgo nu.”3 A Nathan na kna mbo, “Kee ŋga mu jawa mu ndra kpan pe. Ŋgi na hin? O Tafun Nyiɛkpɔɔ wree wa mu kro.” 4 Ki ble kre blee o Tafun Nyiɛkpɔɔ na yo Nathan pan mbo, 5 “Sɛ yo ni sumifun David pan na, ni yo na wre ma we nyuŋgo sin mbe ni ŋga mbe ni tni. 6 Mu yire ble ŋga na ndaa Israel leele wɔ mu yili Egypt tra nu, ni n tni nyuŋgo titi nu tun, ŋga ni kila na tro ŋga krɛrɛ yoŋgo nyuŋgo nu ni nyi. 7 Ŋga mi na Israel leele pre kila na tro ŋga krɛrɛ, ni n da mu yo pe loplombo pre wa pan na, ‘Mni a e n nyuŋgo sin cedar kɛɛn ni ni pan hin?’
8 Kena yo David pan na, Mi e Tafun Jaŋgafun wre yo na, Ndaa mu yeeri na mbaala mu le, na mu paan pe ni leele Israel wolo pre lefun. 9 Mna mu shie kpan nii wa mu kro, a mu loŋgoolo kro, ni klu mu wi na pe ni mu pe ja mu pan. Mbe ti mbe mu mɛɛ kpɔɔ na waŋgra ŋga lekpɔɔ wi. 10 A mbe lawee gbeele mbe ni leele Israel wolo pre ŋga, mbe pe tni mbe yaka wa gnu pe ndie na. Sisampefɛɛnlɛ wa pe ta mbe fiŋge na nyjila ŋga ni ndaa lefɛɛnlɛ wɔ mu pe ŋga fa, 11 a pra pe fiŋge mu pan mu su aŋga na kre. Mbe ti mbe wejiŋge nyjii e na e loŋgoolo kɛɛ. O Tafun Nyiɛkpɔɔ wre titi wra u nyu yo na we mu ŋga lawee mbe mu tni.
12 Na maa ku, a pe sɛ mu le mu tolɛɛlɛ pre lehaa kre, mbe mu biile pre wa wɔ mbe u pe ŋunu. A mbe ti u ŋunumu kre yire gbiŋmbi. 13 Wre we nyuŋgo titi sin mbe ni ŋga, a mbe le na u ŋunumu kre we yire nyjila kro nu. 14 Mi mbe pe u lɛ, mbe u pe ni pɔ. A na u sisaa ka pe, mbe ti leele u ndie tini fwa ni. 15 La, mba laa u kro imi na ndaa laa Saul kro, mna tia mna pan mu pe ŋunu kre. 16 Mu kɛ leele we nɛɛ, a mbe ti mbe mu ŋunumu lie kre yire nyjila kro nu, a yaka wa jaa mu jɔɔn kre jɔŋgɔ.”
17 Nathan na kee nyjɛ Nyiɛkpɔɔ yo u pan yire kro bɔ David pan.
David Nyiɛtalaa
18 A Ŋunu David na sɛ le o Tafun Nyiɛkpɔɔ lawee, yoŋgo nyuŋgo kre nu, mna nyiɛtali mbo, “O Tafun Nyiɛkpɔɔ, ni sele leele lɛ mblɛ haa kuraa, a mu mi pe imi hin? 19 A fuŋga kuraa mu tataara pini na yaa. Kee nyjɛ mu jawa na ni nanae ni mbe kɔɔ yi pe kro, mu tia ndro yi nya mu yo ni pan, kena pan ŋu na leele kro pini imi ŋgaa? 20 O Tafun Nyiɛkpɔɔ, kee ŋgi mbe yo na hin? Mu sumifun wi mi, a mu ni chin. 21 Mu chaara na mu yire mu yire kee nyjɛ krɛrɛ pe. Mu yire kekpɔɛ nyjɛ krɛrɛ pe, mbe yire yi na mbe ni nyina ŋga mbe pe. 22 O Tafun Nyiɛkpɔɔ mu kpɔɔ, ndro n wa mu da na mu ni, o chin na ŋu nunu wi Nyiɛkpɔɔ. 23 A waŋgra ka n wa tra ŋga na mu da na Israel ni. Ŋu mna pe wɔ mu yili pe tnimu ŋga nu pra nyi nu, mu pan mu pe pe mu leele. Kekpɔɛ, na kawako kee nyjɛ mu pe pe na yire tia, mu mɛɛ kpali waŋgra ŋga nu kro. Nyjila ŋga ni praa nɛɛi na yaa kre, mna waŋgrɛ waŋgrɛ na pe sɛɛnlɛ ni pe yiɛ, ŋu mna pe shɔ mu yili Egypt na mu pan mu pe pe mu leele. 24 Mu Israel leele pre pe mu leele nyjila kro nu, a ŋu o Tafun Nyiɛkpɔɔ wre, mu pe pe Nyiɛkpɔɔ.
25 Kena ni Tafun Nyiɛkpɔɔ, mu nyu kee nyjɛ mu yo na mu pe mi na ni sele leele na yire, ti mbe yi pe kpra, mu kee ŋga mu jawa mbe pe kro pe mu ni ŋga. 26 Mbe ki ti mu mɛɛ kpɔɔ nyjila kro nu. Mbe leele yo na, ‘O Tafun Nyiɛkpɔɔ Jaŋgafun wre, Israel leele Nyiɛkpɔɔ wi.’ Mbe ki ti mu sumifun David lawee ta mbe tni nyjila kro nu. 27 O Tafun Nyiɛkpɔɔ Jaŋgafun, Israel leele Nyiɛkpɔɔ, ŋga mu yire kee nyjɛ wɔ mu ni nyina, mu yo ni pan na mu ti mbe ni nanae pe ŋulo kre, kre ki tia ni ja na mu tali kre.