8
Kie pe nyjila ka nu, Ŋunu David na sɛ wi na Philistine leele ni na, mna pe ja mna Gath kakpɔɔ shɔ pe kɛɛ. 2 A wra sɛ wi na Moab leele ni mna pe ja, a wra tia leele mblɛ wra yii tinlɛ pre na sni sni. Na u leele taarɛ wɔ, mbe u shiin gbo mbe nunu ti, kena pe mblɛ u nsra gbo pre na kro mu na u sumi, na swɛ toni na u kaan.3 David na sɛ wi na Zobah ŋunu ni mna u ja. Ŋunu wre mɛɛ naa Hadadezer, a u lɛ mɛɛ naa Rehob. Hadadezer naa shie mbe sɛ Euphrates lɔɔ mbɛɛ tra ŋga wra wi mu shɔ kre le. 4 A David na u soolo nduufɛɛnlɛ kagbenyi kɔɔnashin, na u ŋunɔwifɛɛnlɛ kagbenyi fulo yii. Wra pe sookɛɛ lafaa soolo ti, mna hamblɛ pre panyi saanla.
5 Syria leele mblɛ praa wa Damascus na kre, pra ŋunɔwifɛɛnlɛ wɔ mu tun mbe pe paan ya ŋunu Hadadezer na, a David na wi na pe ni, mna leele kagbenyi fulo na shiin gbo pe nu. 6 A David na ŋunɔwifɛɛnlɛ tnihɛɛ pe pe tra kre nu, a Syria leele naa u sumi, na tra swa toni na u kaan. O Tafun Nyiɛkpɔɔ na tia lawee ŋga nu David naa wii na tro kpan, wraa pe jani. 7 David na Hadadezer loplombo pre swanyiɛ ŋunɔwiyirɛ nyjɛ ni praa peyɛ toni yire shɔ pe kɛɛ, mna pan na yi ni Jerusalem na. 8 A wra swanyiɛ fre yirɛ tataara koli Betah, na Berothai na. Yire kakpɔɛ nyjɛ, Hadadezer wra pe yi ŋunu.
9 Ŋunu Tou ŋmba wra ŋunumu li Hamath na wre na loo na David sɛ wi mu Hadadezer leele gbo peii. 10 Ŋga wra ki loo ma kre, a wra u pɔ Joram tun na u pan mbe Ŋunu David shaari, mbe u ŋga lefɔɔ na u wi mu Hadadezer ja, wre Tou na wi na Hadadezer ni gbee tataara mu pra u na. U pɔ wre na pan na swanyiɛ, na swafiŋge, na swanyiɛ fre yirɛ ni, mna pan mu Ŋunu David kɛ. 11 A David na sɛ yirɛ yire, na swanyiɛ, na swafinyi nyjɛ wra wi mu shɔ leele pan yire ni, a praa o Tafun Nyiɛkpɔɔ wre sumi na yi ni. 12 David yirɛ nyjɛ wra wi mu shɔ yire, Edom, Moab, Ammon, Philistine, na Amalek leele pan wra yi ta, a yi yɛ na pe nyjɛ pra ta mu wru ŋunu Hadadezer pan yire yɛ. 13 Ŋga David na sɛ Edom leele pre gbo Weŋge Landɛɛ kre nu mu pan kre, wra mɛɛ ta mu ya. Wra gbo leele kagbenyi kɛmbɔkɔɔnatarɛ. 14 A wra ŋunɔwifɛɛnlɛ tnihɛɛ pe Edom tra kre nu poŋgo, a leele mblɛ pra kro wa pre naa u sumi. Lawee ŋga nu David na tro kpan, o Tafun Nyiɛkpɔɔ na tia wra wi mu yili.
15 Ŋunu David na Israel leele pre kro le, a wre na pre lalaa na pe chasi, mna tni kpra ni. 16 Joab lo na wi Zeruiah, a wre na wi David ŋunɔwifɛɛnlɛ lopom. A Ahilud pɔ na wi Jehoshaphat, a wre na wi David nyunɔfun. 17 Ahitub pɔ na wi Zadok, a Abiathar pɔ na wi Ahimelech, pe biile pre na lɛ srawɔfɛɛnlɛ, a Seraiah na wi u kala lihaa nyunɔfun. 18 Jehoiada pɔ na wi Benaiah, a Kereth na Peleth ŋunɔwifɛɛnlɛ mblɛ praa David sri kre, Benaiah na wi pe lopom. A David bibilɛ pre na pe u paaranyinafɛɛnlɛ.