2 Na Saul sele sumifun waa wa, a praa u yeeri Ziba, a pra sɛ yo u pan na David u yeeri, a wra sɛ. A David na u wie mbo, “Ŋu pe yeeri Ziba kree?” A wra yo, “ɛnhɛɛn, ni tafun.” 3 A Ŋunu David na u wie mbo, “Kena Saul sele ndro waa wa, mbe ni u pe chichie, imi na ndaa nyu yo Nyiɛkpɔɔ pan kre ŋgaa?” A Ziba na kna mbo, “Jonathan biile pre nunuu wa, la, u fuuru.” 4 A ŋunu na kna mbo, “Sena u nyi hin?” A Ziba na yo mbo, “Uu wa Lo-Debar na, Ammiel pɔ Makir katoo.” 5 A Ŋunu David na ndro tun u pan.

6 A bituŋu wre na sɛ Jonathan pɔ Mephibosheth, Saul nana wre yeeri mu pan, a wra sɛ kosie kan Ŋunu David yiɛ. A David na yo u pan mbo, “Mephibosheth.” A wra shɔ mbo, “Ni tafun.” 7 A wra yo u pan na, “Maa fiɛ, mu lɛ Jonathan ndra na, mbe mu pe chichie. Mu tolɛɛ tra ŋga wra ta kre kro, mbe ki ndro mbe mu ŋga. A nyjila kro nu mu jaa pan mbe o chaa mbe li ni katoo mna.” 8 Mephibosheth na ndru mu kosie kan David yiɛ mna kna mbo, “Ndro ŋmbi wi mi a mna chaa mbe ni pe chichie ŋga nyini hin? Mi wi ŋmba na nyukuan gboo wi.”

9 A ŋunu na Ziba, Saul sumifun wre yeeri mna yo u pan mbo, “Aŋga mu tafun Saul na u sele leele yirɛ nyjɛ yii wa ni pan kro, ni yi wrui mbe u nana Mephibosheth ŋga. 10 Kena ŋu na mu bibilɛ, na mu sumifɛɛnlɛ pre kro, e sɛ tra kre fali, e sro cha e pan mbe mu lopom Saul nana wre ŋga, mbe u ta mbe u biile pɔɔri. La, Mephibosheth titi rɛ, mi na wre we na chaa mbra lii.” Na Ziba bibilɛ kɛmbɔkunɔ, a u sumifɛɛnlɛ fulo. 11 A Ziba na yo mbo, “Kee ŋga ni tafun yo kro, mbe ki pe.” 12 Mephibosheth naa wa biblɔ fiɛn wa ni, a praa u yeeri Mica. A Ziba katoo leele pre kro na kaari Mephibosheth sumifɛɛnlɛ. 13 Kra tia Mephibosheth ŋmba jeelee shiin yira kuari kre na tni Jerusalem na, a wre na ŋunu naa chaa na lii.