David Na Ammon Na Syria Leele Ja
10
Kraa wa wa a Ammon ŋunu Nahash na ku, a u pɔ Hanun na pan mu jɔɔn li. 2 A Ŋunu David na yo mbo, “Mbe Nahash pɔ Hanun wre pe chichie, imi na u lɛ na ni pe kre.” Ki tia David na leele tun a pra sɛ u lɛ kumu na, mbe sɛ u ŋga o kro atɛ. Ŋga bitumblɔ pre na le Ammon tra nu kre, 3 bawa Ammon loplombo pre na sɛ yo ŋunu wre pan mbo, “Mu jawa na imi mu lɛ na David na nyi kre ki tia u leele tun na pe paan mu ŋga o kro atɛ ree? Maa shia ki jawa ma. Leele mblɛ, tuun u pe tun mbe pe paan o le mbe sɛ yo u pan, mbe u paan wi na o ni, mbe o ja.”4 A Hanun na David bitumblɔ pre yii, mna pe nyutanyooro yɔ, mna yɔɛ klu, mna pe dodonyi wla mu yire pe jeelee na mu pan mu su pe sɛlɛ, mna pe wa a pra sɛ. 5 Ŋga praa shie kre, na nyifɛɛrɛ pe kuu na pie ndruu sɛ katoo. Ŋga David na kee ŋga pe u bitumblɔ pre pe kre loo kre, wra tia pra sɛ yo pe pan na, pe tni Jericho na mbe sɛ su na pe nyutanyooro yire we tɔ.
6 Ammon leele pre na chin na pe David kaari pe loŋgo, ki tia pra sɛ Syria ŋunɔwifɛɛnlɛ kagbenyi fulo wru Beth-Rehob, na Zobah na, mna kagbenyi kɛmbɔshiin wru Tob na, a Maacah ŋunu na pe ŋga leele kagbeŋge mu ya. 7 David na leele pre yɛ knaa kre loo, mna tia Joab na sɛ na ŋunɔwifɛɛnlɛ pre kro ni mna sɛ wi na pe ni. 8 Ammon leele pre na peyɛ wru mna pan mu yire pe kakpɔɔ ŋga praa yeeri Rabbah kre jlonwee nyu na. A ŋunɔwifɛɛnlɛ mblɛ pra yiri Syria, na Tob, na Maacah na pre na sɛ yire nyaa pe kro haa.
9 Joab na nya na u loŋgoolo pre plɛ we u fni yɛsimi, mbe plɛ yire u kro kre, a wra Israel ŋunɔwifɛɛnlɛ mblɛ pe wi mu chin pre wɔ, a pra yiɛ tɛɛ Syria ŋunɔwifɛɛnlɛ pre pan. 10 A wra tia u chunu Abishai na yiɛklu ŋunɔwifɛɛnlɛ hamblɛ pre ni a pre na yiɛ tɛɛ Ammon ŋunɔwifɛɛnlɛ pre haa. 11 A Joab na yo u pan mbo, “Na maa Syria leele pre nya a pe wɛ ni na, mu pan mu ya ni na, a na mi waa Ammon ŋunɔwifɛɛnlɛ pre nya na pe wɛ mu na, mbe ni paan ya mu na. 12 Gbun ta mu muyɛ yii mbe o wi mbe o leele na Nyiɛkpɔɔ chiɛ yire ŋga. A ŋga o Tafun Nyiɛkpɔɔ chaa ki pe.”
13 Joab na u leele pre na wɛ Syria ŋunɔwifɛɛnlɛ pre na, a pra fɛ. 14 Ŋga Ammon leele pre na nya na Syria ŋunɔwifɛɛnlɛ pre feni kre, a pre na fɛ Abishai yiɛ na, mna sɛ le chia kre lam. A Joab na laa Ammon leele pre kro mna ndru mu pan Jerusalem na.
15 Syria leele pre na nya na Israel leele pe ja kre, a pra pe ŋunɔwifɛɛnlɛ pre yeeri a pe kro na sɛ fni titɛɛ. 16 A Ŋunu Hadadezer na leele tun Syria leele mblɛ praa wa Euphrates lɔɔ kro pre pan, na pe pan, a pra pan mu fni Helam na. Ŋunu wre soja lopom ŋmba praa yeeri Shobach wre wra pe yiɛklu. 17 Ŋga David na kre kee ŋga loo kre, a wra Israel ŋunɔwifɛɛnlɛ pre fni, a pra Jordan lɔɔ kre taan mu kun, mna sɛ le Helam na, bawa Syria leele pre na yiri mna u fni, a pra wi chichie. 18 A Israel ŋunɔwifɛɛnlɛ pre na Syria leele pre ja, a pra fɛ pe yiɛ. David na u ŋunɔwifɛɛnlɛ pre na Syria sookɛɛ nduufɛɛnlɛ lafɛɛ kɔɔnashin gbo ki ble kre, mna soonduufɛɛnlɛ kagbenyi fuloe shiin gbo mna Shobach pra, a wra ku pe wihaa wa. 19 Ŋga Hadadezer ŋulo bɛɛlɛ mblɛ praa wa u jaara pre na nya na Israel leele pre pe ja kre, a pra sɛ nyu nunu pe na pe ni, mnaa pe sumi. Kra tia fiɛrɛ na Syria leele pre yii na pie ya Ammon leele pre na na.