David Na Bathsheba
11
Ŋga yɛlɛ kre na tro, a nyjila ŋga ni ŋulo shie ŋunɔ na da kre, David na Joab na u loplombo pre, na ŋunɔwifɛɛnlɛ pre kro tun, a pra sɛ wi na Ammon leele pre ni mna pe ja, mna sɛ Rabbah chia kre tɔ, mu pe fɛ mu kun. La, David nsra ka sɛ, wre na tni Jerusalem na.2 Ki ble ka lafo na, na David sni mu nyi, mna sɛ nduu u katoo kre zio ndra na na nyaari na tro. Bawa wra nyi mna chlɔ wa nya na u wru u katoo. Chlɔ wre na nyu titi. 3 A wra u bituŋu tun na u sɛ chlɔ wre le, chlɔ ŋmba nyini wi. A wra sɛ pan mu yo u pan na Eliam pɔ ŋmba pe yeeri Bathsheba, Hittite ndro ŋmba pe yeeri Uriah chɔ wre wi. 4 A David na bitumblɔ tun na pe sɛ pan na chlɔ wre ni, a pra sɛ pan na u ni, a wra sni na u ni. Na chlɔ wre paaraa kɔ, a u paala kee nyjɛ yi fna pe to, mu kɔ. Ŋga wre na David na sni mu kɔ kre, a wra yili mu sɛ katoo. 5 Kraa wa wa a chlɔ wre na nya na paaraa tro u na, a wra tia pra sɛ ki yo David pan.
6 A David na pɔ tun Joab pan mbo, “Ti mbe Uriah Hittite ndro wre pan.” A Joab na tia pra sɛ Uriah yeeri mu pan mu David ŋga. 7 Ŋga Uriah na pan kre, a David na u wie imi Joab na wifɛɛnlɛ pre nyi, na imi pe wii mu da. 8 A David na ndru mu yo u pan mbo, “Sɛ sni mu wuu chiɛri.” A Uriah na flo ŋunu yiɛ na wa maa to, a ŋunu na tia pra sɛ yirɛ ni mbe sɛ u ŋga katoo. 9 La, ŋga Uriah na yili wa kre, u nsra sɛ katoo, wra kro ŋunu katoo shiefɛɛnlɛ pre nu, mna sni wa. 10 Ŋga David na loo na Uriah n sɛ katoo kre, a wra u wie mbo, “Mu sɛ katoo mu ndru mu pan too? A ŋga mu yili chia ki mu, kena ndru mu sɛ katoo.”
11 A Uriah na kna mbo, “Israel leele pre, na Judah leele pre kroo wa na ŋunɔ wii, a Nyu Nunu Daka kree wa pe pan, a ni lopom Joab na u loplombo yiɛɛ wa mu nyina nyaa lalaa wa, mni mbe ni sɛ tni katoo, mbe li, mbe gbɔ, mbe sni na ni chɔ ni hin? Ŋga muu wa na le ŋga, ni da na mba jaa kre kee ŋga pe.”
12 A David na kna mbo, “Kena tni mna baŋga mbe ni mu wa kolo mbe mu sɛ.” A Uriah na tni Jerusalem na ble shiin. 13 A David na u yeeri lihaa, mna u ŋga simi a wra gbɔ. Ki ble kre blee chɔɔ Uriah nsra sɛ katoo, ŋga ble na wɔ chɔɔ, a wra sɛ u dɛŋglɛ chan ŋunu shiefɛɛnlɛ pre nyuŋgo mu sni.
14 Ŋga nyiŋge na se bnimi kre, a David na hlɛ nyunɔ mna Uriah ŋga na u sɛ Joab ŋga ŋunɔ lawee wa. 15 Kee nyjɛ yiraa wa hlɛ kre nu na yi kre, “Ti mbe Uriah yire ŋunɔ wifɛɛnlɛ pre yiɛ. Ti u yire mna ŋunɔ kre wɛɛri titi kre nu, mbe e laa u kro, mbe pe u gbo.” 16 Kena ŋga Joab na u leele pre na chia kre fɛ mu kun ma kre, mna wra nya na loŋgoolo pre nyu wɛɛri titi kre, bawa wra tia Uriah na sɛ yire. 17 A loŋgoolo wifɛɛnlɛ pre na yili chia kre na mna pan mu wi na Joab ŋunɔwifɛɛnlɛ pre ni, pra David leele pre plɛ gbo, mna Uriah gbo mu chaa.
18 A Joab na tia pra sɛ ŋunɔ kre mandiɛ bɔ David pan. 19 A wra yo bituŋu wre pan na, “Na maa sɛ ŋunɔ kre mandiɛ bɔ ŋunu pan mu kɔ kre, 20 aada u krɔ we kun, mbe u mu wie na, ‘Mni a e na mbra chia kre na, na wii hin? E n chin na pie jaa yire pe buŋgo kre na mbra e waari na snimi ni ra? 21 E n sɔɔnri na pan Gideon pɔ Abimelech na pe, a pra u gbo kree? Thebez chia kre na chlɔ na yire buŋgo na mna u wa yirɛ tre dnɛ ni mna u gbo. Mni a e sɛ mbra chia kre na ma hin?’ Na ŋunu waa e wie ma, e yo u pan na pe u sumifun Uriah gbo na.”
22 A bituŋu wre na sɛ David bɔ mandiɛ, mna kee nyjɛ Joab na yo u pan na u sɛ yo yire kro bɔ. 23 Mbo, “O loŋgoolo pre sheli mu wɛ o na, ki tia pra yili pe chia kre na mu pan mu wi na o ni fimi na, la, o na pe ni mu sɛ da chia kre jlonwee nyu na. 24 A pra yire pe buŋgo kre na mu o waari na snimi ni, mu mu loplombo pre plɛ gbo, mu mu sumifun Uriah gbo na.”
25 A David na yo bituŋu wre pan na sɛ Joab le gbeŋmbaa, mu yo u pan na waa kawa na ki ni. Ŋgi ndra na? Na mu shie ŋunɔ, ma jaa chin ŋmba we to wa. E faŋga fɔŋgɔ tɛɛ e sɛ wi na pe ni e chia kre shɔ.