Nathan Na David Yiɛ Kee Yo U Pan
12
O Tafun Nyiɛkpɔɔ na u kee nyanyofun Nathan tun David pan, a Nathan na sɛ yo u pan mbo, “Bilɛ shiin plɛ naa wa chia ka na, nunu naa swa ni, a nunu na shian. 2 Swafun wre naa wa na nui na mbaala ni kama. 3 A shianfun wre na mbɔɔpɔ nunu wa lɔ. Wra mbɔɔpɔ wre le a wra yiri. Mbɔɔpɔ wre na blɔ wre biile praa wa u katoo. Wre titi sro ŋga wraa lii ka wraa u kaan, hali wraa gboo wre titi gbɔyira nu, mnaa u wru na taari jeelee na. Pan mbɔɔpɔ wre na pe u pan na u pɔ chlɔ wi. 4 Ki ble ka a swafun wre na fuŋu ta, la, swafun wre nsraa chaa mbe wre titi yurɛ pre wa tɛɛ mbe sro pe mbe fuŋu wre frɔ pe. A wra sɛ shianfun wre mbɔɔpɔ nunu chom wre yii, mu u fuŋu wre frɔ pe.”5 Ŋga David na kee kre loo kre, a u krɔ na kun na swafun wre ni. A wra kna mu yo Nathan pan mbo, “Ni o Tafun Nyiɛkpɔɔ wre da na, wre blɔ ŋmba u kre kee kre pe wre fna mbe pe u gbo. 6 Ŋga u kre ndra shelee kee ŋga nyini pe kre ndra na, ki fna mbe u mbɔɔpɔ wre fɔlɔ tɔ ma gbee jijirɛ mbe u tafun wre ŋga.”
7 A Nathan na kna mbo, “A ŋu wi wre blɔ wre. Kee ŋga o Tafun Israel Nyiɛkpɔɔ wre yo ni yo mu pan yi kre mbo, ‘Mi ni mu pe ŋunu Israel leele nu, mu mu shɔ mu yili Saul kɛɛ. 8 Ni u ŋunumu, na u chiɛlɛ wru mu mu ŋga. Mi ni tia mu ŋunumu li Israel na Judah leele na. Na mna yo ni pan na mu chaa mbe wɛ ma na kre, mbe na mu ŋga ma na gbee shiin mbra ya. 9 Kena yira ŋgi ki tia mu ndikana pe ni kee na ŋga hin? A mni a mu sɛ sisaa ŋga nyini pe ma hin? Mu Uriah gbo ŋunɔ. Ŋu mu tia Ammon leele u gbo, a mu u chɔ wru. 10 Mu kɛ leele mblɛ pie yiri kpan, pie wejiwrɛ kumu ku, ŋgi na hin? Mu ndikana pe ni kee na, mu sɛ Uriah chɔ shɔ mu leŋge. 11 Ni da na mbe ti mu sele ndro titi kala pe mu na, mu nya na ni mu chiɛlɛ pre wru mu mu ŋmbrɔ ŋga, mbe u sni na pe ni lafo cheche na. 12 Mu sisam kre ndra mu pe, la, kre kee ŋga rɛ, mbe ti mbe ki pe lafo na mbe Israel leele kro ki nya.’”
13 A David na yo mbo, “Ni sisaa pe mu o Tafun Nyiɛkpɔɔ wre taan.” A Nathan na kna mbo, “O Tafun Nyiɛkpɔɔ wre mu sisam ti mu mu kɛ, wa mu gbo na. 14 La, ŋga mu tia loŋgoolo o Tafun Nyiɛkpɔɔ wre le fiɛn, mbe jini kee yo u na kre ndra na, mu pɔ wre we ku.” 15 A Nathan na sɛ katoo.
David Pɔ Na Ku
O Tafun Nyiɛkpɔɔ na tia pɔ ŋmba Uriah chɔ na se mu David ŋga wre na yaa. 16 A David na nyiɛtali mbe Nyiɛkpɔɔ ti u saanla. David na je na wa yaka le nyuu, a na ble wɔ mbe u le nyuŋgo to mbe sni tra lam. 17 Na ki pan ma mbe u kalalihaa loplombo pre sɛ na u tali mbe u yiri tra, mbe u je, a wa yaka le nyuu. 18 Ble kɔɔnashin ble na, a pɔ wre na ku, a David loplombo pre na fiɛ na pie ki yo u pan. A praa yuu mbo, “Nyjila ŋga ni pɔ wre le kuraa, na o paara na u ni wa nyu kun na o ni. Mni oo pe mbe sɛ yo u pan na pɔ wre ku hin? Na o n dɔɔta we u uyɛ pe kala sisaa ka.”
19 Ŋga David na pe nya na pe juu na paara na peyɛ ni kre, wra chin na pɔ wre ku, a wra pe wie mbo, “Pɔ wre ku ra?” A leele pre na yo mbo, “Ɛnhɛɛn u ku.”
20 A David na taan mu yiri tra wa, mna sɛ weli, mu u ndra saanri, mna u dodonyi chinɛ. Mna sɛ sumi o Tafun Nyiɛkpɔɔ wre nyuŋgo. Ŋga wra yiri wa mu pan kre, a wra tia pra u ŋga sro a wra li to, titɛɛ kre nu. 21 A u loplombo pre na yo mbo, “O n kre kee ŋga ŋunu pe ŋga nɔɔloo. Nyjila ŋga ni pɔ wre naa wa na le kre, mna nyɛni chiin, ma li, a u ku to, a mu yiri mu sro li.” 22 A David na yo mbo, “Yɛŋgɛ yi, nyjila ŋga ni pɔ wree wa na le kre, ndaa ble fun mu nyɛni. Ni jawa na aada o Tafun Nyiɛkpɔɔ we nyu ni na, mbe pɔ wre wa ku. 23 La, ŋga u ta mu ku ŋga, ki n shian na mbe ble fun na. Mbe jaa ti pɔ wre ndruu pan na ree? Mi mbe u kɔŋgɔ ni wa brikana, wre wa jaa ndruu pan ni pan na fio.”
Solomon Se Haa
24 A David na u chɔ Bathsheba gbun nyiŋge. Wra sni na u ni mna pɔ blɔ se, mna u mɛɛ tɛɛ Solomon. O Tafun Nyiɛkpɔɔ naa pɔ wre kee chaa. 25 Ki tia wra yo Nyiɛkpɔɔ kee nyanyofun Nathan pan na u pɔ wre ŋga Jedidiah, ki nɔɔ nyina na “ŋmba Nyiɛkpɔɔ kori.”
David Wi Mu Rabbah Shɔ
26 Na Joab wa na wii na Ammon leele ni Rabbah na wa tɛ, na chaa mbe pe kakpɔɔ kre shɔ, 27 a wra yire wa mu leele tun David pan mbo, “Ni wi mu Rabbah chia kre nyumu lawee yire kro shɔ. 28 Kena ŋunɔwifɛɛnlɛ hamblɛ pre nyu ble mu pan mu chia kre shɔ, ni n na chaa mbe ki shɔ mbe mɛɛ kre taa ni na.” 29 A David na u leele pre hamblɛ wru a pra sɛ Rabbah na, mna sɛ wi na pe ni mna pe ja. 30 A wra pe ŋunu wre juulee laa u ndra na, mna juule. Swanyiɛ ni pra juulee kre gbeele, mna dnɛ chichiele le ki nu. Ki snamu naa kilo fulo na kɛmbɔjijirɛ. David na yirɛ tataara ta mu foolo wa mu ya. 31 A wra tra kre leele yii a pra sɛ na fali, na tofae kuun pe pan, na tɔɔnrɔ tnumu ŋga mu chin ŋga kro tuni. A Ammon chiɛ hɛnyi yire leele mblɛ pra yii pre, tnumu nunu kre pe kro naa tuni. Ŋga kra pan ma kre, David na u leele pre na ndru mu sɛ Jerusalem na.