Amnon Na Tamar
13
David pɔ Absalom naa wa na jaa chichuo wa ni a praa u yeeri Tamar. David biile pre wa naa wa pra a u yeeri Amnon, wre lo naa uyɛ, a wraa Tamar chaa. 2 Amnon naa u lɛ pɔ Tamar wre chaa mu tro. Kra tia ŋga wra nya na u n na kolo taa mbe u cha kre, kra u gbun yira ni, a na pɔ wre n blɔ chin, na pe u tɔ bilɛ na. 3 Amnon naa wa na nunu wa ni, a praa u yeeri Jonadab, David nyjɔ ŋmba praa yeeri Shimeah wre pɔ na wi. 4 A Jonadab na Amnon wie mbo, “Ŋunu pɔ wi ŋu, a blenyini ŋga ni mu nyaa mna jiin gbrumm, yira ŋgi ki mu ta hin?” A wra kna mbo, “Ni lɛ pɔ Absalom jaa Tamar wre ni chaa mbe sni.”5 A Jonadab na yo u pan mbo, “Muyɛ pe na mu yaa a ki sheli, mu sni. Na mu lɛ waa pan mu mu shaari, mu yo u pan na, ‘Ndoo, jande yo ni jaa Tamar pan mbe u paan sro pe mbe ni ŋga. Ni chaa mbe u sro kre pe ni jaara mna, mbe wre titi ki le ni nyuu.’” 6 A Amnon na uyɛ pe na u yaa, mna sɛ sni. Ŋunu David na sɛ u le haa, a Amnon na yo u pan mbo, “Ndoo, jande yo Tamar pan mbe u paan sro fiɛn ka pe mbe ni ŋga, ni yiɛ na mna, na u kɔ mbe u ki le ni nyuu.”
7 A David na tia pra sɛ yo Tamar pan ŋunu katoo mbo, “Sɛ Amnon pan u katoo mu sɛ sro pe mu u ŋga.” 8 A Tamar na sɛ u nya na uu wa mu sni dɛŋglɛ na, a wra sɛ mimi wɔ, mna sɛ sro pe u pan. Mna wraa sro kre pini kre, Amnon naa u nyaa. 9 Wra yirɛ kla, mna yi wɔ mu le yira nu mu tɛɛ u yiɛ, a wra yo wa ka, mbo, “Leele pre ni mu yili fimi na, a pe kro na yili.” 10 A Amnon na yo u pan mbo, “Flo mu da na yi ni ni na, mu yi le ni nyuu.” A Tamar na yirɛ yire wru mna flo mu da u na. 11 Ŋga wraa yi leni u nyuu to, a wra u fa mu yii mna yo u pan mbo, “Ti mbe o sni.”
12 A Tamar na yo “Ɔɔhɔn, maa ti mbe ni kre nyifɛɛrɛ kee ŋga pe jaŋga na. Mu chin imi na ki pe sisam kee mu da, na mu kre kee ŋga nyini pe Israel leele nu.” 13 Na ki pan ma, mni mbe pe mbe ndra yire lenɛɛrɛ nu hin? A na ki pan ma kuraa, nyifɛɛrɛ we mu gbo Israel leele nu. Kena jande, ni kee yo ndoo pan, ni shɔnli na we ni wru mbe mu ŋga. 14 Kee ŋga Tamar naa yuu kre nsra le u ndie, a na wra sheli mu wɛ u na, a wra u fɛɛri mna u cha jaŋga na.
15 Ŋga kra pan ma mu kɔ kre, Tamar kee na Amnon bin titɛɛ kre nu, hali u kee na u bin kuraa mu wɛ imi na wraa u chaa jle kre na. A wra fuu Tamar na, mbo, “Yili mu sɛ!”
16 A Tamar na kna mbo, “Mba sɛ, kolo ŋga na mu ni nini ŋga kuraa pe linku kee mu wɛ kefɔɔn ŋga mu klu mu ni pe kre na.” Amnon nsra ndie tɛɛ u pan. 17 A wra nyu choŋgi mna u sumifun yeeri mbo, “Pan mu chlɔ ŋmba yile fimi na, mbe ni u cha mbe la. U fulo mu wa fimi na, mu krɔ kre kan.” 18 A u sumifun wre na u yile fimi na, mna krɔ kre yii mu kan. Kre nyjila kre na dodoŋgi titnɔŋɔ kɛnyi titnɔnyi ka Tamar le. Yire dodonyi yire nyini, ŋunu bichiɛlɛ mblɛ pe n bilɛ chin pre naa leni kre nyjila kre nu. 19 A Tamar na sɛ tɔɔnrɔ ko mu u ndra fa, mna u dodoŋgi kre tini mu wla uyɛ na, mna yiɛ juule kɛ lam na nyɛni na shie.
20 Ŋga u lɛm Absalom na u nya ma kre, a wra u wie mbo, “Mu nya ŋga Amnon mu kla mbe? Jande, maa ti ki mu tɔɔra kpɔɔ, mu chin na mu lɛ pɔ wi. Kena maa shia ki yo mbe ndro loo.” A Tamar na kro Absalom katoo, mna tni wa wre nunu na fooro lii. 21 Ŋga Ŋunu David na kee kre ki pe kre loo kre, u krɔ na kun kpɔɔ. 22 Kra tia Absalom krɔ na kun na Amnon ni, na u u jaa Tamar kla, ki tia u nsraa paara na u ni.
23 Yɛlɛ shiin kɔkro kre, Absalom na sɛ na u mbaala yooro knumu Baal Hazo, chia ŋga ki mbra Ephraim chia kre na. Bawa wra yire mna ŋunu bibilɛ pre kro yeeri na pe pan. 24 A wra sɛ yo u lɛ pan mbo, “Ni tafun, mu pɔ sɛ na u mbaala yooro knumu, kena ti mbe ŋu na mu loplombo, na mu sumifɛɛnlɛ kro pan mbe pe le.”
25 A ŋunu na yo mbo, “Ɔɔhɔn ni pɔ, na o kro yo oo pan wa, kie sheli mbe mu ŋga.” Absalom na je na yuu na pe sɛ. A ŋunu na je mna yo, na u yili mbe sɛ.
26 Absalom na yo u lɛ pan mbo, “Kena ti mbe Amnon ka pan.” A ŋunu na yo u pan mbo, “Ŋgi na mu chaa mbe u ka pan hin?” 27 Absalom na kro mu paara chiin mna sɛ su na David na pni shɔ na Amnon, na u bibilɛ hamblɛ pre kro, na Absalom pe sɛ. Absalom na sro ŋga ki fna mbe ŋunu li pe leele pre pan kama mbe pe sɛ li. 28 Wra yo u sumifɛɛnlɛ pan mbo, “E na dɔɔ taa, na e waa nya na Amnon gbɔ mu to kre, mbe yo e pan na e u gbo, a yaa shia fiɛ. Mbe ki kee kro shɔ mbe taa niyɛ na, kena e gbun ta e u gbo.” 29 Absalom sumifɛɛnlɛ pre na li u kee kre na, mna Amnon gbo. A David biile hamblɛ pre na pe bubunlɔ wru mu fɛ.
30 Ŋga praa shie katoo kre, pe nsra ta mu le, a David na kee kre loo na Absalom David bibilɛ pre kro gbo, hali ndro nunu chom kuraa n kro. 31 A ŋunu na yiri mu yire, mu u dodonyi tini mu wla na fooro ni, mna to tra. A u sumifɛɛnlɛ mblɛ praa wa wa pre, na pe dodonyi tini mu wla peyɛ na na. 32 Bawa David nyjɔ Shama pɔ ŋmba praa yeeri Jonadab wre na pan mna yo David pan mbo, “Ni tafun, pe n mu biile pre gbo kro, Amnon chiin u ku. Tolɛɛ, mu jaa kre kee ŋga nya Absalom yiɛ na, mu yire ŋga ble Amnon na u jaa Tamar cha kre. 33 Kena na ndro pan mu yo mu pan na, pe mu bibilɛ pre gbo kro kre, maa shia ki shɔ mbe li. Amnon chiin pe gbo.”
34 Absalom na yire wa mna fɛ mu sɛ ndra. Praa wa David katoo wa to, a ŋunɔwifun ŋmba u katoo kre sri wre na nya na leele plɛ taa peyɛ na tataara na paan. Nyua kolo ŋga ki yiri Horonaim na kre pra yii na paan, a wra fɛ mna sɛ leele pre u nya pre mandiɛ bɔ ŋunu pan. 35 Bawa Jonadab na kna mu yo David pan mbo, “Mu bibilɛ pre pe paan kre, ni n ki yo na pie paan?” 36 Ŋga wra paara a u nyu na to to, a u bibilɛ pre na le katoo, a pra gble fɔɔri mu le, a David na u loplombo pre kro na nyɛni chichie.