2 Samuel 14

Absalom La David Ta

Joab na nya na Absalom la ŋunu David ta. 2 A wra ndro tun a wra sɛ chlɔ kachiŋu wa wru Tekoa na mu pan. Ŋga chlɔ wre na pan kre, a Joab na yo u pan mbo, “Mu kumu yonyi paari, mu mu ndra saanla mu wa, mu muyɛ pe na nyɛni mu nyɛni. Pe na mu nyɛni chiin a sra wɔ mu na. 3 Mu sɛ kee ŋga mbe yo mu pan ŋga yo ŋunu pan.” A Joab na kee ŋga u chaa mbe chlɔ wre sɛ yo kre yo u pan.

4 A chlɔ wre na sɛ ŋunu David pan mna sɛ kosie kan u yiɛ mna yo u pan mbo, “Ni tafun, jande ya ni na.”

5 A wra chlɔ wre wie mbo, “Yira ŋgi mu chaa hin?” A wra yo mbo, “Lekuchɔ wi mi, 6 a ni plɔ na ku mu bibilɛ shiin ti ni pan, ki ble ka pe kro shiin na sɛ ta nyaa, a ndro nsraa wa wa mbe pe shɔ. Kra tia nunu na u ŋmbrɔ gbo. 7 Ni tafun, fuŋgaami, ŋga ki pan yi na, ni sele leele kro yo na ni pan na pɔ haŋu wre ni mbe pe u gbo, mbe fɔlɔ tɔ. A na pe pɔ wre gbo, kena pɔ n wa ni pan na. Na pe pe ma pie ti mbe ni dankna kro kɔ, a ni plɔ wre mɛɛ we fun, ŋgi na hin? Pɔ wa wa pe u mɛɛ na na.”

8 A ŋunu na kna mbo, “Ndru mu sɛ katoo, mbe kee kre le mbe ki yo.”

9 A chlɔ wre na yo mbo, “Ni tafun, kolo ŋga na mu tro kpan, tro ki na, la, kala ŋga kie pan ki nu kro, mi na ni sele leele we ki shɔ mbe ta, mbe ki laa ŋu na mu sele wolo na.”

10 A ŋunu wre na kna mbo, “Na ndro waa kee ka yo mu na, mu pan na u ni ni pan mna, ufun wa sroo da mu na na.” 11 A chlɔ wre na yo mbo, “Ni tafun jande, mu Tafun Nyiɛkpɔɔ wre tali mbe ni sele leele mblɛ pe ni pɔ wre chaa mbe gbo mbe fɔlɔ tɔ pre, waa shia u gbo mbe linkuuro kee pe.” A David na kna mbo, “Ŋga o Tafun Nyiɛkpɔɔ wree wa ŋga, yaka n wa mbe mu pɔ wre ta.”

12 A chlɔ wre na yo mbo, “Ni tafun jande, ti mbe ni kee nunu ŋga yo mu pan.” A ŋunu na yo mbo, “Ta yuu ni ndru.”

13 A wra kna mbo, “Tolɛɛ, mni a mu kee fɔɔn ŋga nyini pe Nyiɛkpɔɔ leele na, a mu pɔ fɛ mu to nyaa, a mu n tia u ndru mu pan katoo hin? Kena kee ŋga mu yo fuŋgaami ŋga tia mu muyɛ gbun na pimi ni. 14 O kro we ku, pan oo pe na nyumu ŋga ki kna mu wo yi, kia jaa ndru mbe koli. A leele mblɛ pe ku pre Nyiɛkpɔɔ wa ti pe ndru mbe pan ŋmaa ŋga nu na. La, ŋunu we jaa tro kolo ka na, mbe u pɔ ŋmba u fɛ mu sɛ waŋgra ka nu wre jaa pan katoo. 15 Ni tafun, ŋga ki tia ni pan na paara mu pan yi na, leele pre tia ni fiɛ, a ki tia ni pan mu pan mbe mu ni shɔ mbe wa. 16 Ni jawala ni pe na na mu ni kee kre loo, mu mi na ni pɔ wre shɔ mblɛ pe o chaa mbe gbo, mbe o wɔ tra ŋga Nyiɛkpɔɔ u leele ŋga kre nu pre kɛɛ. 17 Ndaa ki yo ni jawala nu na mu nyu kee we ni shɔ. Ŋgi na hin? Pan ŋunu nyi na Nyiɛkpɔɔ bituŋu wi, u sisaa na chichie lalaa chin. Tolɛɛ, ŋu na o Tafun Nyiɛkpɔɔ wre e tni.”

18 A ŋunu na yo mbo, “Ti ni mu wie kee ŋga, mbe mu ki kpra yo ni pan.” A chlɔ wre na kna mbo, “Ni tafun, ni wie.” 19 A ŋunu na kna mbo, “Joab ma u mu tun na yire kee nyjɛ nii?” A chlɔ wre na yo mbo, “Tolɛɛ ni mu da, mba jaa kee ŋga mu yo ŋga kaala, yɛŋgɛ yi, Joab u tia ni pan mu mu wie yire kee nyjɛ. 20 Chaa Joab chaa mbe mu kee kre nya kolo fɔŋgɔ na, kre ki tia u ki pe ma. La, mu kala chin na Nyiɛkpɔɔ bituŋu wi, na kee kro nyaa.”

21 Mbakɔ ŋunu na yo Joab pan na, “Ni jawa na mbe kee ŋga mu chaa kre pe mbe mu ŋga, sɛ Absalom wru mu pan katoo.”

22 A Joab na kna to, mu yiɛ juule tra ŋunu yiɛ mna yo u pan mbo, “Ni tafun, O Tafun Nyiɛkpɔɔ wre u mu dwan. Fuŋga ni chin na mu yiɛ shɔ ni na. Ŋgi na hin? Kee ŋga ni chaa kre, mu ki pe mu ni ŋga.” 23 A Joab na yiri mna yiɛ le Geshur na, mna sɛ Absalom wru mu pan Jerusalem na.

24 Ŋunu na yo na Absalom waa shia le ŋunu katoo wa, mbo, “Ni n na u chaa mbe nya nyini ni. Ki tia Absalom na sɛ tni u katoo, a u nsra da mu yili ŋunu yiɛ na.”

Absalom Na David Na Peyɛ Gbeele

25 Israel leele nu, ndro nsraa wa mna nyu mu da na Absalom ni, mu yire u jeelee na mu sɛ su u ndra na, nɛɛrɛ ka nsraa wa u na. 26 U ndra nyjure na nɛɛ, a kra tia wraa yi klu yɛlɛ nyu, yɛlɛ nyu. A na yi tɔ kama a u yi knumu yi snamu naa dani kilo shiin. 27 Absalom bibilɛ naa shiin, a u bichlɔ naa nunu a u mɛɛ na Tamar, a wra nyu titi.

28 Absalom na li yɛlɛ shiin Jerusalem na, na wa ŋunu yiɛ nya. 29 Absalom na leele tun Joab pan na u pan mbe u u tun ŋunu pan, a wra je u nsra pan. A wra ndru mu ndro tun shiinwo na, a wra je, u nsra pan. 30 A Absalom na yo u sumifɛɛnlɛ pre pan mbo, “E sɛ Joab yua see ŋga ki mbra ni see na kre le, e kanhun le ki na. A pra sɛ ki le, mna kanhun le ki na.”

31 A Joab na yiri mna sɛ Absalom katoo mna sɛ u wie mbo, “Mni a mu sumifɛɛnlɛ sɛ kanhun le ni see na hin?”

32 A Absalom na yo mbo, “Ŋga ki tia rɛ, ni mu yeeri a mu je paan. Ni chaa mbe mu sɛ ŋunu wie ni pan na, yira ŋgi na u tia ni yiri Geshur na mu pan mna hin? Na ndaa wa mu tni wa kuraa kaa ki prɔ ni pan. Kena ni chaa mbe mu sɛ ŋunu tali ni pan, mbe mi na wre fni, na o waa fni a ni pimi li naa, mbe u ti pe ni gbo.”

33 A Joab na yiri mu sɛ Ŋunu David pan, mna sɛ kee nyjɛ Absalom yo yire yo u pan. A ŋunu na tia pra sɛ Absalom yeeri, a wra pan mu kosie kan u yiɛ mna yiɛ juule tra. A ŋunu na u fa mu yii mna u nyu shiun.