15
Kre kee ŋga kɔ kro kre, Absalom na sɛ soo kɛɛ na soolo cha uyɛ pan, mna bilɛ fuloe shiin na kɛ cha, mblɛ pie na yiɛklu u pan. 2 Na ki pe mbe u gbolo mbe sɛ yire chia kre jlonwee nyu na, kena na leele pre wa kala ta na paan na ki ni ŋunu pan, mbe u ki yo kre, mbe Absalom ndro wre fun yii mbe u wie sele ŋga nu u yiri. Na ndro wre fun waa u nyina sele ŋga nu u yiri kre, 3 mbe Absalom yo u pan mbo, “Mu kee kre tna rɔ, a ŋunu ndro n wa mna mbe mu kee ŋga loo.” 4 Mbo, “Na pra ni wɔ kala lifun ŋga, kaa leele wraa paan na pe kee ni ni pan mbe ndaa yi yuu mbra pe kaan tam.” 5 Kena na ndro da u na maa kosie kan u yiɛ, mbe Absalom sɛ u fa mbe yii mbe u nyu shiun. 6 Yire kee nyjɛ Absalom naa yire wa na leele mblɛ praa paan na kalɛɛ ni ŋunu pan pre pini, a kra tia praa u kee chaa.7 Kie pe yɛlɛ jijirɛ kɔkro kre, a Absalom na sɛ yo Ŋunu David pan mbo, “Ndoo, ni ŋga kolo mbe ni sɛ Hebron na mbe sɛ ni nyu ŋga ndaa yo sra wɔ wa mbe o Tafun Nyiɛkpɔɔ wre ŋga.
8 Nyjila ŋga ni ndaa wa Geshur na Aram tra nu kre, ndaa nyu yo Nyiɛkpɔɔ pan na, na waa tia ni ndru mu le Jerusalem na kre, mbe u sumi Hebron na.”
9 A ŋunu na yo u pan mbo, “Sɛ na wejinyiŋge ni.” A Absalom na sɛ Hebron na. 10 Na Absalom klu mu leele tun Israel tra kre nu kro mbo, “Na e waa bnɔɛ tiŋge loo, kena e na gble leni e na yuu na Absalom ŋunumu li Hebron na.” 11 Leele mblɛ Absalom na kɛ wa mu yeeri Jerusalem na mbe pe sɛ u tɛɛ Hebron na pre naa leele lafɛɛ shiin. La, u nsra u lɛɛ kee yo pe pan, shɔnlie ni pra taa u kro mu sɛ. 12 Nyjila ŋga ni Absalom na sɛ na u sra kre woni kre, a wra ndro tun na pe sɛ Ahithophel yeeri Gilon na mbe pan. Wra pe ŋunu David paaranyinafɛɛnlɛ pre wa. Absalom leele mblɛ wra ta mu taa u kro pre naa nɛɛi na yaa, a kra tia u ndra kee ŋga wraa jawa kre na kpɔɔ mu ya.
David Na Fɛ Mu Yili Jerusalem Na
13 Bituŋu wa na pan mu mandiɛ bɔ David pan mbo, “Mu chin na Israel leele pre kro, Absalom na pe jawala nyjii?”
14 A David na u loplombo mblɛ wre na pre naa wa Jerusalem na pre yeeri, mna yo pe pan mbo, “Ki fna mbe o fɛ, na kre ma waa shɔ Absalom kɛɛ. Kena e eyɛ kna nyaanyaa mbe o sɛ, na kre ma na u pan mu o da mna, we o gbo peii chia ŋga na.”
15 A pe kro na kna mbo, “O loo o tafun, kee ŋga mu yo o pe kpan, kre oo pe.” 16 A David na u sele wolo, na leele mblɛ praa wa u katoo wa kro na peyɛ kna mna yili Jerusalem na, ŋga praa shie kre, wra u bichilɛ pre kɛ ti u ŋunu katoo wa na pra ki sri.
17 Ŋga ŋunu na u leele pre kro naa yilii Jerusalem na kre, pra sɛ yire katoo ka lawee chia kre jenu na. 18 A u loplombo pre na pan mu yire u jaara, a ŋunu shiefɛɛnlɛ pre na tro mu yiɛ klu u pan. A ŋunɔwifɛɛnlɛ lafɛɛ kɔɔnanu mblɛ pra yiri Gath na mu taa u na pre na tro mu taa, 19 a ŋunu na yo Gitt, ŋunɔwifɛɛnlɛ pre lopom ŋmba praa yeeri Ittai wre pan mbo, “Ittai mni a mu taa o kro hin? Ndru mu sɛ ya ŋunu fuŋu ŋmba pie tɛɛ kpan na. Ŋgi na hin? Fuŋu wi ŋu, a mu fɛ mu waŋgra nu mu pan mu tni o nu. 20 A ŋga mu pan mu tni mna kuraa ki n mu, kena ki n fna na mbe ti mbe mu taa ni kro mbra kila mbra tro. Ŋga ni shie ŋga, ni n chin mna ni shie kple. Kena ŋu na mu leele pre e ndru e sɛ, o Tafun Nyiɛkpɔɔ wre u kpra li na e ni, mbe nyu e na.”
21 A Ittai na yo mbo, “Ni tafun, ni da na o Tafun Nyiɛkpɔɔ wre mɛɛ ni na, lawee ŋga nu mu sɛ kpan, mbe taa mu kro, hali na kumu yi, mi na ŋu we sɛ ku.”
22 A David na kna mbo, “Ŋga mu yo kre nyu, e ti mbe o sɛ.” A Ittai na u leele, na pe sele wolo kro na tro, a pe kro na sɛ. 23 Ŋga David na u leele pre naa yilii Jerusalem na kre, chia kre leele pre kro naa nyɛni poŋgo. A pra sɛ Kidron lafolo kre kun, mna yiɛ le fimi tra gbeŋglen kre nu.
24 A Srawɔfun Abiata, na Srawɔfun Zadok, na Levi srawɔfɛɛnlɛ pre kro na Nyiɛkpɔɔ Nyu Nunu Daka kre tio, mna pan chia kre jenu na wa, a pra pan mu ki tuu mu tɛɛ, mna sɛ su na leele mblɛ praa yilii chia kre na pre na yili mu kɔ. 25 A Ŋunu David na yo Zadok pan mbo, “Nyu Nunu Daka kre wru mu sɛ chia kre na. Na o Tafun Nyiɛkpɔɔ yiɛshɔ ni na, brikana we ti mbe ni ndru mbe pan mbe Daka ŋga nya ki lawee, 26 la, na u yiɛ n shɔ ni na naa, kena u ni pe imi na u chaa.” 27 A wra kna mu yo Zadok pan mbo, “Le, mu pɔ Ahimaaz, na Abiata pɔ Jonathan pre wru mu sɛ chia lam na wejinyiŋge ni. 28 Mbe e sɛ tni fimi tra gbeŋglen kre lawee ŋga nu pe Jordan lɔɔ kre kuun kre nu, mbe sɛ su na mbe kee ka ta mbe loo mu pan.” 29 A Zadok na Abiata na Nyu Nunu Daka kre tio mu sɛ Jerusalem na, a pe kro na sɛ tni wa.
30 David na sɛ Olive Nyua kre na, mna sɛ na nyɛni na tro, mna yira tɛɛ mu ndra tɔ na fooro lii, na tro jele waara, a mblɛ pra taa u kro pre na pe ndrɛ tɔ mnaa nyɛni na. 31 Ŋga David na loo na Ahithophel sɛ ya Absalom na kre, wra nyiɛtali mbo, “Jande, o Tafun Nyiɛkpɔɔ, ti mbe Ahithophel jawala kee nyjɛ we Absalom ŋga yire pe waara.”
32 Ŋga David na da nyua kre ndra na, lawee ŋga nu leele naa shie na sumi kre, wra u nunu Hushai, ŋmba wra yiri Arki na, a wraa kaan u na wre fni wa. Na u dodonyi wla u na, a bloŋgo u ndra tɔ poŋgo, a kra nyina na fooro u lii. 33 A David na yo u pan mbo, “Na mu pan mu taa ni kro, kia ya ni na, 34 la, ŋga mu pe mbe ki ya ni na yi na, mu ndru mbe sɛ yo Absalom pan na, mu paan mbe u sumi imi na mna na u lɛ sumi kre. Kena mu gbeŋmba na jawala ŋga Ahithophel we u ŋga kpan, ma yire ki na. 35 Srawɔfɛɛnlɛ shiin pre, Zadok na Abiata we pe wa, kee nyjɛ mu loo ŋunu katoo wa yire kro yo pe pan. 36 Pe biile Ahimaaz na Jonathan wa mu ya pe na, Kena kee nyjɛ mu loo wa yire krɛrɛ, pe tun mbe pe paan yi bɔ ni pan.”
37 A Hushai David nunu wre na ndru mu sɛ chia. Ŋga wraa lee to, na Absalom lee na.