David Na Ziba Kee
16
Ŋga David na tii nyua kre kro chiɛri to, a wra Ziba Mephibosheth sumifun wre fni wa. Ŋga Ziba naa paan kre, wraa paan na bubunlɔ tataara ni, a pe plɛ na paanu lafɛɛ shiin tio mu taa u kro, a plɛ na tinyi sɛnyi ka wee yɛ tio ma pɔmu lafaa, a plɛ na tinyi sɛnyi li wee yɛ tio ma na, pɔmu lafaa, na simi gbɔwo yurɔ hlɛ gbolo nyini, na paan na yi ni. 2 A David na u wie mbo, “A yira ŋgi mu shie mbe sɛ pe tuuro tataara nyjɛ ni hin?” A Ziba na yo mbo, “Tolɛɛ, bubunlɔ pre mu wolo lɛ, mbe ŋu na mu sele leele pre na pe ndru. A tinyi sɛnyi, na paanu yire mu leele pre ka wee yi, a simi kre, na leele pre waa fna fimi tra kre nu, mbe pe ki taa gbɔ.” 3 A David na ndru mu u wie mbo, “Sena Mephibosheth mu lopom Saul nana wre nyi hin?” A Ziba na yo u pan mbo, “Uu wa mu tni Jerusalem na, u jawala u pe na, Israel leele pre we u tolɛɛ Saul ŋunumu kre wru mbe u ŋga.”4 A Ŋunu David na yo Ziba pan mbo, “Le, yira ŋga ki pe Mephibosheth wo kpan, mu wo yi.” A Ziba na kna mbo, “Mu sumifun wi mi, nyiɛ ni tali mbe yɛnyiŋge ta mu pan.”
David Na Shimei
5 Ŋga Ŋunu David na le Bahurim na kre, Saul sele ndro ŋmba praa yeeri Shimei, a u lɛ mɛɛ naa Gera wre na pan mu David fni, na u suni nyjila ŋga ni u paan kre. 6 Ŋga wre na David naa paan mbe fni kre, a wraa David na u loplombo pre waari na dnɛ ni. Na kre nyjila kre na David leele pre na u shiefɛɛnlɛ pree wa mu u wa lalaa. 7 A Shimei naa David suni na yuu mbo, “Flo mna mu sɛ, flo mna mu sɛ, ŋu linkufun, keesɛɛ pefun ŋmba. 8 Ŋu mna Saul ŋunumu shɔ u kɛɛ, fuŋga o Tafun Nyiɛkpɔɔ wre mu fɔlɔ toni, Saul sele leele tataara mblɛ mu gbo kre na. U mu ŋunumu kre shɔ mu le mu pɔ Absalom kɛɛ, ŋu linkufun ŋmba, mu kɔlɔ yi kre.”
9 A Zeruiah pɔ Abishai na sɛ yo David pan mbo, “Ni Tafun, mni a mu tia nyukuan ŋmba na mu suni ma ŋga hin? Ti mbe ni sɛ u ndra kɔ mbe wa.” 10 A Ŋunu David na yo Abishai na u lɛ pɔ Joab pan mbo, “E kee ka ma na ki ni. Ŋgi na hin? Na o Tafun Nyiɛkpɔɔ wre u u tun na u paan ni sun, ŋu wi ŋmbi mbe mu u nyu kaanri hin?” 11 A David na kna mu yo Abishai na u loplombo pre pan mbo, “Mi titi pɔ kuraa u ni chaa mbe gbo kre. Kena ŋgi ki tia Benjamin ndro ŋmba kee ŋga u pini ŋga e fo hin? O Tafun Nyiɛkpɔɔ u yo u ni sun. Kena e u ti mbe wra ni suni. 12 Aada o Tafun Nyiɛkpɔɔ wre we ni kanyana le, mbe ni ŋga chichie ni suŋgɔ ŋga kɔkro.” 13 David na u leele pre naa wa na shie. Nyjila ŋga ni praa shie kre, na Shimei wa mu taa pe kro, mna nduu nyua prɛrɛ kre na na u suni, na pe waari dnɛ ni, na bloŋgo koori na woni pe na. 14 Ŋga ŋunu na u leele pre na da Jordan lɔɔ kre na kre na pe fna kro, a kra tia pra wuu wa.
Absalom Na Sɛ Jerusalem Na
15 Kre nyjila kre nu Absalom na Israel leele mblɛ praa wa u kro pre na sɛ Jerusalem na, Ahithophel naa wa pe nu. 16 Ŋga David nunu ŋmba praa yeeri Hushai wre na Absalom fni kre, a wra gble fɔɔri mu le mbo, “Nyiɛ we ŋunu ndra tun tɔɔnrɔ. Nyiɛ we ŋunu ndra tun tɔɔnrɔ.” 17 A Absalom na kna mu u wie mbo, “Sena mu latam ŋga mu pini David na kre nyi hin? Ŋu na wre n sɛ ra?”
18 A Hushai na yo mbo, “Mba taa u kro. Ŋgi na hin? Ŋmba o Tafun Nyiɛkpɔɔ wre wɔ, a leele pre kro, na Israel leele pre kroo wa u kro kre, wre kro ni nyi. Ki tia ŋu kro ni nyi. 19 Ŋmbi ki fna mbe ni sumi hin? Na ni n ni lopom pɔ sumi, kena ndro ŋmbi mbe sumi na hin? Imi ndaa mu lɛ sumi kre, pan chɔɔ mbe mu sumi.”
20 A Absalom na kna mna yo Ahithophel pan mbo, “Wre o fni mna kre, kena o ŋga jawala mbe o chin kee ŋga ki fna o pe.”
21 A Ahithophel na yo u pan mbo, “Sɛ sni na mu lɛ bichilɛ mblɛ u ti a pra ŋunu katoo kre sri pre ni, kie ti mbe Israel leele pre kro loo na, mu lɛ mu kaari u loŋgo, a kie mblɛ pee wa mu kro pre kro le gbeŋmbaa.” 22 A leele pre na sɛ yoŋgo nyuŋgo sin Absalom pan ŋunu katoo kre Zio ndra na. A leele pre na yire na le, a Absalom na sɛ sni na u lɛ bichilɛ pre ni.
23 Kre nyjila kre, kee ŋga Ahithophel naa yuu kre krɛrɛ na pe na Nyiɛkpɔɔ wraa yi yuu u pan. Ki tia David na Absalom kro naa lii u kee yire na.