5 A Absalom na yo mbo, “E Hushai yeeri mbe o kee ŋga kii wa u pan loo.” 6 Ŋga Hushai na pan kre, a Absalom na yo u pan mbo, “Jawala ŋga Ahithophel o ŋga yi kre, o taa ki na ree? A na waa li u wo kre na naa, kena o nyina ŋga ki fna o pe.”

7 A Hushai na kna mbo, “Jawala ŋga Ahithophel mu ŋga fuŋgaami ŋga rɛ, kre n nyu. 8 Mu chin na mu lɛ David na u leele pre kro winchinfɛɛnlɛ lɛ, a pan pe kee fiɛrɛ ni na sisire ŋmba biile pe wru u kro wi. A mu lɛ pe ŋunɔwifun ŋmba u wi mu chin, a wre na u leele pre na chaa mu sni blee. 9 Ŋga o yuu ŋga, aada uu wa mu ndra nyua wee ka nu, ndee lawee waa ka nu. Na leele waa loo na David pan mu wi na mu leele mblɛ ni, pie yo na pe mu leele mblɛ ja. 10 Kie ti gbunfɛɛnlɛ mblɛ pee gbun ni na jirae lɛ kre, mbe fiɛrɛ pe yii. Ŋgi na hin? Israel leele pre kro chin na mu lɛ pe ŋunɔwifun, a u leele pre sheli. 11 Mi jawala yi na Israel leele pre kro yeeri tra ŋga nu kro, mbe pe paan fni, imi na pe nɛɛ na epo nyu tanyiɛ yi ŋga, mbe mu yiɛklu na pe ni mbe sɛ wi na mu lɛ wre ni. 12 Mna David nyi kpan, oo u ta mbe wi na u ni mbe ki u fo. A na o u ta, wre na u leele pre wa wa kro. 13 A na waa fɛ mu sɛ nyua chia ka na kre, Israel leele pre kro we maŋa tɛɛ mbe chia kre tini mbe wa landɛɛ nu, mbe waa dnɛ fiɛn kuraa, ka wa kro.”

14 A Absalom na Israel leele pre na yo mbo, “Hushai jawala kre nyu mu wɛ Ahithophel wo kre na,” Na o Tafun Nyiɛkpɔɔ leele pre jawala kna mbe pia taa Ahithophel jawala chichie ŋga u pe ŋga kre na, imi kie pe mbe kala Absalom da.

15 A Hushai na sɛ u jawala ŋga wra ta mna Absalom, na Israel leele pre ŋga kre bɔ srawɔfun Zadok, na Abiata pan, mna Ahithophel jawala ŋga wra pe ŋga kre bɔ pe pan na. 16 A Hushai na ndru mu yo pe pan mbo, “Kena e ti mbe ndro sɛ nyaanyaa mbe sɛ yo David pan na, waa shia ŋnu lawee ŋga nu pe Jordan lɔɔ kre kuun na shie fimi lawee gbeŋglen kre nu aŋga. Pe Jordan lɔɔ kre kun nyaanyaa mbe sɛ, na kre ma pie paan wre na u leele pre yii mbe pe gbo.”

17 Na Abiata pɔ Jonathan, na Zadok pɔ Ahimaaz pree wa na sri En-Rogel blo kre mbɛɛ na. Blo kre naa wa mu mbra Jerusalem na, pe nsra le Jerusalem lam mbe ndro pe nya. Bichable sumifun wa praa tuni, wra shie na mandiɛ ŋga ki pan boo pe pan, mbe pre sɛ ki yo David pan. 18 La, ki ble ka pɔ blɔ wa na pe nya, mna sɛ mandiɛ bɔ Absalom pan, a pra fɛ nyaanyaa mna sɛ tni blɔ wa katoo Bahurim na. Blɔ wre naa wa kɔlɔ ka ni u katoo mbɛɛ na, a pra sɛ le kɔlɔ kre nu. 19 A blɔ wre chɔ na sɛ yira wru mu pan mu kɔlɔ kre nyu tɔ, mna yua mimi chali ki na, na ndro tro wa chin na yakaa wa wa. 20 Absalom loplombo pre na pan katoo wa mna chlɔ wre wie mbo, “Maa, mu n Ahimaaz na Jonathan nya mnaa?” A chlɔ wre na kna mbo, “Pe lafolo kre kun.” A pra sɛ pe cha mu pra, pe nsra pe nya, a pra ndru mu sɛ Jerusalem na. 21 Ŋga pra ndru mu sɛ kre, a Ahimaaz na Jonathan na yili kɔlɔ kre nu mna sɛ mandiɛ bɔ David pan. Pra sɛ jawala sisaa ŋga Ahithophel wru na u ni kre kro bɔ u pan, mna yo u pan na, “Pe nyaanyaa mu lɔɔ kre kun mu sɛ.” 22 A David na u leele pre kro na yiri na lɔɔ kre kuun. Nyiŋge naa yo kie se kre na pe kro kun.

23 Ŋga Ahithophel na nya na u pe ŋga jawala a pe ki je kre, a wra sɛ to u bubnɔ na mna sɛ u chia. Ŋga wra sɛ u yirɛ kro mbra mu tɛɛ kre, a wra, sɛ maŋa le, a pra sɛ u wɔ mna sɛ u le u sele leele faŋga ka nu.

24 Nyjila ŋga ni Absalom na u leele pre na David kɔŋgɔ ni mna sɛ Jordan lɔɔ kre kun kre, na David na u leele pre le Mahanaim na. 25 Kre nyjila kre na Absalom Amasa wɔ na ŋunɔwifɛɛnlɛ pre lopom wi, a wra tni Joab titɛɛ. Amasa lɛ na wi Israel ndro ŋmba praa yeeri Jether wre, a u lo na wi Abigail, a Nahash bichlɔ na wi Abigail, a Joab lo Zeruiah lo pɔ na wi Nahash. 26 Ŋga kra pan ma kre, Absalom na u leele pre na tni Gilead na.

27 Ŋga David na le Mahanaim na kre, leele na sɛ u fni, Nahash pɔ ŋmba praa yeeri Shobi, a pra yiri chia ŋga praa yeeri Rabbah, a kraa wa Ammon tra nu kre, na Ammiel pɔ ŋmba praa yeeri Makir kre na sɛ David fni ka na, pre na yiri chia ŋga praa yeeri Lo-Debar kre na, pre na blɔ ŋmba praa yeeri Barzillai, a wra yiri chia ŋga praa yeeri Rogelim, Gilead tra nu kre na. 28 Ŋga praa shie mbe sɛ David fni kre, pra sɛ na kotie li wee, na chɔkoe, na sni yirɛ, na sro nyininyini ni mu sɛ David na u leele pre ŋga. 29 Pra sɛ srɛ na naara ni, mna mbaala yii mna ya mu sɛ pe ŋga. Pra chin na pie fna, mbe klo, na gbɔɔ wre na u leele pre ta fimi lawee kre nu wa.