3 A leele pre na yo mbo, “Ki n fna mbe wre na ŋu sɛ ŋunɔ. Na wre fɛ loŋgoolo yiɛ kala ka ma, hali na pe o yɔɔ gbo kuraa kre ki n pe yaka, la, ŋu nunu wɛ o pan o leele kagbenyi kɛ na, kena tni katoo mu ti mbe pra paan mbra o kaan yirɛ.”

4 A ŋunu na kna mbo, “Ŋga ki tna e pan kpan mbe ki pe.” A wra sɛ yire jlonwee nyu na, a u leele pre naa tro na yili imi na wra pe yɔɔlɛ kre. 5 A wra kna mu yo Joab, Abishai, na Ittai pan mbo, “Ni e tali na yaa shia Absalom pe yaka.” A leele pre kro na ndie tɛɛ David kee ŋga wra yo kre na.

6 A David leele pre na Israel leele pre na sɛ fni nyaa, a pra wi a David leele pre na Israel leele pre ja. Pra pe gbo Ephraim klɔ kre lawee. 7 David leele pre na Israel leele pre gbo imi na ki fna, pra gbo leele kagbenyi fulo ki ble kre. 8 Ŋunɔ kre na tra kre kro shɔ mu ta, la, leele na ku klɔ kre lawee mu wɛ lawee kre haŋa na.

9 Absalom na sɛ fni na David leele pre plɛ ni, na uu wa mu tni u bubnɔ na. Ŋga yurɔ wre na fɛ mu sɛ le tiŋge kpɔɔ ka ndoo to, a Absalom ndra na sɛ nyjira tiŋge kre klɛ nu. A bubnɔ wre na yili na shie, a Absalom na kro na pɛli tiŋge kre klɛ kre nu. 10 David leele pre wa na Absalom nya, mna sɛ ki yo Joab pan mbo, “Ni tafun, ni Absalom nya na uu wa na pɛli tiŋge kpɔɔ ka klɛ nu.”

11 A Joab na kna mbo, “Ŋga mu u nya kre, mni a mu n u gbo hin? Na mna u gbo mbe na mu kɛ swafiŋge nununu kɛ, mbra ndruu mu ŋga ŋunɔ wi greree mbe ya.” 12 A blɔ wre na yo mbo, “Hali na mu swafiŋge kagbeŋge tɔɔnri mbe le ni kɛɛ kuraa kre, mba kɛ tini mbe taa ŋunu pɔ na. Wre leele mblɛ kro, na ŋu na Abishai na Ittai kro, o ŋunu David nyu kee ŋga u yo o pan loo, mbo, ‘Mi ndra na, yaa shia Absalom pe yaka.’ 13 La, na ndaa ndikana pe ŋunu nyu kee kre na, mna Absalom gbo kre, ŋunu wra ki loo. Kee ka n wa mbe pe, mbe wa ki loo, a na kra pan ma, ma na yo mbra ya ni na.”

14 A Joab na yo mbo, “Mba yire na mu ni, mbra ni nyjila klai. Ti mbe ni tro.” A Joab na sɛ snimi taarɛ wru mna sɛ Absalom suulo na yi ni gbun na. Ŋga wra u suulo na yi ni kre, na u n ta mu ku, na na uu wa na pɛli tiŋge klɛ kre na tɛ. 15 Bawa Joab ŋunɔwifɛɛnlɛ pre kɛ na pan mna Absalom taa mna gbo.

16 A Joab na sɛ bnɔ wru mna ki fɔ, mna nyina na pe ŋunɔ kre ti ma, a u leele pre na laa Israel leele pre kro. 17 A pra sɛ Absalom gboo wre wɔ tiŋge kre nu mna sɛ u wa wee jijuom ka nu klɔ kre nu, mna dnɛ koli tataara mu wo u na. A Israel leele pre na fɛ mu sɛ pe chiɛ na.

18 Nyjila ŋga ni Absalom naa wa kre, wra uyɛ faanri pooro ni mu yire lawee ŋga praa yeeri ŋulo landɛɛ kre nu. Ŋgi na hin? U nsra se mu mɛɛ tɛɛ. Ki tia wra ki pe mbe u mɛɛ wa fun. Hali mu pan mu su aŋga, pee wa na Absalom sɔɔnri na ki ni tɛ.

19 Zadok pɔ Ahimaaz na yo Joab pan mbo, “Ti ni fɛ mbe sɛ mandiɛ taan ŋga bɔ ŋunu pan, na o Tafun Nyiɛkpɔɔ u shɔ mu yili u loŋgoolo kɛɛ.”

20 A Joab na kna mbo, “Ɔɔhɔn, aŋga rɛ, na mu sɛ mandiɛ ŋga bɔ kia pe mandiɛ taan, la, brikana na rɛ, kie tna. Ŋgi na hin? Aŋga ŋunu pɔ u ku kre.” 21 A Joab na yo u tnu ŋmba wra pe Cush ndro wre pan mbo, “Sɛ kee nyjɛ mu nya mna kro bɔ ŋunu pan.” A tnu wre na lɛɛlɛ u yiɛ mu yiri, mna jele su tra.

22 Ahimaaz na je na yuu Joab pan mbo, “Jande, ti mbe ni taa tnu wre kro, mbe sɛ mandiɛ bɔ ŋunu pan ka na.” A Joab na yo mbo, “Ni pɔ, mni a mna chaa mbe sɛ mandiɛ kre ni wo, na mu sɛ ma tnu ka ta ki nu.”

23 A Ahimaaz na kna mbo, “Imi na ki nyi kpan ni chaa mbe sɛ.” A Joab na kna mbo, “Kena sɛ ɛ!” A Ahimaaz na jele fɔɔri tra mna fɛ mu sɛ tro kolo ŋga ki tro Jordan lafolo nu kre na, mna sɛ tnu wre tro kolo.

24 Na David wa mu tni chia kre jlonwee shiin yire lalaa. A jlonwee kre shiefun wre na nduu buŋgo kre ndra na, mna sɛ yire jlonwee kre ndra na tata. Ŋga wra yiɛ wa mu le kre, wra nya na blɔ wa feni wre nunu na paan. 25 A wra yire nyjeeri wa mna yo ŋunu pan mbo, “Ni ndro wa nya na u feni na paan.” A ŋunu na yo mbo, “Na wre nunu u feni na paan mu kɔ, kena mandiɛ taan ni u paan. A na blɔ wree wa na feni na paan tɛ.”

26 Shiefun wre na yire nyjeeri wa mna nya na ndro shiinwo feni na paan, a wra yire wa mna yo ŋmba uu wa jlonwee nyu na kre pan mbo, “Le, ni ndro fuŋu nya wra feni na paan na.” A ŋunu wre na yo mbo, “Ketaan ni wre mi na paan na.” 27 A lawee shiefun wre na yo mbo, “Ŋmba u yiɛ klu wre pe na Ahimaaz wi.” A ŋunu wre na yo mbo, “Ndro chiriri wi, kena ni chin na mandiɛ taan ni u paan.” 28 Ahimaaz na gble le mu ŋunu shaari, mna foli mu to tra ŋunu yiɛ mna yo mbo, “Mu Tafun Nyiɛkpɔɔ wre ŋga mɛɛ, na u tia o mu leele mblɛ pe yiri mu mu taan pre ja.”

29 A ŋunu na kna mbo, “A mni Absalom nyi hin? A Ahimaaz na yo nyjila ŋga ni Joab ni tuni mna kre, ni loo na pe gble leni tataara, la, ni n chin kee ŋga ki pe wa ya.” 30 A ŋunu na kna mu yo u pan mbo, “Yire kokoo ŋga na,” a wra kna mu sɛ yire wa.

31 A tnu ŋmba wra pe Cush ndro wre na da wa, mna yo ŋunu pan mbo, “Tolɛɛ, ni pan na ketaan ni mu pan. Aŋga o Tafun Nyiɛkpɔɔ wre tia leele mblɛ pe yiri mu mu taan pre, a mu pe ja.” 32 A ŋunu na kna mbo, “Mni Absalom nyi hin?” A tnu wre na kna mbo, “Kee ŋga ki Absalom nya kre, na pan kraa mu loŋgoolo, na leele mblɛ pra yiri mu mu taan pre nyaa kre, kaa ki nyu.”

33 Kee kre na tia fooro na ŋunu yii, a wra yiri mu le nyuŋgo ŋga kraa wa jlonwee nyu na wa kre nu, mna sɛ nyɛni na yuu mbo, “O! Ni pɔ Absalom, ni pɔ Absalom, na mi ndaa ku, a mna tni kaa ki nyu. O! Ni pɔ Absalom.”