David Na Wi Mu Ammon Na Syrian Ja
19
Nyjila ka nu, Ammon ŋunu Nahash na ku, a u biblɔ Hanun na u krɔ li mna jɔɔn li. 2 A David na jawala ka ta mna yo mbo, “Mbe chichie pe mbe Hanun Nahash biblɔ wre ŋga. Ŋgi na hin? U lɛ na da mna ni pe chichie ka.” Kra tia David na leele wɔ mna tun mbe pe sɛ u lɛ kumu na. David bitumblɔ pre na sɛ Hanun pan Ammon tra nu, mna sɛ u ŋga o kro atɛ. 3 A Hanun loplombo pre na yo u pan mbo, “Mu jawa na mɛɛ ka David mu lɛ kaan, mu leele tun na pe paan mu ŋga o kro atɛ ŋga ra? Mu n chin na paan pe pan mbe tra ŋga le mbe paan o kɔ ki na ra?”4 Ki tia Hanun na David leele pre yii, mna tia pra pe ndrɛ na pe nyutan yooro klu, mna pe dodonyi nyjɛ pra le yire, mu yiri pe sɛlɛ na paan tapan knumu, mna pe wa a pra sɛ. 5 Ndro wa na pan mna mandiɛ kre bɔ David pan, a wra leele wɔ mu tun a pra sɛ bitumblɔ pre fni kolo. Ŋga pra pe fni kre, pra nya na pra leele pre yiɛ le nyumu. A ŋunu David na yo pe pan mbo, “E kro Jericho na wa mbe sɛ su na e nyutanyooro yire we tɔ tun, mbe e chiin pan chia.”
6 Ŋga Ammon leele pre na chin na kee ŋga pe pe kre we ti mbe David krɔ kun kre, Ammon leele pre ŋunu Hanun na swafiŋge kradnɛ kagbenyi kɔɔnanu na lafɛɛ kɔɔnanu wɔ mna leele tun na pe sɛ Maacah na, na Zobah chiɛ yire, na Syria tra nu, mbe sɛ sookɛɛ, na yi nduufɛɛnlɛ hari mbe pan. 7 Pra sɛ sookɛɛ na yi ŋmaafɛɛnlɛ kagbenyi fulo na kɛmbɔshiin hari, mna wru mu ya Maacah ŋunu na u ŋunɔwifɛɛnlɛ na, a pra pan mu tni mu mbra chia ŋga pe yeeri Medeba kre na. Kre nyjila kre na Ammon wifɛɛnlɛ pre yili pe chiɛ na mu sɛ fni na peyɛ kna mbe sɛ ŋunɔ.
8 Ŋga David na ki loo ma kre, a wra tia Joab na yiɛklu na ŋunɔwifɛɛnlɛ pre kro ni mbe sɛ wi na pe ni. 9 Na Ammon leele pre peyɛ kna, mu yili mu pan mu yire pe kakpɔɔ Rabbah kre jlonwee nyu na, a Syria wifɛɛnlɛ mblɛ praa paan mbe ya pe na kre, na peyɛ kna mu yire lawee gbeŋglen ka nu.
10 Joab na nya na loŋgoolo pre plɛɛ wa pe yiɛ, a plɛɛ wa pe kro haa, ki tia wra ŋunɔ winchinfɛɛnlɛ pre plɛ wɔ Israel leele pre nu, na pre pe sɛ mna Syria ŋunɔwifɛɛnlɛ pre nyi kre, mbe sɛ wi na pe ni. 11 A wra wifɛɛnlɛ pre hamblɛ le u chunu Abishai wre kɛɛ, a pre na sɛ lawee ŋga nu Ammon wifɛɛnlɛ pre na nyi kre mbe sɛ wi na pe ni. 12 Joab na yo Abishai pan mbo, “Na ki waa pe na Syria wifɛɛnlɛ pre faŋga waa na weni o na, mbe e pan mbe ya o na. A na ki waa pan na Ammon wifɛɛnlɛ pre faŋga waa na weni e na, mbe wre pan mbe ya e na. 13 Kena faŋga le, mbe o gbun ta mbe wi, mbe o leele pre, na Nyiɛkpɔɔ kakpɔɛ yire ŋga. O Tafun Nyiɛkpɔɔ wre we ŋga ki tna u pan pe.”
14 A Joab na u wifɛɛnlɛ pre na yiɛ le Syrian leele pre nu, a pra fɛ pe yiɛ. 15 Ŋga Ammon leele pre na nya na Syria leele pre feni kre, a pre na jele su tra mna fɛ Joab chunu Abishai wre yiɛ, mna ndru mu sɛ pe kakpɔɔ kre na. A Joab na u leele pre na laa pe kro, mna ndru mu sɛ Jerusalem na.
16 Ŋga Syria leele pre na nya na Israel leele pre pe ja kre, a pra sɛ ŋunɔwifɛɛnlɛ wru Syria leele mblɛ praa wa na shie Euphrates lɔɔ kre yilafin haa wa kre nu, mna pe le ŋunu Hadadezer ŋunɔwifɛɛnlɛ lopom Shophach wre kɛɛ mbe u yiɛklu na pe ni.
17 Ŋga David na kre mandiɛ ŋga loo kre, a wra Israel ŋunɔwifɛɛnlɛ pre kro yeeri a pra pan mu fni, mna peyɛ kna mu sɛ Jordan lɔɔ kre kun, a pre na Syria ŋunɔwifɛɛnlɛ pre na sɛ gɔli peyɛ na, na wii, 18 a Syria leele pre na fɛ Israel leele pre yiɛ. Ki ble kre David na u wifɛɛnlɛ pre na pe sookɛɛ ŋmaafɛɛnlɛ pre kagbenyi kɔɔnashin gbo, mna pe wifɛɛnlɛ mblɛ pe wii tra kre kagbenyi fuloe shiin gbo. Wra pe ŋunɔwifun lopom Shophach wre gbo na.
19 Ŋga ŋulo mblɛ praa wa Hadadezer jaara pre na nya na Israel leele pe ja kre, a pra pan mna nyu nunu pe na David ni, mna peyɛ wru mu le u jaara. Ŋga kra pan ma kre, Syria leele pre n nsraa chaa na pie ya Ammon leele pre na na.