David Na Wi Mu Rabbah Shɔ
20
Tinyi fun nyjila ŋga nu ŋulo shie ŋunɔ kre, ki ka nu Joab na u ŋunɔwifɛɛnlɛ pre yiɛ klu, a pra sɛ Ammon tra kre kla, mna sɛ pe kakpɔɔ Rabbah kre fɛ mu kun, mna ki ja putuu. Kre nyjila kre na ŋunu David wa Jerusalem na.2 Ki mbakɔ David titi na sɛ Rabbah na, mna sɛ pe sɛɛn Molech ŋga pra faanri mu yire kre ŋujuulee laa ki na. Swanyiɛ ni pra ki pe, a ki snam na pe kradnɛ fuloe taarɛ na kɛmbɔkunɔ, a pra dnɛ chichiele yɛ le ki nu, a David na ki wru mna juule. Wra yirɛ chichiele tataara koli chia kre na. 3 Wra Ammon leele mblɛ pra kro pre plɛ yii mu pan, mna tia praa sraraa, na pinkaasi, na gbaanlɛɛ tɛɛ na tnumu tuni jaŋga na. A pan chɔɔ wra leele mblɛ wra yii Ammon chiɛ hɛnyi yire na pre pe na. A wre na u ŋunɔwifɛɛnlɛ pre na ndru mna pan Jerusalem na.
4 Kraa wa wa nyjila ka nu, a ŋunɔ na kun pre na Philistine leele lalaa chia ŋga pe yeeri Gezer kre na. Ŋunɔ kre nu Sibbecai Hushah ndro wre na legbakra wa gbo, u mɛɛ naa Sippai, a wra pe Rephaim nɔɔ leele pre wa, ki tia pra Philistine leele pre ja. 5 Israel leele pre na sɛ wi na Philistine leele pre ni na, a Jair biblɔ Elhanan wre na sɛ Goliath chunu Lahmi ŋmba wra yiri Gitt sele nu wre gbo, na chombo kpɔɔ kaa wa u kɛɛ.
6 Ŋunɔ ka na ndru mu kun pre na Philistine leele pre lalaa Gath na. Legbakra wa naa wa wa, a u kambɛɛlɛɛ naa kɔɔnanunu, a u jekambɛɛlɛɛ naa kɔɔnanunu na, a yi kro na pe fulo na jijirɛ. Wre chɔɔ na yiri Rapha nɔɔ leele nu. 7 Ŋga kra pan na wraa Israel leele piin na tɛɛ kre, Shimeah biblɔ Jonathan, ŋunu David nana wre, na sɛ u gbo.
8 Pre leele taarɛ mblɛ krɛrɛ Gath na pra yiri, a pra yiri Rapha nɔɔ leele nu, a David na u ŋunɔwifɛɛnlɛ pre na pe gbo.