David Na U Ŋunɔ Wifɛɛnlɛ Tɔɔnri
21
Sutna na yiri mu Israel leele taan, mna tia ŋunu David na jawala ta na we Israel leele pre kro tɔɔnri. 2 Ki tia David na yo Joab, na u ŋunɔwifɛɛnlɛ loplombo pre pan mbo, “E sɛ yire Beersheba na, e sɛ su Dan na, e leele pre tɔɔnri, e pan e yo ni pan, mbe ni leele mblɛ pee wa wa pre nyu chin.”3 A Joab na kna mbo, “O Tafun Nyiɛkpɔɔ wre u ti mbe Israel leele pre nɛɛ mbe wɛ imi na pe da ŋga, ma gbee lafaa. Ni tafun, mu wolo lɛ leele mblɛ kro, a pee wa mu jaara, kena mni mna chaa mbe kre kee ŋga pe, mbe pan na pimi gbuun ni mbe Israel leele ŋga hin?”
4 David nsra u jawala chinɛ, a wra tia Joab na sɛ tro Israel tra nu kro, mna leele pre tɔɔnri mna ndru mu pan Jerusalem na. 5 Wra pan mu yo ŋunu David pan na u leele mblɛ pie jaa brɔfiɛn yiɛshiin yii mbe sɛ ŋunɔ pre tɔɔnri mu ta leele haahuu nunu na kagbenyi lafaa. A mblɛ pee wa Judah tra nu pree kagbenyi lafɛɛ jijirɛ na fuloe taarɛ na kɛ.
6 Joab na ŋunu David jawala nsraa nunu leele tɔɔnrɔɔ kre na, ki tia u nsra Levi, na Benjamin jlom yire leele tɔɔnri.
7 A kre kee ŋga ŋunu na yii kre na pe sisam Nyiɛkpɔɔ pan, kra tia wra Israel leele ndie tini ki na. 8 Ŋga kra pan ma kre, a David na yo Nyiɛkpɔɔ pan mbo, “Ni sisaa badaaŋga pe mu na, kee ŋga ni pe kre na. Kena jande ni mu tali, mu sumifun pimi ŋga u li kre ti mu u ŋga. Mi titi chin na ni jijiere kee pe.”
9 A o Tafun wre na yo David keenyanyofun Gad wre pan mbo, 10 “Sɛ yo David pan na, kee ŋga e Tafun Nyiɛkpɔɔ yuu yi kre, ni mu kaan kee nununu taarɛ. Yi nunu le mu wɔ, ŋga mu wɔ kpan, kre mbe ti ki mu nya.”
11 A Gad na sɛ ki yo David pan mbo, “Kee ŋga o Tafun Nyiɛkpɔɔ wre yo yi kre, mbe mu ka le mbe wɔ.” 12 Klo we to yɛlɛ taarɛ, ndee mu fɛ mu loŋgoolo yiɛ nyiɛpɔ taarɛ, ndee mbe o Tafun Nyiɛkpɔɔ wre ti mbe u bituŋu pan na yira sisaa ni, mu tra ŋga nu, mbe leele gbo tataara. Ka le mu wɔ, mbe ni sɛ ki yo Nyiɛkpɔɔ pan.
13 A David na yo Gad pan mbo, “Ni n chin imi mbe niyɛ pe, la, na ni to o Tafun Nyiɛkpɔɔ wre kɛɛ prɔ, ŋgi na hin? U foorochiɛn kpɔɔ. La, ni n na chaa mbe to lewo kɛɛ.”
14 A o Tafun Nyiɛkpɔɔ wre na tia yira sisaa na pan mu le Israel bilɛ pre nu, a pe kagbenyi fuloe taarɛ na kɛ na ku. 15 Nyiɛkpɔɔ na u bituŋu tun a wra sɛ Jerusalem kla. La, ŋga bituŋu wre naa ki klai kre, fooro na ndru mu o Tafun Nyiɛkpɔɔ wre yii, a wra yo bituŋu wre pan mbo, “Ti ma, ki yila ma.” Kre nyjila kre na bituŋu wre da mu yire Jebusite blɔ ŋmba pe yeeri Araunah wre shunshun na.
16 A ŋunu David na o Tafun Nyiɛkpɔɔ bituŋu wre nya na uu wa mu yire nyjeeri, na tra lalaa. Na u brɔfiɛn yiɛshiin tini mu foli ki a foo nu mu ki yiɛ kan Jerusalem na. A David na u loplombo pre na kumu yonyi tɔtɔ, mna to mu yiɛ juule tra. 17 A David na yo Nyiɛkpɔɔ pan mbo, “Mi ndaa yo na pe ŋunɔwifɛɛnlɛ pre tɔɔnri. Kena mi ni fɔɔn pe mu na. Leele mblɛ ma pe yaka pe. Ni Tafun Nyiɛkpɔɔ, mi na ni katoo leele ndie tini, mu mu leele pre ti.”
18 A o Tafun Nyiɛkpɔɔ bituŋu wre na yo Gad pan, na u yo David pan na u sɛ sragbunu sin, mi u Tafun Nyiɛkpɔɔ wre pan Jebusite ndro Araunah wre shunshun na wa. 19 David na li kee ŋga Gad na yire o Tafun Nyiɛkpɔɔ wre mɛɛ na mu yo kre na.
20 Araunah naa wa na u yua gbuun, ŋga wra kna mbe le kre, na nyjeeri bituŋu wi ŋmba. U bibilɛ jijirɛ mblɛ wre na pre naa wa wa kre na u nya, mna fɛ mu sɛ ndra. 21 Ki nsra mu, a David na da wa. Ŋga Araunah na David nya kre, a wra u yua nyjɛ wraa gbuun yire ti, mna sɛ yiɛ juule tra David yiɛ.
22 A David na yo u pan, mbo, “Mu shunshun ŋga prɛ ni pan ndrɔ ŋga ni ki fna, mbe ni sragbunu sin ki na, mbe o Tafun Nyiɛkpɔɔ ŋga, mbe sra wɔ mbe ki ti yira sisaa ŋga ki le leele pre nu kre nyu to.”
23 A Araunah na kna mna yo David pan mbo, “Ni tafun, ki wru mu yira ŋga ki tna Nyiɛkpɔɔ pan pe. Tolɛɛ, mbe mu ŋga nablɛm mbe mu sra wɔ, a kɛɛn nyjɛ yii wa shunshun ŋga na kro, mbe mu yi wru mbe pe kejenyi. Mbe mu shɔlɔ yire wru mbe shɔlɔ sra wɔ. Yire yirɛ nyjɛ krɛrɛ mbe mu ŋga yi yi kro.”
24 A ŋunu David na kna mna yo Araunah pan mbo, “Ɔɔhɔn, mbe mu ŋga ndrɔ ŋga ki fna. Mba yira ŋga ki pe mu wo wru mbe o Tafun Nyiɛkpɔɔ wre ŋga, ndee mbe yira ŋga na ni n fna kre tɛɛ mbe sra wɔ.”
25 A ŋunu David na swanyiɛ ŋga snam ki da kradnɛ kɛmbɔkunɔ tɔ mna u ŋga. 26 A David na sragbunu sin wa mna o Tafun Nyiɛkpɔɔ wre ŋga, mna yurɛ sroo sra, na wejinyiŋge sra wɔ. A wra yire wa mna o Tafun Nyiɛkpɔɔ wre tali, a wra shɔ u pan, mna tia kanhun na yiri nyjeeri mna pan mu u sra yirɛ yire sro sragbunu kre na. 27 Bawa o Tafun Nyiɛkpɔɔ wre na paara u bituŋu wre pan, a wra ndru mna u brɔfiɛn yiɛshiin kre le ki afoo nu.
28 Ŋga David na nya na o Tafun Nyiɛkpɔɔ wre na u talaa loo Jebusite ndro Araunah shunshun kre na wa kre, bawa wraa shie na sra woni.