2 Kra tia ŋunu David na tia pra fumblɔ mblɛ praa wa Israel tra nu wa kro yeeri, a pra pan mu fni, a wra plɛ wɔ mblɛ pie na dnɛ tɛni mbra yi gbeele mbe pe yi tɛɛ mbe Nyiɛkpɔɔ katoo kre sin. 3 Wra pe ŋga tɔɔnrɔ tataara mbe pe tɛɛ mbe ŋmɛɛ pe, mbe yi tɛɛ mbe jlonwee nyu krɔɛ yire pe, yire na tɔɔnrɔ nyjɛ ni pie tɛɛ mbe krɔɛ yire yii. Wra pe ŋga swafre tataara nyjɛ pe nsra ja mbe kra mbe yi damu chin. 4 A wra pe ŋga cedar kɛɛn chichiele tataara nyjɛ yi nsraa nyu ni, ŋgi na hin? Sidon na Tyre leele pre na pan na yi tataara ni mna ŋunu David ŋga.

5 A David na yo mbo, “Suminyuŋgo ŋga ni biblɔ Solomon we sin kre fna mbe nyu titi, mbe ki mɛɛ sɛ waŋgra kro nu. La, u n ta mu da ndro, a u n yaka pe mu chin, kena ki fna mbe ni yirɛ kro gbeele mbe tɛɛ.” Ki tia David na Suminyuŋgo kre yirɛ tataara cha mu tɛɛ mna chin mu ku.

6 Ŋga wra da kumu na kre, wra u biblɔ Solomon yeeri, mna yo u pan na u katoo sin mbe o Tafun Israel leele Nyiɛkpɔɔ wre ŋga. 7 David na yo Solomon pan mbo, “Ni pɔ, kraa wa ni loloŋgo na, na mbe na katoo sin mbe ni Tafun Israel leele Nyiɛkpɔɔ wre ŋga mɛɛ. 8 La, kee ŋga o Tafun Nyiɛkpɔɔ wre na yo ni pan yi kre mbo, ‘Mu leele gbo tataara, a mu ŋunɛ wi tataara. Kena ŋu ma mu katoo sin mbe ni ŋga, ŋgi na hin? Mu nyimi kna mu wo ni yiɛ na tataara. 9 La, mu biblɔ wa se, we pe wejinyiŋge ndro, mbe ti u leele wuu, a mbe ti mbe u ndie wuu u loŋgoolo kɛɛ kolo kro na, u mɛɛ yi Solomon, ki nɔɔ nyina wejinyiŋge. U ŋunumu nyjila mbe Israel leele ŋga wejinyiŋge, a mbe ti pe wuu. 10 Wre we katoo sin mbe ni ŋga mɛɛ. We pe ni pɔ, mbe ni pe u lɛ, a mbe ti mbe u ŋunumu kre yire Israel waŋgra nu nyjila kro nu.’

11 Kena ni pɔ, ŋu na Nyiɛkpɔɔ e tni nyjila kro nu. Nyiɛkpɔɔ u ya mu na mbe mu jaa u katoo kre sin, imi na u ki yo kre. 12 O Tafun Nyiɛkpɔɔ u mu ŋga jawala, na kachindɛ mbe mu tɛɛ mbe Israel leele pre le, mbe taa u mbra yire na. 13 Na mu li u mbra nyjɛ wra Moses ŋga, a wra Israel leele ŋga yire na kro kre, mu kee kro we nyu mbe mu ŋga. Gbun ta, maa ti mbe fiɛrɛ mu yii, a maa ti mbe mu kɛ gblɛ.

14 Ni wi mu yirɛ nyjɛ ni mu Suminyuŋgo kre sin cha mu tɛɛ. Ni swanyiɛ, na swafiŋge cha tataara mbe mu tɛɛ mbe Nyiɛkpɔɔ katoo kre sin. Yire chiin ma, swafre, na tɔɔnrɔ nyjɛ yi ya yi na yire nɛɛ titi. Ni ki kɛɛn, na ki dnɛ kro cha mu tɛɛ, la, ki fna mu yɛ cha mbe ya yi na. 15 Ni tnumu tunfɛɛnlɛ wɔ, mu mblɛ pie na dnɛ tɛni, na nyinyi sinfɛɛnlɛ, na kapintae, na mblɛ pe kɛ nyu tnumu nyininyini pe mu chin wɔ mu tɛɛ, 16 mblɛ pie jaa swanyiɛ, na swafiŋge, na swafre, na tɔɔnrɔ tɛɛ mbe tnumu tun. Leele tataara wa mbe mu tɛɛ mbe tnumu kre tun. Kena yiri mu ki nɔɔ hle, o Tafun Nyiɛkpɔɔ wre we ya mu na.”

17 A David na yo Israel loplombo pre kro pan na pe ya Solomon na. 18 Wra yo pe pan mbo, “O Tafun Nyiɛkpɔɔ wre we ya e na, mbe e ŋga wejinyiŋge kolo kro na. Wre wra leele mblɛ praa wa mu tni tra ŋga na kro wru mna le ni kɛɛ, a ki tia o Tafun Nyiɛkpɔɔ na u leele pre wo yi tra ŋga. 19 Kena e o Tafun Nyiɛkpɔɔ wre sumi na lɛɛ nunu, na e nyiɛ kro ni. E nɔɔ hle e Suminyuŋgo kre tnumu tun e u mɛɛ kre ŋga buuro. Mbe ki ti yirɛ nyjɛ ni pe u sumi yire lawee ta mbe tni.”