2 David na Israel loplombo pre, na srawɔfɛɛnlɛ, na Levi leele pre kro yeeri, a pra pan mu fni. 3 Wra tia pra Levi leele mblɛ pra li yɛlɛ fulo na kɛ na shie kre tɔɔnri, a pe bilɛ pre nyu na pe kagbenyi fulo na kɛmbɔkɔɔnatarɛ. 4 A David na yo mbo, “Pe kagbenyi fulo na jijirɛ pie na o Tafun Nyiɛkpɔɔ Suminyuŋgo kre tnumu le, mbe pe kagbenyi kɔɔnanu pe pe loplombo, na pe kprakunfɛɛnlɛ. 5 Mbe pe kagbenyi jijirɛ pe ki jlonwee nyu shiefɛɛnlɛ, mbe pe kagbenyi jijirɛ na mɛɛkɔyirɛ nyjɛ ni e ŋga yire tɛɛ mbra mɛɛ koni mbra o Tafun wre kaan mɛɛ.”

6 David na Levi leele pre yɔ taarɛ pe jlom yire na, pre na lɛ Gershon, na Kohath, na Merari. Pe kro na pe Levi bibilɛ.

7 Gershon bibilɛ na lɛ Ladan, na Shimei. 8 A Ladan bibilɛ naa taarɛ, Jehiel na wi lopom, a Zetham, na Joel na taa. 9 Shimei bibilɛ na lɛ Shelomoth, na Haziel, na Haran. Pe taarɛ pre krɛrɛ Ladan katoo loplombo na lɛ. 10 A Shimei bibilɛ na lɛ Jahath, na Ziza, na Jeush, na Beriah. 11 Jahath na wi lopom, a Ziza na taa u na. La Jeush, na Beriah biile n sra nɛɛ, ki tia pra pe kɛwolo pre gbun mu chaa mna pe ŋga tnumu nunu.

12 Kohath bibilɛ naa jijirɛ, pre na lɛ Amram, na Izhar, na Hebron, na Uzziel. 13 Amram bibilɛ na lɛ Aaron, na Moses. Aaron na u nanae pre pra wɔ mna ki yirɛ nyjɛ yi pe cheche yire le pe kɛɛ. Pre praa sra woni na o Tafun Nyiɛkpɔɔ wre kaan, na leele pre dwan na u mɛɛ ni nyjila kro nu. 14 Pra Nyiɛkpɔɔ ndro Moses wre bibilɛ tɔɔnri mu chaa Levi sele pre nu. 15 Moses bibilɛ na lɛ, Gershom, na Eliezer. 16 Gershom nɔɔ leele nu, ŋmba wra yiɛklu pe pan na wi Shubael. 17 A Eliezer nɔɔ leele pre nu, ŋmba wra yiɛklu pe pan na wi Rehabiah a wre na wi lopom. Eliezer biblɔ naa nunu, wre na wi Rehabiah. La, wre na bibilɛ se tataara.

18 Izhar bibilɛ pre ŋmba wra pe yiɛklu na wi Shelomith. 19 A Hebron bibilɛ pre nu, ŋmba wra pe yiɛklu na wi Jeriah, a Amariah na taa shiin, a Jahaziel na taa taarɛ, a Jekameam na taa jijirɛ. 20 Uzziel bibilɛ pre nu ŋmba wra pe yiɛklu na wi Micah, a Isshiah na taa shiin.

21 A Merari bibilɛ na lɛ Mahli, na Mushi. A Mahli bibilɛ na lɛ Eleazar na Kish. 22 Eleazar n sra biblɔ se mna ku. Bichiɛlɛ biribiri wra se, a pe nalɔ ŋmba praa yeeri Kish wre bibilɛ na pe wru mu leŋge. 23 Mushi bibilɛ naa taarɛ, pre na lɛ Mahli, na Eder, na Jerimoth.

24 Kena pre Levi jlom leele mblɛ pra li yɛlɛ fulo na shie a pra pe ŋga tnumu a praa tuni Suminyuŋgo wa pre na lɛ. 25 Bawa David na yo mbo, “Ŋga o Tafun Israel leele Nyiɛkpɔɔ tia u leele wejinyiŋge ta, a wre titi pan mbe tni Jerusalem na nyjila kro nu ŋga, 26 Levi leele pre wa na yoŋgo nyuŋgo kre na ki yirɛ nyjɛ ni pe ki tnumu tuni yire turu mbra kila na.” 27 David kee haŋa ŋga wra yo Levi leele pre pan na yi na, pe pe tɔɔnri mbe yire mblɛ pe li yɛlɛ fulo mu na shie na. 28 A Levi leele pre tnumu yi na pie na yaa Aaron nanae pre na, mbe praa tnumu tuni o Tafun wre Suminyuŋgo wa. A Pre pie na Suminyuŋgo lawee vankam yire, na ki mbɛɛlɛ nyinyi yire le, mbra ki yirɛ cheche nyjɛ ni pie na tumu tuni wa yire le na. 29 A pre pie na paanu nyjɛ praa taari tebru na yire, na paanu mimi ŋga ni pe shɔlɔ sra woni, na yirɛ nyjɛ nu pe nsraa yiisi leni mbe yi kla pɛtipɛti kre, na nyjɛ pie na foo kanhun na yire, na mimi ŋga nu pie na olive simi chaai kre, yire sra yirɛ nyjɛ krɛrɛ Levi leele pre pie na yi le, mbra yi krai.

30 A bnimi na yilakɔŋgɔ, ki fna pe yiri mbe o Tafun Nyiɛkpɔɔ wre ŋga mɛɛ, na mboo. 31 Na ki pan na pie yirɛ sroo sra wɔ mbe o Tafun Nyiɛkpɔɔ wre ŋga Wuuble, ndee Nyiɛpɔ fɔŋgɔ ble lie yire nu, ndee ble kpɔɛ lie yire nu kre, pe plɛ fna mbe sumi o Tafun Nyiɛkpɔɔ yiɛ wa nyjila kro nu imi na ki fna. 32 Kena Levi leele pre kɛɛ pra o Tafun Nyiɛkpɔɔ Yoŋgo Nyuŋgo kre le, na pe waa Suminyuŋgo kre sin mu kɔ, mbe praa ki le, mbra yaa Aaron nanae pre na.