David Srawɔfɛɛnlɛ Nyina Pe Tnumu
24
Imi na pra Aaron bibilɛ pre yɔɔlɛ yi kre. Pre na lɛ Nadab, na Abihu, na Eleazar, na Ithamar. 2 La, Nadab na Abihu na klu mna ku pe lɛ na, a pe nsra bibilɛ se, ki tia Eleazar na Ithamar na lɛ srawɔfɛɛnlɛ. 3 David na Aaron nanae pre yɔɔlɛ mna pe ŋga pe tnumu peyɛ yɛ, Zadok, Eleazar nana wre, na Ahimelech, Ithamar nana wre, pre pra ya David na.4 Eleazar nɔɔ leele pre, katoo loplombo na nɛɛ pe nu, ki tia pra pre yɔ kɛmbɔkɔɔnanu, mna Ithamar nɔɔ leele pre yɔ kɔɔnatarɛ. 5 Eleazar na Ithamar nɔɔ leele pre sɔfue, na Suminyuŋgo kre loplombo naa wa pe nu kro, ki tia kɛɛn pra tɛɛ mna chin mu pe yɔ mna pe tnumu le pe kɛɛ.
6 Ŋga pra pe yɔ mna pe tnumu le pe kɛɛ kre, Nethanel biblɔ Shemaiah, Levi ndro wre wra pe sele yire loplombo mblɛ praa wa pe nyu na pre mɛɛ nyunɔ mu tɛɛ. Mblɛ pra pe dansiɛfɛɛnlɛ na lɛ David na u loplombo, pre na srawɔfun Zadok, na Abiathar biblɔ Ahimelech, na srawɔfɛɛnlɛ pre sele loplombo pre, na Levi leele pre loplombo pre.
7 Ŋga pra kɛɛn tɛɛ jle kre, Jehoiarib kra wɔ, ŋmba wra taa shiin na wi Jedaiah. 8 Taarɛwo na wi Harim, a jijirɛwo na wi Seorim. 9 Kunɔwo na wi Malkijah, a kɔɔnanuwo na wi Mijamin. 10 Ŋmba wra taa kɔɔnashin na wi Hakkoz, a kɔɔnatarɛ wo na wi Abijah. 11 Kɔɔnanyjirɛ wo na wi Jeshua, a kɛ wo na wi Shecaniah. 12 Ŋmba wra taa kɛmbɔnunu na wi Eliashib, a Jakim na taa kɛmbɔshiin. 13 Kɛmbɔtaarɛ wo na wi Huppah, a kɛmbɔjijirɛ wo na wi Jeshebeab. 14 Kɛmbɔkunɔ wo na wi Bilgah, a Immer na taa kɛmbɔkɔɔnanu. 15 Hezir wra taa kɛmbɔkɔɔnashin, a Happizzez na taa kɛmbɔkɔɔnatarɛ. 16 Kɛmbɔkɔɔnanyjirɛ wo na wi Pethahiah, a ŋmba wra taa fulo na wi Jehezkel. 17 Ŋmba wra taa fulo na nunu na wi Jakin, a Gamul na taa fulo na shiin. 18 Ŋmba wra taa fulo na taarɛ na wi Delaiah, a Maaziah na taa fulo na jijirɛ.
19 Pre leele mblɛ krɛrɛ pra pe ŋga tnumu Suminyuŋgo wa mu taala, imi na o Tafun, Israel leele Nyiɛkpɔɔ wre na ki yo pe tolɛɛ Aaron pan kre.
Levi Leele Pre Hamblɛ
20 Levi nɔɔ leele pre hamblɛ lɛ kre. Amram na wi Shubael, na Jehdeiah tolɛɛ. 21 Rehabiah tolɛɛ na wi Isshiah, a wre na wi pɔ lopom. 22 Izhar wra Shelomoth se, a u nana na wi Jahath. 23 Hebron bibilɛ naa jijirɛ, Jeriah na wi lopom, a Amariah na taa, a Jahaziel na taa, a Jekameam na taa. 24 Uzziel biblɔ na wi Micah, a u nana wi Shamir. 25 A Micah chunu na wi Isshiah, a Isshiah nana wi Zechariah. 26 Merari wra Mahli, na Mushi, na Jaaziah se.
27 A Jaaziah bibilɛ naa taarɛ, pre na lɛ Shoham, na Zaccur na Ibri. 28 Mahli wra Eleazar, na Kish se, la, Eleazar nsra biblɔ se. 29 A Kish wre na yiri mna Jerahmeel se. 30 A Mushi bibilɛ naa taarɛ, pre na lɛ Mahli, na Eder, na Jerimoth. Kena pre leele mblɛ na lɛ Levi nɔɔ leele pre.
31 Imi na Aaron nanae pre na kɛɛn tɛɛ mna chin mna pe yɔ mna pe tnumu le pe kɛɛ kre, pan chɔɔ pra pe sele wolo pre pe mna chin mu pe tnumu le pe kɛɛ. David, na Zadok, na Ahimelech, na srawɔfɛɛnlɛ pre sele yire loplombo pre, na Levi leele pre na lɛ pe dansiɛfɛɛnlɛ.