3 Kre kɔkro na, Ŋunu David na sɛ wi na Zobah ŋunu Hadadezer ŋmba wraa wa Syria tra nu wre ni, hali mna sɛ su Hamath na, mna pe ja. Kre nyjila kre na ŋunu Hadadezer chaa mbe Euphrates lɔɔ lawee kre shɔ mbe ta. 4 David na Hadadezer sookɛɛ kagbeŋge yii, mna sookɛɛ ŋmaafɛɛnlɛ kagbenyi kɔɔnashin yii, mna ŋunɔwifɛɛnlɛ mblɛ praa wii tra kagbenyi fulo yii. Wra pe soolo pre panyi saanla, mna pe lafaa nunu ti.

5 Syria leele na yiri Damascus na mna pan mu ya Zobah ŋunu Hadadezer na, a David na gbo pe nu leele kagbenyi fulo na shiin. 6 A David na u ŋunɔwifɛɛnlɛ pre plɛ wɔ mna tɛɛ Syria tra nu, mbe ki ti leele pre David shɔ na pe ŋunu wi, mbra tɔɔ toni mbra u kaan. Lawee ŋga nu David we sɛ wi kpan, o Tafun Nyiɛkpɔɔ naa yaa u na, a wraa wii na yilii.

7 Ŋunu David na subie shɔ yirɛ nyjɛ pra pe na swanyiɛ ni, a Hadadezer loplombo pre na yi tɛɛ na wii yire koli mna pan na yi ni Jerusalem na. 8 Wra swafre tataara koli mna yili ŋunu Hadadezer chiɛ nyjɛ praa yeeri Tebah, na Cun yire na. Mbakɔ ŋunu Solomon na yi tɛɛ mu swafre kotolo badaaŋga ka pe, mna nyumu le ki nu a praa ki yeeri swafre Epo. Wra yɛ tɛɛ mna pilaasi pe, na yirɛ bɛɛlɛ tataara ni mna yi tɛɛ Suminyuŋgo wa.

9 Ŋga Hamath ŋunu Tou na loo na David sɛ wi Zobah ŋunu Hadadezer na u ŋunɔwifɛɛnlɛ ni mu pe ja kre, 10 wra u biblɔ Hadoram tun David pan, na u sɛ u shaari mbe u ŋga lefɔɔ na u wi na Hadadezer ni mu u ja. Ŋunɔ naa wa ŋunu Hadadezer na ŋunu Tou lalaa. Ŋunu Hadoram na sɛ na swanyiɛ, na swafiŋge, na swafre yirɛ nyininyini ni, mna sɛ David ŋga. 11 Ŋunu David na yirɛ nyjɛ pra pan mu u kɛ yire wru mna o Tafun Nyiɛkpɔɔ ŋga, pan wra yi pe imi na nyjɛ wra shɔ Edom, na Moab, na Ammon, na Philistine, na Amalek waŋgrɛ yire pan yire yi.

12 Zeruiah biblɔ Abishai wre na Edom leele pre kagbenyi kɛmbɔkɔɔnatarɛ gbo landɛɛ ŋga praa yeeri Weŋge landɛɛ kre nu. 13 A wra ŋunɔwifɛɛnlɛ tɛɛ Edom na, a kra tia Edom leele pre kro naa wa ŋunu David jaara, na tɔɔ toni na u kaan. O Tafun Nyiɛkpɔɔ na tia mna ŋunu David we sɛ wi kpan, we wi mbe yili.

14 David na ŋunumu li Israel leele na kro, mnaa kee ŋga ki fraka pini, na pe kala lii kpra ni. 15 Zeruiah biblɔ Joab wre na wi ŋunɔwifɛɛnlɛ pre lopom, a Ahilud biblɔ Jehoshaphat wre wraa pe kaalɛɛ nyunɔi na teeri. 16 Ahitub biblɔ Zadok, na Abiathar biblɔ Ahimelech pre na lɛ sɔfue, a Shavsha na wi pe nyunɔfun. 17 A Jehoiada biblɔ Benaiah wre na wi ŋunu David shiefɛɛnlɛ pre lopom, la, ŋunu David bibilɛ pre praa mbra u na titi mu wɛ hamblɛ pre na.