2 A Nathan na yo David pan mbo, “Ŋga mu jawa mbe pe kro, ki pe, ŋgi na hin? Nyiɛkpɔɔ wa mu kro.”

3 Ki ble kre blee Nyiɛkpɔɔ na yo Nathan pan mbo, 4 “Sɛ yo ni sumifun David pan na, kee ŋga mi u Tafun Nyiɛkpɔɔ wre yo yi kre. Wre ma we katoo sin mbe ni ŋga mbe ni tni. 5 Mu yire ŋga ble ndaa Israel leele wɔ mu yili Egypt tra nu mu pan mu su aŋga na, ni n da mu tni nyuŋgo titi nu tun. Nyjila kro nu yonyi nyinyi nu ni jiin na tro. 6 A ŋga mi na Israel leele nyaari na tro ŋga, mu da mu loo a ni yo pe loplombo mblɛ ni wɔ a pe pe yiɛklu pre pan na, ‘Mni a e n cedar kɛɛn tɛɛ mu katoo sin mu ni ŋga tun ra?’”

7 Kena yo ni sumifun David pan na, “Kee ŋga mi e Tafun Jaŋgafun wre yuu yi kre, ŋga ndaa mu yeeri na mu paan ni leele Israel wolo pre le kre, na muu wa mbaala kro, pe kahaa. 8 Lawee ŋga nu mu tro kpan, mi na ŋu wi. A ni mu loŋgoolo kro kla mu yiɛ. Fuŋga ni paan mbe ti mbe mu mɛɛ kpɔɔ na waŋgra lekpɔɛ pre wa wi.

9 Mbe ni wolo Israel leele pre ŋga lawee mbe pe tni. Mbe ti pe yirehaa ta, mbe pre titi kalonyi ta mbe tni, mbe ndro wa pe tɔɔra. A sisampefɛɛnlɛ wa pe ta mbe fiŋge imi na praa pe pini, nyjila ŋga nu ndaa yɛkulo wɔ, a praa pe le kre. 10 Mbe mu loŋgoolo kro tre tra mu yiɛ. Ndaa yo mu pan na mi mu Tafun Nyiɛkpɔɔ wre we ŋunu katoo sin mbe mu ŋga. 11 Kena na mu ble nyjɛ mu li nyu waa to, a maa mu tolɛɛlɛ kɔŋgɔ ni kre, mbe ndro wɔ mu sele nu, ŋu titi biblɔ mbe u mu krɔ li, mbe ti mbe u ŋunumu yirehaa ta. 12 Wre we yiri mbe katoo sin mbe ni ŋga, a mbe ti mbe u jɔɔn kre jaŋga ta nyjila kro nu. 13 We ni wru mbe pe u lɛ, mbe ni u wru mbe pe ni pɔ. U koroo wa kɔ ni nu, imi na Saul koroo na kɔ ni nu, a ndaa tia mna pan mu u krɔ li mu jɔɔn li kre. 14 Mbe ti u ŋunumu li ni leele pre na nyjila kro nu, a u ŋunumu kre we yire gbiŋmbi nyjila kro nu.” 15 Nathan na yire kee nyjɛ Nyiɛkpɔɔ na wɔ mna u nyina yire krɛrɛ yo David pan.

16 A ŋunu David na sɛ tni Nyiɛkpɔɔ yiɛ yoŋgo nyuŋgo kre nu mna yo mbo, “O Tafun Nyiɛkpɔɔ, mi wi ŋmbi, a ni sele yi ŋgi, a mu ni pe imi hin? 17 Hali ki sɛ pe na nyjɛ mu pe mu ni ŋga yire n nɛɛ mu pan, a mu ndru mu kee nyjɛ mu kɔɔ pe mbe mu sumifun nanae ŋga kro yo ni pan. Ni Tafun Nyiɛkpɔɔ, mu ni pe a ki sɛ pe na ni kpɔɔ mu wɛ ndro kro na. 18 Imi na mu ni ŋga buuro mu da ŋga, yira ŋgi kee kii wa mi David nyuu mbe ni yo mu pan hin? Mu chin imi na mu sumifun nyi. 19 O! Ni Tafun Nyiɛkpɔɔ, mu yire mu chaara na, mu kekpɔɛ nyjɛ krɛrɛ pe mu mu sumifun ŋga, mbe ndro kro mu nyu ŋga mu yo kre nya.

20 Ni Tafun Nyiɛkpɔɔ, kee nyjɛ o loo na o ndiile ni kre tia o chin na ndro n wa mu pe na ŋu wi na, a Nyiɛkpɔɔ wa n wa na, na ŋu bɔkɔ. 21 A waŋgra ka n wa tra ŋga nu mu pe na Israel waŋgra ŋga yi, a mu pe shɔ mu yili tnibim nu, mu pe wru mu pe mu leele tun. Kekpɔɛ, na kawako kee nyjɛ mu pe mu o ŋga yire tia mu mɛɛ shɔ waŋgra ŋga nu kro. Mna mu leele wɔ mu yili Egypt tra nu, a ŋga mu leele pre naa nɛɛi kre, a mna waŋgrɛ ni pe yiɛ. 22 Mu mu leele Israel wolo pre wru mu pe mu leele nyjila kro nu, a ŋu o Tafun Nyiɛkpɔɔ wre kaari pe Nyiɛkpɔɔ.

23 Kena jande ni Tafun Nyiɛkpɔɔ, ti mbe nyu ŋga mu yo mu wru mu sumifun, na u katoo wolo haa yire kro ma nyjila kro nu. Jande, ti mbe yi pe imi na mu nyu yo ni pan kre. 24 Imi kie pe na ki pan ma, mbe mu mɛɛ kpɔɔ nyjila kro nu. Kie ti mbe leele na yuu na, ‘O Tafun Nyiɛkpɔɔ Jaŋgafun, Israel leele lefun wre, na Israel leele Nyiɛkpɔɔ wi.’ Mbe mu sumifun David katoo kre yire gbiŋmbi.

25 Ŋu, ni Nyiɛkpɔɔ, ŋu mu wɔ mu mu sumifun nyina na mu katoo sin mbe u ŋga. Kre ki tia mu sumifun, a ni gbun ta na mu tali. 26 O Tafun Nyiɛkpɔɔ, ŋu wi Nyiɛkpɔɔ, ŋu mu yire yirɛ chichiele nyjɛ kee yo mu sumifun pan. 27 Ki tna mu pan na mu mu sumifun katoo dwan, mbe ki kro ma mu yiɛ na. A mu ki dwan yɛŋgɛ, a mu ti mbe ki dwamu kre kro ma nyjila kro nu.”