16
Pra pan na Nyiɛkpɔɔ Nyu Nunu Daka kre ni mna ki tɛɛ yoŋgo nyuŋgo ŋga David na kan ki pan kre nu, a pra yirɛ sroo sra, na wejinyiŋge sra wɔ Nyiɛkpɔɔ yiɛ wa. 2 Ŋga David na yurɛ sroo sra kre, na wejinyiŋge sra yire wɔ mu kɔ kre, a wra o Tafun wre mɛɛ tɛɛ mna dwan mna leele pre ŋga. 3 A pra Israel leele pre bilɛ na chiɛlɛ kro ŋga paanu, na kaara, mna tinyi sɛnyi tɛɛ mna yirɛ bɛɛlɛ bɛɛlɛ yɛ kla mna pe ŋga.4 David na Levi leele pre plɛ wɔ a praa sumi o Tafun Nyiɛkpɔɔ Nyu Nunu Daka kre lawee. Pre praa Nyiɛkpɔɔ tali, na mɛɛ koni na o Tafun Israel Nyiɛkpɔɔ wre kaan mboo. 5 Asaph na wi pe lopom, a Zechariah na taa shiin, a Jeiel na taa, a Shemiramoth na taa, a Jehiel na taa, a Mattithiah na taa, a Eliab na taa, a Benaiah na taa, a Obed-Edom na taa, a Jeiel na taa. Pre leele mblɛ praa juru na saŋgo gbuun, a Asaph naa yambrawa nyaara. 6 A Benaiah na Jahaziel mblɛ na lɛ srawɔfɛɛnlɛ pre naa bnɔɛ foo nyjila nyjila Nyiɛkpɔɔ Nyu Nunu Daka kre yiɛ.
David Na Mboo Ŋgaa Mɛɛ Kɔ
7 Kre ble kre ŋunu David na Asaph na u leele pre nyina kre mboo mɛɛ ŋga, mbe praa ki koni mbra o Tafun Nyiɛkpɔɔ wre kaan, mbo:
8 E o Tafun Nyiɛkpɔɔ
wre ŋga mboo,
e u mɛɛ tɛɛ e na nyiɛtali,
e ti mbe waŋgra yire chin
kee ŋga u pe.
9 E mɛɛ kɔ e u ŋga,
e mboo mɛɛ kɔ e u ŋga,
e u kawako kee nyjɛ u pe yire kee yo.
10 E u mɛɛ cheche kre ŋga yɛnyiŋge,
e ti mbe mblɛ lolonyi yi
o Tafun Nyiɛkpɔɔ wre haa chaa
pre yiɛshɔ.
11 E na kaan o Tafun Nyiɛkpɔɔ
jaŋga kpɔɔ kre na,
e u chin nyjila kro nu.
12 E u kawako kee nyjɛ u pe,
yire sɔɔnri,
yire na u kekpɔɛ,
na u kpra kun kee yire ni.
13 Yire Israel leele,
mblɛ lɛ u sumifɛɛnlɛ:
Yire Jacob nanae mblɛ u wɔ,
mu pe u wolo pre.
14 Wre wi o Tafun, na o Nyiɛkpɔɔ,
u kpra kuun tra kro nu.
15 U u nyu nunu ŋga wra pe kre
sɔɔnri nyjila kro nu,
u nyu kee ŋga wra yo yɛlɛ
kagbenyi tataara yi ŋga kre,
u ki sɔɔnri.
16 Nyu nunu ŋga wra pe
na Abraham ni,
na u nyu nunu ŋga wra pe,
na Isaac ni kre,
u ki sɔɔnri.
17 Wra u nyu nunu kre nyina Jacob,
pan na u mbra yi,
mna tia Israel leele pre na yi
nya na u nyu nunu kee yi.
18 Wra yo pe pan na,
“Yire mbe ŋga Canaan tra ŋga,
mbe ki pe e pan krɔyira.”
19 Kre nyjila kre, na pe n da yaka,
na pee n nɛɛ,
mna pe fumblɔ tra kre nu.
20 A praa kila na tro waŋgrɛ nu,
mbe yiri tra ka nu,
mbe sɛ fɔŋgɔ na.
21 Nyiɛkpɔɔ nsra leele ŋga kolo,
na pe pe fiŋge,
wra yila pe na mna ŋulo yiɛ
kee yo pe pan.
22 Wra yo pe pan mbo,
“Ndro waashia kɛ taa ni leele,
mblɛ ni wɔ pre na.
Ni keenyanyofɛɛnlɛ pre,
ndro waashia pe pe sisaa.”
23 Waŋgra ŋga leele kro,
e mɛɛ kɔ
e o Tafun Nyiɛkpɔɔ wre ŋga.
Blenyini ŋga,
e u ŋmaashɔmu kre kee kpali.
24 E ti mbe waŋgrɛ yire
u yɛnyiŋge kre nya,
e u kawako kee nyjɛ u pe
yire kee yo leele pre kro nu.
25 Ŋgi na hin?
O Tafun Nyiɛkpɔɔ wre kpɔɔ,
a u fna mbe o u ŋga mɛɛ,
a ki fna mbe pe u fiɛ,
mbe wɛ sɛɛnlɛ kro na.
26 Yirɛ nyjɛ waŋgrɛ yire sumi,
yire kro sɛɛnlɛ yi,
la, o Tafun Nyiɛkpɔɔ wre u nyjeeri,
na ki yira kro wa.
27 U yɛnyiŋge, na u kpɔɔrɔm,
u fɛ mu kun,
a faŋga na yɛshɔɔrɔ wa,
u tnihaa wa.
28 Yire waŋgrɛ yire leele,
e o Tafun Nyiɛkpɔɔ wre ŋga mɛɛ,
e u yɛnyiŋge
na u jaŋga kre kee yo.
29 E o Tafun Nyiɛkpɔɔ wre
ŋga mɛɛ imi na ki fna,
e pan u yiɛ,
e sra wɔ e u ŋga,
e imi u pe cheche, na chiɛnri kre le,
e u sumi.
30 Waŋgra leele kro,
e na seeri u yiɛ,
u tia waŋgra ŋga yire gbiŋmbi,
a ndro wa jaa ki jɔŋgɔ.
31 Nyjeeri, na tra e yɛshɔɔrɔ li kpɔɔ,
e ki yo waŋgrɛ yire nu na,
“O Tafun Nyiɛkpɔɔ wre wi ŋunu.”
32 E ti mbe epo na yira ŋga kii wa
ki nu kro na tini,
mbe seele na yi yirɛ nyjɛ pe luu
kro yɛshɔɔrɔ kpɔɔ li.
33 Mbe tinyi nyjɛ yii wa klɔɛ nu mɛɛ kɔ,
yie mɛɛ kɔ
o Tafun Nyiɛkpɔɔ wre yiɛ,
ŋgi na hin?
U paan mbe waŋgra kpra kun.
34 E ti o o Tafun wre ŋga mboo,
ŋgi na hin? U nyu,
a u koroo wa nyjila kro nu.
35 E nyɛni e u yeeri e yo na,
“O ŋmaashɔfun Nyiɛkpɔɔ,
o tini mu ble titɛɛ,
mu o wɔ mu yili waŋgrɛ yire kɛɛ,
mbe ki ti o mu mɛɛ cheche
kre ŋga mboo,
mbe yɛshɔɔrɔ li,
mu yɛnyiŋge ŋgaa kre nu.”
36 E ti mbe o o Tafun,
Israel Nyiɛkpɔɔ wre ŋga mboo,
nyjila kro nu.
A leele pre na yo mbo, “Ami. Mna o Tafun Nyiɛkpɔɔ wre ŋga mboo.”
Kolo Ŋga na Pie Na Sumi
37 Ŋunu David na Asaph na u leele pre ti o Tafun Nyiɛkpɔɔ Nyu Nunu Daka kre lawee, mbe pra sumi wa nyjila kro nu, mbra blenyini tnumu ŋga ki fna tuni. 38 A wra Obed-Edom na u wolo fuloe taarɛ na kɔɔnatarɛ pre ti wa, mbe praa tnumu tuni wa mbe ya. Jeduthun biblɔ Obed-Edom, na Hosah naa jlonwee nyu kre sri.
39 A David na srawɔfun Zadok, na u srawɔfɛɛnlɛ hamblɛ pre ti Yoŋgo nyuŋgo kre lawee Gibeon na, a praa sumi o Tafun Nyiɛkpɔɔ yiɛ. 40 Pre praa yurɛ sroi sragbunu kre na nyjila kro nu, bnimi na yilakɔŋgɔ na o Tafun Nyiɛkpɔɔ wre kaan, imi na pra ki nyunɔ o Tafun Nyiɛkpɔɔ mbra nyjɛ wra Israel leele ŋga kre nu kre. 41 Mblɛ pra ya pe na na lɛ, Heman, na Jeduthun na mblɛ pra wɔ a praa mɛɛ koni na o Tafun Nyiɛkpɔɔ wre kaan mboo kre, ŋgi na hin? U koroo kre wa nyjila kro nu. 42 Heman na Jeduthun praa bnɔ fɔfɛɛnlɛ pre, na yambrawa nyaarafɛɛnlɛ pre, na mɛɛ kɔ yirɛ hɛnyi yire gbunfɛɛnlɛ pre le. Jeduthun bibilɛ praa jlonwee nyu kre sri.
43 Ŋga pra kɔ kre, a leele pre kro na nyina mna sɛ pe kalonyi nu, a ŋunu David na ndru mna sɛ katoo, mna sɛ dwan mna u katoo leele ŋga.