3 David na kɛ wa mna Israel leele pre kro yeeri, a pra pan mu fni Jerusalem na, mbe pe sɛ Nyiɛkpɔɔ Nyu Nunu Daka kre wru mbe paan tɛɛ lawee ŋga u gbeele kre nu. 4 Wra kɛ wa mna Aaron nanae pre yeeri, mna Levi leele pre kro yeeri a pra pan mu fni. Levi leele mblɛ pra pan mu fni kre na lɛ kre. 5 Kohath jlon kre lopom na wi, Uriel, wre na u leele lafaa na fulo ni. 6 Merari jlom kre lopom na wi Asaiah, wre na u leele lafɛɛ shiin na fulo ni. 7 Gershon jlom kre lopom na wi Joel, wre na u leele lafaa na fulo na kɛ ni. 8 Elizaphan jlom kre lopom na wi Shemaiah, wre na u leele lafɛɛ shiin ni. 9 Hebron jlom lopom na wi Eliel, wre na u leele fuloe jijirɛ ni. 10 Uzziel jlom lopom na wi Amminadab, wre na u leele lafaa na kɛmbɔshiin ni.

11 A David na srawɔfun Zadok, na srawɔfun Abiathar, na Levi leele kɔɔnanu pre yeeri a pra pan mu fni. Pre na lɛ, Uriel, na Asaiah, na Joel, na Shemaiah, na Eliel, na Amminadab. 12 A wra yo pe pan mbo, “Yire lɛ Levi jlom yire loplombo, kena yire na e kɛ leele Levi wolo pre, e eyɛ pe cheche, e sɛ o Tafun Israel Nyiɛkpɔɔ wre Nyu Nunu Daka kre wru e pan lawee ŋga ni gbeele ki pan ŋga nu. 13 Ŋga yire Levi leele pre ma e na sɛ ki wru jle kre, kre kra tia o Tafun Nyiɛkpɔɔ wre krɔ na kun na o ni. O nsra u wie imi ki fna o na pe.”

14 Ki tia srawɔfɛɛnlɛ pre, na Levi leele pre na peyɛ pe cheche mbe sɛ o Tafun Israel Nyiɛkpɔɔ Nyu Nunu Daka kre wru mbe pan. 15 Pra sɛ Daka kre yii ki kɛɛn prɔrɔprɔrɔ yire na, mna yi taa pe patiɛ na, imi na o Tafun Nyiɛkpɔɔ na yo Moses pan kre. 16 A David na yo Levi loplombo pre pan na pe pe plɛ wɔ mblɛ pie na yɛshɔɔrɔ mɛɛ koni, mbra binyi, na juru, na saŋgo gbuun mbra yambrawa nyaara. 17 A pra Joel biblɔ Heman wre wɔ, mna u sele ndro Asaph, Berekiah biblɔ wre wɔ mu ya, mna Ethan Kushaiah biblɔ wre wɔ Merari jlom na. 18 Pe sele leele mblɛ pra wɔ mu ya na lɛ, Zechariah, na Jaaziel, na Shemiramoth, na Jehiel, na Unni, na Eliab, na Benaiah, na Maaseiah, na Mattithiah, na Eliphelehu, na Mikneiah, na jlonwee nyu shiefɛɛnlɛ shiin pre, Obed-Edom, na Jeiel.

19 Heman, na Asaph, na Ethan na lɛ pe mɛkɔmblɔ mblɛ praa swafre yambrawa yire nyaara. 20 A Zechariah, na Aziel, na Shemiramoth, na Jehiel, na Unni, na Eliab, na Maaseiah, na Benaiah, pre praa juru mana bɛɛlɛ yire gbuun. 21 A Mattithiah, na Eliphelehu, na Mikneiah, na Obed-Edom, na Jeiel, na Azaziah, pre praa juru mana kpɔɛ yire gbuun.

22 Kenaniah na wi Levi leele pre lopom, ŋga wra mɛɛ kɔ mu chin kre ndra na, wre na wi mɛɛ kɔfɛɛnlɛ pre lopom.

23 A Berekiah, na Elkanah na lɛ Nyu Nunu Daka kre lefɛɛnlɛ. 24 A srawɔfɛɛnlɛ mblɛ praa bnɔɛ foo mu yiɛklu Nyiɛkpɔɔ Nyu Nunu Daka kre pan kre na lɛ, Shebaniah, na Joshaphat, na Nethanel, na Amasai, na Zechariah, na Benaiah, na Eliezer. Obed-Edom, na Jehiah na ya Nyu Nunu Daka kre lefɛɛnlɛ pre na.

25 Ŋga pra leele pre wɔ mu kɔ kre, a David na Israel loplombo pre, na ŋunɔwifɛɛnlɛ loplombo mblɛ praa wa wifɛɛnlɛ kagbenyi nyu na pre, na sɛ o Tafun Nyiɛkpɔɔ Nyu Nunu Daka kre wru Obed-Edom katoo, na yɛshɔɔrɔ kpɔɔ ni. 26 Levi leele pre na nablɛm kɔɔnashin, na mbapilɛ kɔɔnashin tɛɛ mna sra wɔ mu Nyiɛkpɔɔ ŋga, imi na u ya pe na a pe Nyu Nunu Daka kre tio kre na. 27 Ŋunu David na dodoŋgi titnɔŋɔ fiŋge le, wre na Levi leele mblɛ pra Nyu Nunu Daka kre tio pre kro, yi yɛ mɛkɔmblɔ pre na le na, pre na mɛkɔmblɔ pre lopom Kenaniah wre. A David na dodoŋgi fiŋge kpro gbun wo kre le mu taa. 28 Israel leele pre kro na taa o Tafun Nyiɛkpɔɔ Nyu Nunu Daka kre kro, na gble kpɔɔ na paan Jerusalem na. A plɛ na nyamblɛ bnɔɛ, na tɔɔnrɔ wee foo, a plɛ naa yambrawa nyaara, a plɛ naa juru na saŋgo gbuun mu taa.

29 Ŋga Nyu Nunu Daka kre naa lee Jerusalem na kre, a Saul bichlɔ Michal na yiɛ wɔ nyuŋgo vromboo nu, ŋga wra ŋunu David nya na u yoo yɛshɔɔrɔ ni kre, wra u le fiɛn u loloŋgo nu.