David Katoo, Na U Sele Leele
14
Ki ble ka Tyre ŋunu Hiram wre na leele wɔ mu tun ŋunu David pan, mbe pe sɛ na cedar kɛɛn, na dnɛ tnumu tunfɛɛnlɛ, na kapintae ni mbe pe sɛ ya u na mbe u u ŋunu katoo sin. 2 Ŋunu David na chin na o Tafun Nyiɛkpɔɔ wre u u tɛɛ Israel leele ŋunu, a Israel leele pre ndra na, u ŋunumu kre yire.3 Ŋga David na sɛ tni Jerusalem na kre, wra chiɛlɛ leŋge nɛɛrɛ mu ya, mna bibilɛ, na bichiɛlɛ se tataara. 4 U biile mblɛ wra se wa na lɛ, Shammua, na Shobab, na Nathan, na Solomon, 5 na Ibhar, na Elishua, na Elpelet, 6 na Nogah, na Nepheg, na Japhia, 7 na Elishama, na Beeliada, na Eliphelet.
David Na Wi Philistine Leele Ni Mna Pe Ja
8 Ŋga Philistine leele pre na loo na pe David tɛɛ Israel ŋunu kre, pra peyɛ kna mna sɛ u cha haa mbe u yii. Ŋga David na ki loo kre, a wra uyɛ kna mna sɛ pe fni kolo. 9 Kre nyjila kre, na Philistine leele pre klu mu sɛ Rephaim landɛɛ chiɛ yire tɔ mu pe foolo. 10 A David na Nyiɛkpɔɔ wie mbo, “Ni sɛ wi na Philistine leele pre ni ra? Mu pe wru mbe le ni kɛɛ ree?” A o Tafun Nyiɛkpɔɔ wre na yo mbo, “Sɛ, Mbe ti pe to mu kɛɛ.”
11 A David na u leele na yiri mna sɛ chia ŋga pe yeeri Baal-Perazim kre na, bawa wra sɛ wi na pe ni mna pe ja. Bawa David na kna mbo, “Imi nyumu fuu mbe sɛ le lawee nu mbe ki kla kre, pan Nyiɛkpɔɔ le ni loŋgoolo nu, mu ni tɛɛ mu pe kla.” A ki tia praa lawee kre yeeri Baal-Perazim.a 12 Philistine leele pre na fɛ mna pe sɛɛnlɛ ti wa. A David na tia pra kanhun le yi na mna yi sro.
13 Nyjila ka nu na, Philistine leele pre na ndru mna pan mu Rephaim landɛɛ kre leele tɔ na. 14 A David na Nyiɛkpɔɔ wie na, a Nyiɛkpɔɔ na yo u pan mbo, “Maa yiɛ sin mbe sɛ pe pan, e pe fɛ e kun, e sɛ yire balsam tinyi yire lawee, e le pe nu. 15 E shie e sɛ su na ee ŋunɔwifɛɛnlɛ tiŋge loo balsam tinyi yire ndra na, na e waa ki loo ma kena, e chin na mi Nyiɛkpɔɔ ni yiɛ klu mu sɛ na wii na Philistine leele pre ni. Kena e chin mbe le pe nu mbra wii na pe ni.”
16 A David na li kee ŋga Nyiɛkpɔɔ na yo u pan kre na. Ki ble kre pra Philistine leele pre gbo mu yire Gibeon na, hali mna sɛ su Gezer kakpɔɔ kre na.
17 Kra tia David mɛɛ na kpali mu sɛ lawee kro nu. A o Tafun Nyiɛkpɔɔ wre na tia waŋgrɛ yire kro na u fiɛ.