David Sɛ Nyu Nunu Danka Kre Wru
13
David na u loplombo mblɛ praa wa ŋunɔwifɛɛnlɛ kagbenyi, na lafɛɛ nyu na pre na paara mu fni. 2 A wra Israel leele pre kro fni mna yo pe pan mbo, “Na ki tna e pan, a o Tafun Nyiɛkpɔɔ li ki na kre, e ti o kɛ wa mbe o leele hamblɛ mblɛ pee wa Israel tra nu kre, na pe srawɔfɛɛnlɛ pre, na pe Levi leele mblɛ pre na pree wa pe chiɛ na, na pe yurɛ kahɛɛ yire nu kre yeeri mbe pe pan mbe o fni, 3 mbe sɛ Nyiɛkpɔɔ Nyu Nunu daka kre wru mbe pan o jaara. Mu yire ŋunu Saul nyjila kre o na krɔ kna mu wa ki na.” 4 Leele pre kro na ki nɔɔ loo, ŋgi na hin? Kre jawala kre na nyu pe pan.5 Ki tia David na Israel leele kro fni mu yire Shihor lɔɔ ŋga kii wa Egypt tra nu kre na, mna sɛ su Lebo-Hamath na, na shie nyjeeri haa, mbe pe sɛ Nyiɛkpɔɔ daka kre wru chia ŋga pe yeeri Kiriath-Jearim kre na mbe pan Jerusalem na. 6 A ŋunu David na Israel leele pre kro na sɛ Baalah kakpɔɔ ŋga kraa wa Judah tra nu, a praa ki yeeri Kiriath-Jearim kre na, mbe sɛ o Tafun Nyiɛkpɔɔ Nyu Nunu Daka, ŋga na u Mɛɛ taa, a wre Nyiɛkpɔɔ wa mu tni Daka kre ndra na, Cherubim shiin mblɛ pee kuɛn ni pre lalaa kre.
7 Abinadab katoo pra sɛ Nyiɛkpɔɔ Nyu Nunu Daka kre wru, mna ki taa trogo fɔŋgɔ na, a nablɛm shiin naa ki tinii, a Uzzah, na Ahio naa ki le, a praa shie. 8 A David na Israel leele pre kro naa mɛɛ koni na yoo faŋga ni Nyiɛkpɔɔ yiɛ. Praa mɛɛ koni, na juru, na saŋgo gbuun, na yambrawa nyaara, na bnɔɛ foo. 9 Ŋga pra shie mna da Kidon shunshun kre na kre, nablɛm pre wa na gbro, a daka kre mɔŋɔ, a Uzzah na kɛ wa mu ki yii.
10 Titɛɛ kre nu a o Tafun Nyiɛkpɔɔ krɔ na kun na u ni, a wra u gbun mu chan, ŋgi na hin? Wra kɛ taa daka kre na. Ki tia wra to mu ku Nyiɛkpɔɔ yiɛ wa.
11 Ŋga kra pan ma kre, David krɔ na kun na Nyiɛkpɔɔ Uzzah gbo. Hali mu pan mu su aŋga, pe kre lawee kre yeeri Perez-Uzzah.a
12 David na Nyiɛkpɔɔ fiɛ ki ble kre, ki tia wra Nyiɛkpɔɔ wie mbo, “Mni mbe pe mbe sɛ na Nyu Nunu Daka ŋga ni hin?” 13 Ki tia u nsra sɛ na Daka kre ni Jerusalem na na, la, wra sɛ na ki ni Gitt ndro ŋmba praa yeeri Obed-Edom wre katoo.
14 Nyiɛkpɔɔ Nyu Nunu Daka kre na tni Obed-Edom katoo wa nyiɛpɔ taarɛ. A ki tia o Tafun Nyiɛkpɔɔ na Obed-Edom yira ŋga kraa wa u pan, na u katoo leele kro dwan.